گه‌ڕان

Shadow Shadow
سیاسه‌تی

سەدام چی کرد؟

نهێنییەكانی ڕووداوی كوژرانی عەدنان خەیروڵا بڵاوكرایەوە

2021.03.15 - 21:10
App store icon Play store icon Play store icon
نهێنییەكانی ڕووداوی كوژرانی عەدنان خەیروڵا بڵاوكرایەوە

ناس كورد-

بەرنامەیەكی دۆكیۆمێنتاریی گومان لە هۆكاری ڕاستەقینەی كەوتنەخوارەوەی كۆپتەری عەدنان خەیروڵای خاڵۆزی سەدام و وەزیری بەرگريی پێشووتری عێراق دەكات كە لە ساڵی 1989 لە نزیك گوندی مەلا قەرە لە نزیك لە مەخمور كەوتە خوارەوە.

کەناڵی ناس کورد لە تێلیگرام جۆین بکە   

 

بەرنامەكە كە میدیاكار  حەمید عەبدوڵا ئامادەی دەكات و لە كەناڵی تایبەتی خۆی (تلك الأیام) بڵاویكردووەوەتەوە و "ناس كورد" بەدواداچوونی بۆ كردووە، بە دوو زنجیرە باس لەوە دەكات پاش ئەوەی لە 5ی ئایاری 1989 كۆپتەری عەدنان خەیروڵا لە جۆری سەمتی كەوتووە و ناوبراو و ژمارەیەك لە هاوەڵەكانی مردوون، سەدام لە بەغدا چووەتە سەر تەرمەكەی لەگەڵ حسێن كاملی زاوا و ئامۆزای و بەكوڵ بەسەر تەرمی جێگر و خاڵۆزاكەیدا گریاوە.

 

هەر لە بەرنامەكە ئەنجامی لیژنەیەكی باڵای لێكۆڵینەوە خراوەتەڕوو كە بە فەرمانی تایبەتی سەدام پێكهێنراوە و لیوا سەیف هەمەمەوەندی سەرۆكایەتی كردووە.

 

ئەنجامەكانی لیژنەكە دەریدەخات هۆكاری كەوتنی كۆپتەرەكە باوبۆران و خراپی كەشوهەوا و لەدەستدانی كۆنتڕۆڵ بووە، بەڵام وەزیری پێشووتری بەرگریی عێراق بەرمەبنای هەندێك شیكار و زانیاری گومان لەم ئەنجامە دەكات و هەندێ زانیاری نوێ دەخاتەڕوو.

me_ga.php?id=2882

عەبدولقادر ئەلعوبەیدی كە لەساڵانی هەشتاكان بەڕێوەبەری نوسینگەی عەدنان خەیروڵا بووە و لە سەردەمی مالیكی وەزیری بەرگری بوو، لە میانەی وتەكانیدا بۆ بەرنامەكە باس لەوە دەكات، چەند ڕۆژێك بەر ڕووداوەكە عەدنان خەیروڵا زۆر بێزار بووە و هیوای خواستووە خانەنشین بكرێت و گلەیی و سكاڵای زۆری هەبووە، هەروەها دەڵێت، هیچ كات وەزیر بە كەمتر لە سێ فڕۆكە دەرنەچووە كەچی لەو ڕووداوەدا تەنها بووە! ئەمەش پێچەوانەی رێككارە سەربازییەكانی ئەوكات بووە كە قەدەغە بووە وەزیر بەتەنها دەرچێت.

 

عەبدولقادر عوبەیدی ئەوەش دەخاتەڕوو، جۆری فڕۆكەكەی عەدنان خەیروڵا سەمتی بووە و ئاستێكی بەرزی تەكنەلۆژیی هەبووە، هەروەها لە دووری 80 كم باوبۆرانی ئاشكراكردووە، خۆشی چەندین جار لەگەڵ عەدنان خەیروڵا لە بەسرەوە لە دۆخی باراناویدا پێی هاتووەتەوە بۆ بەغدا و كێشەی نەبووە، كەچی ئەوەی سەیرە بەئاسانی لە نزیك مەخمور كەوتووە!

me_ga.php?id=2883
بەرنامەكە لە زاری تاقە ڕزگاربووی ڕووداوەكە ئەوە دەخاتەڕوو كە هاوڕێیەتی عەدنان خەیروڵای كردووە لەناو فڕۆكەكە، "لەپڕدا هەموو شت كوژاوەتەوە و سیستمی فڕۆكەكە لەكارخراوە و تاریكایی دروست بووە و بەدوایدا كەوتوونەتە خوارەوە".


عەبدولقادر عوبەیدی باس لەوە دەكات هەندێ ئەفسەر بەئاشكرا حسێن كاملی زاوای سەدامیان تۆمەتباركردووە بەكوشتنی عەدنان خەیروڵا و لەسەر ئەوەش لەسێدارەدراون دواتر، هەروەها دەڵێت، "وەك خۆشم پێموایە حسێن كامل لەپشت ڕووداوەكە بووبێت، چونكە زۆر دوژمنی عەدنان خەیروڵا بووە كە برای ساجیدەی ژنی سەدام و فەرماندەی سوپای عێراق بوو لە شەڕی هەشت ساڵەی عێراق _ ئێران."

 

زیاتر بخوێنەوە: لە ساڵیادى کوشتنى حسێن کامیلدا.. بڕیارى لێخۆشبون تەڵە بوو یاخود ڕاستى؟



بەرنامەكە ئاماژە بەوەش دەكات، عەدنان خەیروڵا كە لەنێوان ساڵانی 1979 - 1989 وەزیری بەرگری و جێگری سەربازیی سەدام بووە و خاوەن چەندین بڕوانامەیە و ئەفسەرێكی مەسلەكی بووە، جەماوەری زۆریشی هەبووە لەناو سوپا و تەنانەت سەدامی حسێن خۆشی باسی لەوەكردووە كە خەڵك خۆشیان دەوێت و بەخشندەبووە لەگەڵ سەربازەكان و ئەفسەرەكان.

me_ga.php?id=2884
لەكۆتایی بەرنامەكەدا ئامادەكار جەخت لەوە دەكاتەوە ئەو لەگەڵ تیۆری پلان نییە، بەڵام لەگەڵ ئەوەش نییە كوژرانی عەدنان قەزاو قەدەر بووبێت، بەڵام ئاماژەكان لەسەر ئەوەن دەستی سەدام نەبێت و هی حسێن كامل بێت كە خۆشی لە 1996 خۆی و سەدام كاملی برای و باوك و دایك و خوشكەكانی بەدەستی ئامۆزاكانی (بنەماڵەی سەدام) كوژرانەوە.