گه‌ڕان

Shadow Shadow
سیاسه‌تی

فراکسیۆنى گۆڕان هۆکارى دەنگنەدانى بە پڕۆژە یاساى دادگاى فیدراڵى ئاشکراکرد

2021.03.22 - 22:21
App store icon Play store icon Play store icon
فراکسیۆنى گۆڕان هۆکارى دەنگنەدانى بە پڕۆژە یاساى دادگاى فیدراڵى ئاشکراکرد

ناس کورد-

 

 فراکسیۆنى گۆڕان لە پەرلەمانى عێراق هۆکارى دەنگنەدانى بە پڕۆژە یاساى دادگاى فیدراڵى دەگەڕێنێتەوە بۆ دەنگدان بە یاساکە بە "زۆرینەى سادە"، ئەوەش بە "پێچەوانەى دەستور" ناودەبات.

 

کەناڵی ناس کورد لە تێلیگرام جۆین بکە   

 

هەریەکە لە بەهار مەحمود و یوسف محەمەد پەرلەمانتارانى فراکسیۆنى گۆڕان ئەمڕۆ دووشەممە لە راگەیەنراوێکى هاوبەشدا کە وێنەیەکى دەست "ناس کورد" کەوتووە ئاماژەیان بەوەکردووە،  تێپەڕاندنی هەموارى یاساکە بە دەنگدانی زۆرینەی سادە هەڵەیەکی گەورە بو و، سەرپێچیی ناوەڕۆکی بڕگەی دووەمی مادەی 92ی دەستور بوو کە ئاماژە بەوە دەدات کە دەنگدان بە یاسای دادگای باڵای فیدراڵی پێویستی بە دەنگی دوسێیەکی ئەندامانى پەرلەمانە. 

 

باسیان لەوەشکردووە "لەم دەقەی دەستور ئەوە تێدەگەین کە هەر یاساکارییەک سەبارەت بە دادگای باڵای فیدراڵی، پێویستی بە دەنگدانی دوسێیەکی پەرلەمانتاران هەیە. دادگای باڵای فیدراڵیش هەر بەو ئاڕاستەیە رۆشتوە لە خستنەڕوی رای خۆی ژمارە (107) لە ساڵی 2012 لە وەڵامی پرسیاری لیژنەی یاسایی پێشوتری ئەنجومەنی نوێنەران و بڕیاری ژمارە (38)ی ساڵی 2019 ".

   

ئەو دوو پەرلەمانتارە دەڵێن، ئەوان وەک فراکسیۆنی گۆڕان داوایان کردووە دەنگدان لەسەر هەموارەکە بە زۆرینەی دوسێیەک بێ، هەر بۆیەش کە ئەوە پەسەند نەکرا بەشداریی دانیشتنی پەرلەمان و دەنگدانیان نەکرد لەسەر هەموارەکە. 

 

"ئێستاش هیواخوازین کە ئەم هەڵەیە راست بکرێتەوە چونکە هەر بڕیارێکی دادگای نوێی فیدراڵی شەرعییەتی لەژێر پرسیار و مشتومڕی لایەنە جیاوازەکان ئەبێ، بەتایبەت کە بڕیارە هەڵبژاردنی پێشوەختە بکرێت و دادگای باڵای فیدراڵیش بەپێی دەستور دەرەنجامی هەڵبژاردنەکان پەسەند دەکات".

 

 ئەو دوو پەرلەمانتارە بە پێویستیان زانیوە، لە دانانی ئەندامە نوێیەکانی ئەو دادگایە، هەڵە و کەموکوڕییەکانی چۆنییەتیی دانانی دادوەرانی ئەندامی ئەنجومەنی کۆمسیارانی کۆمسیۆنی هەڵبژاردنەکانی عێراق دوبارە نەکرێتەوە و، دەرگای خۆپاڵاوتن بۆ هەمو ئەو دادوەرانە بکرێتەوە کە مەرجی یاساییان تێدایە، لەسەر بنەمای لێوەشاوەیی و دەستپاکی و توانای ئەکادیمی، دادوەرانی دادگاکە دەستنیشان بکرێن بە رەچاوکردنی بنەمای هاوسەنگیی پێکهاتەکان کە بنەمایەکی دەستورییە نەک بەشبەشێنەی حیزبی.

 

پەرلەمانى عێراق 18ى ئازارى 2021، پڕۆژەیاسای دادگای فیدڕاڵی پەسەندکرد، بەوەش دادگاکە جارێکى تر دەستبەکارەکانى دەکاتەوە، کە لە ناوەڕاستى 2019 ەوە پەکیکەوتووە بەهۆى مردن و خانەنشیبوونى چەند ئەندامێکییەوە.