گه‌ڕان

Shadow Shadow
سیاسه‌تی

وردەکاریى

گۆڕان تێبینییەکانى لەبارەى بازنەکانى هەڵبژاردن لەسلێمانى دەخاتەڕوو

2021.03.23 - 15:40
App store icon Play store icon Play store icon
گۆڕان تێبینییەکانى لەبارەى بازنەکانى هەڵبژاردن لەسلێمانى دەخاتەڕوو

ناس کورد- 

سەرپەرشتیاری ژوری هەڵبژاردنی بزوتنەوەی گۆڕان ژمارەیەک کەموکورتی لە یاسای هەڵبژاردنی ئەنجومەنی نوێنەران ئاشکرادەکات و ڕاشیگەیاند "لە زۆر ڕوەوە کۆمسیۆنی باڵای سەربەخۆی هەڵبژاردنەکان ئامادەکارییەکانی وەکو پێویست نین و ناتوانن لەو کاتەی دیاریکراوە هەڵبژاردنێکی سەرکەوتوو بەڕێوە ببەن".

 

کەناڵی ناس کورد لە تێلیگرام جۆین بکە   

 

یاسین حەمە عەلی، سەرپەرشتیاری ژوری هەڵبژاردنی بزوتنەوەی گۆڕان (23ى ئازارى 2021) لە راگەیەندراوێکدا کە "ناس کورد" بەدواداچوونی بۆ کردووە ڕایگەیاند، پاش تێپەڕاندنی یاسای ژمارە (٩)ی ساڵی (٢٠٢٠)ی هەڵبژاردنی ئەنجومەنی نوێنەرانی عێراق، بە لەبەرچاوگرتنی ئەو بارودۆخەی یاساکەی تێدا تێپەڕێندرا بەدەر نەبو لە هەڵەو پەڵەو کەموکوڕی یاسایی و دژیەکی لە سیستمی هەڵبژاردنەکەو دژیەکی دەق و هەڵە بەکارهێنانی زاراوەکان، دواتریش هەڵەی دابەشکاری کورسی بازنەکانی هەڵبژاردن لە پارێزگاکاندا". 

 

بەرپرسەکەى گۆڕان نمونەیەک لە کەموکوڕی دابەشکاری کورسی بازنەکان لە پارێزگای سلێمانی دەخاتەڕوو، پارێزگای سلێمانی دابەش بوە بەسەر (٥) بازنەی هەڵبژاردندا، بازنەی (١ و ٢)ی پارێزگاکە بە نمونە وەردەگرین کە جێگای تێبینی ئێمەیە، لە رەشنوسی یەکەمداو پێش دەنگدانی ئەنجومەنی نوێنەران لەسەری ژمارەی کورسییەکانی ئەم دو بازنەیە بە جۆرێک بو، بەڵام پاش بڵاوبونەوەی لە وەقایعی عێراقی کورسییەکانی ئاڵوگۆڕ بوەو بەرکەوتەی کورسییەکانیان پێچەوانە کراوەتەوە.

 

باسی لەوەشکردووە، بەپێی دوایین داتای کۆمسیۆن بازنەی (١) سنوری (باکورو رۆژهەڵاتی قەزای ناوەندی سلێمانی، قەزای شارباژێڕو ناحیەکانی، قەزای ماوەت و ناحیەکانی) لەخۆدەگرێت ژمارەی دەنگدەرانی بریتییە لە 273 هەزارو 841 دەنگدەرو دابەشبون بەسەر (٩٦) بنکەی دەنگداندا، لەبەرامبەردا بازنەی 2ی سنوری (باشورو رۆژئاوای قەزای ناوەندی سلێمانی، ناحیەی بازیان و عەربەت، قەزای قەرەداغ) لەخۆدەگرێت ژمارەی دەنگدەرانی بریتییە لە 341 هەزارو 152 کەس دابەشبون بەسەر 132  بنکەی دەنگداندا.

 

ئەوەشی وتووە "سەرباری بەردەست نەبونی ژمارەی راست و دروستی دانیشتووان هەروەها قەبارەی ژمارەی دەنگدەرانی بازنەی 2 بەڵام لەڕووی بەرکەوتی کورسییەوە ئەم بازنەیە 3 کورسی بۆ تەرخان کراوە (2 کورسی بەرزترین دەنگ و 1 کورسی کۆتای ئافرەتان)، لەبەرامبەردا بازنەی 1 کە 67 هەزارو 311 دەنگدەری کەمترە بە بەراورد بە بازنەی 2 بەڵام بەرکەوتی کورسییەکانی 4 کورسییە (3 کورسی بەرزترین دەنگ و 1 کورسی کۆتای ئافرەتان)".

 

سەرپەرشتیاری ژوری هەڵبژاردنی بزوتنەوەی گۆڕان ڕاشیگەیاندووە، ناعەدالەتی ئەم دابەشکارییە ڕونەو ناکرێ بابەتێکی ئاوها گرنگ بەسەر شارەزایانی کۆمسیۆندا تێپەڕبوبێت، کە ئەوان سەرچاوەی پێدانی داتاکان بون بە لیژنەی یاسایی لە ئەنجومەنی نوێنەران و بازنەکانی هەڵبژاردن دابەشکراوە.

 

یاسین حەمە عەلی باسی لەوەشکردووە، ئەم تێبینییەو چەندانی تر دەمان گەیەنێت بەو راستییەی کە لە زۆر ڕوەوە کۆمسیۆنی باڵای سەربەخۆی هەڵبژاردنەکان ئامادەکارییەکانی وەکو پێویست نین، لە ئێستاوە ئاشکرایە کە ناتوانن لەو کاتەی دیاریکراوە هەڵبژاردنێکی سەرکەوتوو بەڕێوە ببەن. جەختی لەوەشکردووەتەوە، گرافیکی ئامادەکراوی داتای هەردو بازنەی (1 و 2)ی پارێزگای سلێمانی، کە لە پەیجی فەرمانگەی سلێمانی کۆمسیۆنی باڵای سەربەخۆی هەڵبژاردنەکان بڵاوکراوەتەوە.