گه‌ڕان

Shadow Shadow
سیاسه‌تی

وردەکاری

’’لەدوای ڕفاندنی هەشت شۆفێری بارهەڵگر عەلوەی سلیمانی دادەخرێت’’

2021.03.02 - 22:11
App store icon Play store icon Play store icon
’’لەدوای ڕفاندنی هەشت شۆفێری بارهەڵگر عەلوەی سلیمانی دادەخرێت’’

ناس کورد-

کاسبکارانی عەلوەی سلێمانی ڕایدەگەیەنن، عەلوەی سلێمانی دادەخەن و کار ناکەن بەهۆی ئەوەی هەڕەشە لەسەر ژیانیان هەیە، نوێنەرێکیشیان دەڵێت، دوێنێ هەشت شۆفێریان ڕفێندراون و دواتر ئازادکراون، بۆیە تاوەکو کێشەکەیان بۆ چارەسەرنەکەن عەلوە ناکەنەوە.

کەناڵی ناس کورد لە تێلیگرام جۆین بکە   

 

ڕۆژی یەکشەممە 28ی شوباتی 2021، ژمارەیەک شۆفێری بارهەڵگر لە بەردەم بینای پارێزگای سلێمانی گردبوونەوە و ڕایانگەیاند، کاسبکارانی عەلوەی سلێمانی بارەکانی دەروازەی سنوریی سەیرانبەن و شوشمێ-یان قۆرخ کردووە و ڕێگە بەوان نادەن لە دەروازەکە کاربکەن و دوایانکرد، کێشەکەیان بۆ چارەسەر بکرێت.

 

لەدوای دوو ڕۆژ لەوە و ئەمڕۆ سێشەممە 2ی ئاداری 2021، لە لافیتەیەكی گەورەدا، كە بە دیواری عەلوەی سەوزە و میوەی شاری سلێمانیدا هەڵواسراوە، كاسبكارانی عەلوەکە نوسیویانە، "لەبەر نەبوونی ئەمنیەتی بارهەڵگرەكانمان و سەلامەتی گیانی هەموولایەك لەڕێگای مەرزەكان لە ڕۆژی هەینی 5ی ئادارەوە دەرگاكانی عەلوە دادەخەن."

 

 

لەوبارەیەوە سەروەر عەلی، سەرۆکی لیژنەی کشتوکاڵی سەندیکای عەلوەی سلێمانی بە "ناس کورد"ی ڕاگەیاند، "لەلایەن کۆمەڵێک لە شۆفێرانی بارهەڵگری دەروازەی سنوری باشماخ، هەڕەشەمان لێکراوە و دوێنێ دووشەممە هەشت شۆفێری ئێمە بە بارهەڵگرەکانیانەوە ڕفێندراون، دواتر بەڕێگەی کۆمەڵایەتی ئازادکراون."

 

لەبارەی کێشەکەوە، ڕوونیکردەوە، "ماوەی چەند ساڵێکە ئەم کێشەیە هەیە، ئێمە وەک عەلوەی سلێمانی شۆفێر و بارهەڵگری خۆمان هەیە، پێشتر لە دەروازەی سنوریی باشماخ کارمان دەکرد و بارمان دەهێنا، بەڵام ئەو شۆفێرانە کێشەیان بۆ دروست کردین و وتیان دەبێت، ئێمەش بار ببەین، تائەوەی ئێمە دەروازەی باشماخمان بۆ جێهێشتن."

 

باسی لەوەشکرد، "شۆفێرانی ئێمە چوونە هەردوو دەروازەی سەیرانبەن و شوشمێ، ئێستا کە بارەکانی ئەو دوو دەروازەیە زیاترە و لە باشماخ بار کەمبووەتەوە، دیسان هاتوونەتەوە دەڵێن، دەبێت لە دەروازەی سەیرانبەن و شوشمێ-ش بارببەین."

 

"تا ئەوەی گەیشتووەتە ئەوەی هەڕەشەمان لێبکەن و شۆفێرەکان و بارهەڵگرەکان بڕفێنن و هەڕەشەش لە کاسبکارانی عەلوەکە بکەن."، سەروەر عەلی وای وت.

 

ئاماژەی بەوەشکرد، "ئێمە عەلوەی سلێمانی دادەخەین تاوەکو لایەنی پەیوەندیدار کێشەکەمان بۆ چارەسەر دەکەن، بە پێچەوانەوە دەرگای عەلوە ناکەینەوە کار ناکەین و ژیانی خۆمان ناخەینە مەترسییەوە.