گه‌ڕان

Shadow Shadow
سیاسه‌تی

زیاتر بخوێنەوە

سەرکردایەتییەکی یەکێتی: پارتی بە ئاشکرا هەڕەشە دەکات و هیچ قسەیەک بەرانبەر هاوسەرۆکان قبوڵ ناکەین

2021.03.08 - 18:02
App store icon Play store icon Play store icon
سەرکردایەتییەکی یەکێتی: پارتی بە ئاشکرا هەڕەشە دەکات و هیچ قسەیەک بەرانبەر هاوسەرۆکان قبوڵ ناکەین

ناس کورد-

سەرکردایەتییەکی یەکێتی ڕایگەیاند، پارتی بە ئاشکرا "هەڕەشە و بوختان" بۆ یەکێتی و هاوسەرۆکی یەکێتی لاهور شیخ جەنگی دەکات، هیچ قسەیەک بەرانبەر هاوسەرۆکانی یەکێتی قبوڵ ناکەن.

کەناڵی ناس کورد لە تێلیگرام جۆین بکە   

 

فەهمی بورهان، ئەندامی سەركردایەتی یەكێتی و لێپرسراوی بۆردی ڕێکخراوە پیشەییەکانى ئەو حزبە لە میانی وتەیەکیدا کە "ناس کورد" بەدواداچوونی بۆ کردووە (8ی ئازاری 2021) ڕایگەیاندووە، "ماوەیەکە بە ئاشکرا بە بەرنامە لەڕێگەی میدیای سێبەر و هەندێک کات میدیای فەرمیشەوە سایت و پەیجەکاتی پارتی هەڕەشەو بوختان و کۆمەڵێک وتاری نابەجێ بەرانبەر یەکێتی و هاوسەرۆکی یەکێتی لاهور شێخ جەنگی ئەنجامدەدەن".

 

وتیشى، "ئێمە نامەوێت وەڵامیان بدەینەوە لەبەر ئەوەی ئاشتی و ئازادی و ئەو دیموکراسییەی لە کوردستان هەیە تێکنەچێت و دژو دوژمنانی نەتەوەکەمان پێمان خۆش نەبێت نەک وەڵاممان پێ نەبێت، بەڵام بە دڵنیاییەوە پێتان دەڵێین هیچ قسەیەک بەرانبەر هاوسەرۆکانی یەکێتی قبوڵ ناکەین، لەکاتێکدا ئەزانین مێژووی ئەوان چۆن بووەو چییان ئەنجامداوە بەرانبەر نەتەوەکەمان".

 

فەهمی بورهان باسی لەوەشکرد، "یەکێتی هێزێک نییە فێری بێدەنگی بووبێت ئەگەر لەبەر دۆخی کوردستان نەبێت، ئەگەر بێینە جواب دیارە لە مێژوودا وەڵامەکانی ئێمە چۆن ئەوانی تەزاندووە". 

 

ماوەى زیاد لە هەفتەیەکە شەڕى راگەیاندن لەنێوان پارتى و یەکێتى سەریهەڵداوەتەوە، بەتایبەتى دواى هێرشکردنە سەر غالب محەمەد پەرلەمانتار و دەنگۆکان لەبارەى هەڕەشەى پارتى بۆ ئازادکردنى سێ ئەفسەرى سەر بەو حزبە کە لەلایەن هێزە ئەمنییەکانى سلێمانى یەوە لەسەر ئەو رووداوە دەستگیرکرابوون.

 

لاهور شێج جەنگی، هاوسەرۆکی یەکێتیی نیشتیمانیی کوردستان (چوارشەممە 3ی ئاداری 2021) پەیامێکی ئاڕاستەی مەسرور بارزانی کرد و ڕەخنەی ئەوەی لێگرت کە دەستوەردان لەو کەیسەدا دەکات.  

  

هاوسەرۆکی یەکێتی لە تویتێکدا ڕایگەیاند، "دەستیان داوەتە کاروباری دادگا بۆ ئەوەی ئەو سێ کەسە ئازاد بکرێن و کەیسەکە دیزە بە دەرخونە بکرێت، بۆیە سەرۆکی حکومەت لێرەوە پێت دەڵێم تۆ بە تەواوەتی متمانەت لەدەستداوە ئەگینا ئەمەت قبوڵ نەدەکرد. "  

  

ئاماژەی بەوەشکرد، "هەر ئەو حکومەتەی کە لە کەیسی دەستگیرکردنی (٥) چالاکوانەکەی بادینان داوای لە هەموو لایەنەکان دەکرد کە دەستوەردان لە کاروباری دادگا نەکەن، کەچی هەمان حکومەت بە ئاشکرا و بە هەڕەشەکردن داوای ئازادکردنی (٣) ئەفسەری دەزگایەکی هەواڵگریی هەرێم دەکات کە لەسەر کەیسی پەلاماردانی پەرلەمانتار غالب محەمەد دەستگیر کراون."  

  

هەر لەدوای ئەوەش، لە ڕاگەیەنراوێکدا وتەبێژی حکومەتی هەرێمی کوردستان (چوارشەممە 3ی ئاداری 2021) ڕایگەیاند، "سەرۆکی حکومەت پاڵپشتی تەواوی خۆی بۆ دادگاکان دووپات دەکاتەوە کە بە شێوەیەکی دادپەروەرانە و سەربەخۆییانە و دوور لە ئەجێندا و بەرژەوەندی هیچ لایەک و دوور لە فشاری تاک و لایەنە سیاسیەکان، بڕیار لە سەر هەموو کەیسەکان بدات و هیچ کەیسێکیش پشتگوێ نەخرێت."  

  

ئاماژەی بەوەشکرد، " لەوانە کەیسی ڕادەستکردنەوەی مستەفا سەلیمی و تیرۆرکردنی ئامانج بابانی و هاوژین و منداڵەکەی، داواش لە هەموو لایەک دەکات، خۆیان نەکەنە جێگرەوەی دادگاکان."