گه‌ڕان

Shadow Shadow
سیاسه‌تی

’’تێپەڕاندنى بە زۆرینە’’

’’دوا مۆڵەت’’ بۆ تێپەڕاندنى پڕۆژەى بودجە دیاریکرا

2021.03.03 - 09:09
App store icon Play store icon Play store icon
’’دوا مۆڵەت’’ بۆ تێپەڕاندنى پڕۆژەى بودجە دیاریکرا

ناس کورد-

 

سەرۆکایەتى پەرلەمان و کوتلە سیاسییەکان ڕێککەوتن لەسەر پێدانى دوا مۆڵەت بە لایەنە ناکۆکەکان لەسەر پڕۆژەى بودجە، ئەگەرنا بە زۆرینە تێدەپەڕێنرێت.

کەناڵی ناس کورد لە تێلیگرام جۆین بکە   

 

یونادم کەنا سەرۆکى کوتلەى رافیدەین لە پەرلەمانى عێراق لە لێدوانێکیدا بۆ رۆژنامەى "مەدا" ى عێراقى کە "ناس کورد" بەدواداچوونى بۆ کردووە رایگەیاندووە، لەکۆبوونەوەى دوێنێى سەرۆکایەتى پەرلەمان و سەرۆکى کوتلەکاندا باس لەسێ پرس کراوە، لەنێویاندا پرۆژەکانى بودجە و دادگاى فیدراڵى.

 

وتیشى بەشداربووانى کۆبوونەوەکە رێککەوتن لەسەر پێدانى هەلێکى دیکە تا کۆتایی هەفتەى داهاتوو، بۆ ئەوەى لایەنە ناکۆکەکان لەسەر هەندێ ماددەى پڕۆژەى بودجە کێشەکانى نێوانیان چارەسەر بکەن، بەپێچەوانەوە پەرلەمان ناچار دەبێت بە زۆرینە نەک تەوافوق پڕۆژەکە تێپەڕێنێت.

 

بەوتەى یونادم کەنا، لەکۆبوونەوەکەدا هەروەها ڕێککەوتن کراوە کە لەگەڵ خستنەڕووى پڕۆژەى بودجە بۆ دەنگدان لەسەرى، پرۆژە یاساى دادگاى فیدراڵیش دەنگى لەسەر بدرێت.

 

لیژنەى دارایی پەرلەمانى عێراق سەرەتاى ئەم مانگە رادەستکردنى پڕۆژەى بودجەى بە سەرۆکایەتى پەرلەمان راگەیاند، دواى تەواوبوونى سەرجەم ماددەکانى، بەڵام هێشتا دیار نییە کەى دەنگى لەسەر دەدرێت.

 

رادەستکردنى پڕۆژەکە لەکاتێکدایە، هێشتا رێککەوتنى کۆتایی نەکراوە لەسەر ماددەکانى پەیوەست بە پشکى هەرێم لە بودجە و دۆسیەى هەناردەکردنى نەوت.

 

فارس عیسا، سەرۆکی نوێنەرایەتی حکومەتی ھەرێمی کوردستان لە بەغدا (2ی شوباتی 2021) لە لێدوانێکدا بۆ "ناس کورد" ڕەتیکردەوە هیچ وادەیەک بۆ گەیشتن بە ڕێککەوتنی نێوان هەرێم و بەغدا دیاریکرابێت و جەخت دەکاتەوە کە "هێشتا دانوستانەکان بەردەوامن.  

 

رۆژێک پێشتر، لاهور شێخ جەنگی، هاوسەرۆکى یەکێتی ڕایگەیاند، هیوایەکی زۆر هەیە ئەم پێنجشەممەیە (5ی ئازاری 2021) هەرێم و بەغدا بگەنە ڕێککەوتن.