گه‌ڕان

Shadow Shadow
سیاسه‌تی

مەسرور بارزانى: پێداگیریی لە سەر چارەسەریی بنەڕەتی کێشەکان لە گەڵ بەغدا دەکەین

2021.03.11 - 13:03
App store icon Play store icon Play store icon
مەسرور بارزانى: پێداگیریی لە سەر چارەسەریی بنەڕەتی کێشەکان لە گەڵ بەغدا دەکەین

ناس کورد-

 

مەسرور بارزانى سەرۆکى حکومەتى هەرێم رایگەیاند، پێداگیریی دەکەن لە سەر چارەسەریی بنەڕەتی کێشەکانیان لە گەڵ حکومەتی فیدراڵ.

 

کەناڵی ناس کورد لە تێلیگرام جۆین بکە   

 

مەسرور بارزانى لە پەیامێکدا بەبۆنەى یادی 51 ساڵەی ڕێککەوتننامەی یازدەی ئاداری 1970 کە وێنەیەکى دەست "ناس کورد" کەوتووە ئاماژەى بەوەکردووە، دەبێت کێشەکان لەسەر بنەماى پاراستن و دابینکردنی مافە دەستوورییەکانی گەلی کوردستان و چەسپاندنی بنەماکانی سیستەمی فیدراڵی لە عێراق چارەسەر بکرێن.

 

ده‌قی په‌یامەکە:

 

ئەمڕۆ یادی پەنجا و یەک ساڵەی ڕێککەوتننامەی یازدەی ئاداری 1970 دەکەینەوە کە دەستکەوتێکی مێژوویی شۆڕشی مەزنی ئەیلول بوو بەڕابەرایەتی بارزانیی نەمر.

 

خەبات و تێکۆشانی گەلی کوردستان، حکومەتی ئەوکاتەی عێراقی ناچار کرد کە بۆ یەکەم جار، بە شێوەیەکی فەرمی دان بە بەشێک لە مافە نەتەوەییە ڕەواکانی گەلی کوردستاندا بنێت. هەرچەندە بەداخەوە حکومەتی عێراق دواتر، ڕێککەوتننامەکەی پێشێل کرد و پاشگەزبووەوە و سەرئەنجام پەنای بۆ توندوتیژی و شەڕ لە دژی خەڵکی کوردستان بردەوە .

 

ڕێککەوتننامەی یازدەی ئادار، بەرهەمی خەبات و قوربانیدانی سەرجەم چین و توێژ و پێکهاتە جیاوازەکانی خەڵکی کوردستان بوو، خواست و ویستی گەلی کوردستان بوو بۆ بەیەکەوەژیانی ئاشتیانە و ڕەتکردنەوەی شەڕ و ماڵوێرانیی . لەم بۆنەیەدا، پێداگیریی لە سەر چارەسەریی بنەڕەتی کێشەکانمان لە گەڵ حکومەتی فیدراڵی دەکەینەوە لە سەر بنەمای پاراستن و دابینکردنی مافە دەستوورییەکانی گەلی کوردستان و چەسپاندنی بنەماکانی سیستەمی فیدراڵی لە عێراق.

 

مەسرور بارزانی

سەرۆکی حکومەتی هەرێمی کوردستان