گه‌ڕان

Shadow Shadow
سیاسه‌تی

زیاتر بزانە

هەڵوێستی نوێی کازمی لەبارەى نمایشی گروپێکی چەکداریی لە بەغدا

2021.03.28 - 10:26
App store icon Play store icon Play store icon
هەڵوێستی نوێی کازمی لەبارەى نمایشی گروپێکی چەکداریی لە بەغدا

ناس کورد-
مستەفا کازمی، سەرۆک وەزیرانی عێراق ڕایگەیاند، دامەزراوە ئەمنییەکان لە قۆناغێکی بنیادنانەوەدان و دەڵێت، " تۆڕە کۆمەڵایەتییەکان زیاد لە قەباری خۆی نمایشی چەکدارانیان لە بەغدا پایتەخت گەورە کردووەتەوە."

کەناڵی ناس کورد لە تێلیگرام جۆین بکە   

 

کازمی لە دیمانەیەکدا تەلەفزیۆنیدا لەگەڵ عەمر ئەدیب، ڕۆژنامەنووسی دیاری میسر لە بەرنامەی "الحکایة" کەلەکەناڵی "MBC" پەخش دەکرێت و "ناس کورد" بینویەتی (28 ی ئازار 2021 ) وتی، "سوپای عێراق ستەمێکی گەورەی لێکراوە لەلایەن داگیرکەری ئەمەریکاوە، بەڵام هەر بەهێز ماوەتەوە و ورەیەکی بەرزی هەیە لەدوای شەڕی دژ بە ڕێکخراوی داعش".


سەرۆکوەزیرانی عێراق وتیشی، "سوپای عێراق ئێستا زۆر بەهێزترە بەراورد بە ڕابردوو، هێزی خۆی بەسەر هەموو خاکی عێراقدا دەسەپێنێت".

مستەفا کازمی ئاماژی بەوەشکردووە "بەکارهێنانی چەک بۆ بەدیهێنانی داواکارییەکان قبوڵ ناکرێت، دەبێت بەدوای دەرفەتێکدا بگەڕێین بۆ ژیان".


سەرۆکوەزیرانی عێراق لەبارەی نمایشی چەکدارانی "ڕەبعوڵڵا" لە شەقامەکانی بەغدای پایتەخت وتی، "هەموو بەکارهێنەرانی تۆڕە کۆمەڵایەتییەکان قوربانیی تەکنەلۆژیان، ئەوەش کاتێک وێنەیەک بەشێوەیەکی زیادڕەو دەگوازنەوە، ئەو حاڵەتە تەنها لەعێراقدا نییە، بەڵکو لەوڵاتانی دیکەی جیهانیش هەیە، بۆیە سەرپەرشتیارانی سەکۆکانی تۆڕە کۆمەڵایەتییەکان هەوڵی گەورەکردنی شتەکان دەدەن".


کازمی ئەوەشی خستەڕوو، "ئەوەی ڕوویدا هەوڵێکی نەزوکی ژمارەیەک گەنجە کە قوربانی جەنگن و لە ئێستاداهەڵخەڵەتێنراون، ئێمە لە قۆناغی دەرچوونین لە ژووری چاودێریی چڕ، ئەو کارانە بۆ شێواندنی دەوڵەتە، ئەوان لەبری ئەوەی ناکۆکییەکانیان لەگەڵ حزبەکان یەکلایی بکەنەوە هاتوون بەرۆکی سەرۆکوەزیران بگرن".


وتیشی، "حکومەت لە ڕۆژی یەکەمەوە بڕیاریداوە کە کەس ناتوانێت لە دەرەوەی دەوڵەت بێت، ڕێگە بەهیچ چەکێک لە دەرەوەی دەوڵەت نادەین".

 

زیاتر بخوێنەوە: ڕەبعوڵڵا كێن كە ئەمڕۆ لە شەقامەكانی بەغدا بڵاوەیان كرد؟



کازمی ئەوەشی وتووە،"ئەوەی لە پایتەخت ڕوویدا بارودۆخێکی سروشتییە بۆ وڵاتێک کە ساڵانێکی زۆرە بەدەست شەڕەی دژبە داعشەوە دەناڵێنێت، ئەو گروپانە بەشداریی ئەو شەڕەیان کردووە، ئەو چەکەش بەدوای ڕۆڵێکدا دەگەڕێت بۆ بەشداریکردن لە دەوڵەت، بۆیە پێشنیاریمان کردووە بۆگفتۆگۆیەکی نیشتیمانی گشتگیر".

ڕۆژی 25ی ئازاری 2021، گروپى چەکداریی ڕەبعوڵڵا لە بەغدا هێزەکانى بڵاوکردەوە و داوای کرد نرخی نرخی دۆلار بگەڕێنرێتەوە بۆ دۆخی پێشوو و هەروەها بەبێ گەرەنتى هیچ بەشە بودجەیەک ڕەوانەى هەرێمى کوردستان نەکرێت.

 

گروپى چەکداریی ڕەبعوڵڵا لە ڕاگەیەنراوێکدا کە لەکاتى نمایشیکردنى هێزەکانى لە بەغدا بڵاویکردەوە و "ناس کورد" بەدواداچوونى بۆ کردووە چەند داواکارییەکى خستووەتەڕوو، لەوانە دابەزاندنى نرخى دۆلار و بەدیهێنانى خواستى پارێزگاکانى باشور لە بودجەدا.

 

هەروەها جەختیکردووەتەوە کە نابێت بەبێ گەرەنتى هیچ بەشە بودجەیەک ڕەوانەى هەرێم بکرێت.

 

مانۆڕە سەربازییەکەى ئەو گروپە چەکدارییە کاردانەوەى زۆرى لێکەوتەوە و موقتەدا سەدر سەرۆکى رەوتى سەدر بەیاننامەیەکى توندى لەو بارەیەوە بڵاوکردەوە.

 

موقتەدا سەدر لە تویتێکدا (25 ئازاری 2021) كە "ناس كورد" بەدواداچوونی بۆ كردووە نووسیویەتی: یەكێك لە میلیشیاكان پەنای بردووە بۆ نمایشی چەكداری وبڵاوەكردن لە شەقامەكانی بەغدا بۆ هەندێك داوكارای لەچەشنی دابەزاندنی نرخی دۆلار و منیش دەڵێم: پەنابردن بۆ چەك بۆ داواكاریی ڕەتكراوەیە و دەبێت حكومەت جارێكیتر ڕێگەی پێنەدا.