گه‌ڕان

Shadow Shadow
سیاسه‌تی

زانیاری و وردەکاریی

بارەگای پارتی لە هەڵەیجە زانیاری لەسەر تەقەکردنەکەى شەوی ڕابردوو ئاشکرا دەکات

2021.03.19 - 09:56
App store icon Play store icon Play store icon
بارەگای پارتی لە هەڵەیجە زانیاری لەسەر تەقەکردنەکەى شەوی ڕابردوو ئاشکرا دەکات

ناس کورد-

شەوى ڕابردوو جارێکی تر تەقە لە بارەگاى لقى 12ى پارتى ديموكراتى كوردستان لە هەڵەبجە كرا و تەنها زيانى ماددى لێكەوتەوە، كارگێڕى لقەكەش دەڵێت، "تەقەكردن لە بارەگاكانمان لەم سنورە بووەتە دياردە."

کەناڵی ناس کورد لە تێلیگرام جۆین بکە   

 

دواى تەقەكانى شەوى ڕابردوو لە بارەگاى لقى پارتى لە هەڵەبجە، نورەدين بەشارەتى، كارگێڕى لقەكە لە چاوپێكەوتنێكى تەلەفزيۆنيدا (19ى ئازارى 2021) كە "ناس كورد" بەدواداچونى بۆ كردووە وتى، كاتژمێر يەكى شەو دەستڕێژى گولـلە كرايە سەر بارەگاەکە، "بەڵام سوپاس بۆ خودا هيچ زيانێكى گيانى نەكەوتووەتەوە."

 

سەبارەت بەوەى كێ لە پشت ئەو كارەوەيە و هيچ سەرە داوێكيان دەستكەوتووە باسى لەوەكرد، "ڕەنگە ئێستا نەتوانين وەڵام بدەينەوە، تەقەكردن لە بارەگاى پارتى لەم سنورە بووەتە دياردە و ئەمە يەكەمجار نييە و كۆتا جاريش نابێت، ئەگەر دەزگا ئەمنيەكان هەوڵى دۆزينەوەى تەقەكەران نەدەن ڕەنگە چەندين جاری تريش دووبارە ببێتەوە."

 

بەشارەتى لە بەشێكى ترى قسەكانيدا هێماى بۆ ئەوەكرد، هەر جارێك تەقە كرابێت دەزگا ئەمنيەكان ئاگادار بوون و داوايان لێدەكەين لێكۆڵينەوە بكەن بۆ دۆزينەوەيان، "ئەوە يەكەمجار نييە بارى دەرونى خەڵكى ناوچەكە تێكدەدرێت، دەستێكى ناديار تەقە لە بارەگاكانى پارتى دەكات و سيماى شارستانى شارەكان دەشێوێنن."

 

كارگێڕى لقى پارتى ئەوەش ئاشكرا دەكات، "هەر جارەى بيانويەك دەدۆزرێتەوە و لە يەكێك لە جارەكاندا دەڵێن ئەوانەى تەقەيان كردووە مەست بوون، بۆچى ئەو كەسانە تەقە لە بارەگاى حزبێكى تر ناكەن، ئەوە دەستێكى لە پشتەوەيە و پێويستە دەزگا ئەمنيەكان ئەو دەستە بدۆزنەوە و ڕێوشوێنى ئەمنى بەرامبەريان بگرنە بەر بۆ ئەوەى جارێكى تر دوبارە نەبێتەوە."

 

سەبارەت بەوەى ڕێوشوێنەكانى لقى پارتى چين وتى، "ئێمە ڕێوشوێنى ياسايى دەگرينە بەر و سكاڵا تۆمار دەكەين و داواى دۆزينەوەيان دەكەين، سەبارەت بە چۆنێتى تەقەكان وتى، لە دوو شوێنەوە تەقە كراوە كە يەكيان لە ئۆتۆمبێلێكەوە بووە و ئەوى تريان لە ماتۆڕ سكيلێكەوە، ئەگەر لايەنە ئەمنيەكان ئيرادەيەكى جدييان هەبێت ئەوا تەقەكەران دەدۆزرێنەوە."