گه‌ڕان

Shadow Shadow
سیاسه‌تی

بۆچى پاسەوانەکانى بەکارناهێنێت؟

ڤیدیۆ؛ غالب محەمەد وەڵامى ڕەخنەکان لەسەر پاسەوانەکانى دەداتەوە

2021.03.01 - 23:12
App store icon Play store icon Play store icon
ڤیدیۆ؛ غالب محەمەد وەڵامى ڕەخنەکان لەسەر پاسەوانەکانى دەداتەوە

ناس کورد-
غالب محەمەد وەڵامى ئەو ڕەخنانە دەداتەوە کە لێیدەگیرێت لەبارەى نەبوونى پاسەوان لەکاتى پەلاماردانیدا و دەشڵێت، لە بەغداوە پێیان وتووە هێزى بۆ ڕەوانە دەکەن بۆ پاراستنى بەڵام ڕەتیکردووەتەوە.

کەناڵی ناس کورد لە تێلیگرام جۆین بکە   

 

غالب محەمەد، پەرلەمانتارى هاوپەیمانى هیوا کە شەوى شەممە لە سلێمانى بە چەقۆ هێرشیکرایە سەر بە "ناس کورد"ى ڕاگەیاند، "پاسەوانمان هەیە، بەڵام هەموویان بۆ بەغدا بەکاردەهێنین، بۆ کوردستان هیچیان بەکارناهێنین، پەرلەمانتارەکانى دیکەش زۆربەیان هەروان، چونکە ناکرێت لە شوێنە گشتییەکان هێزێک بخەینە دواى خۆمان."

 

باسى لەوەشکرد، مانگی ڕابردوو هەواڵگریی عێراق ئاگاداریکردووەتەوە لە هەوڵى هێرشیکردنە سەرى  داوایان لێکردووە بیپارێزن، بەڵام ئەو رەتیکردووەتەوە، ئێستاش هەمان داوایان لێکردووە بەڵام دیسان رەتیکردووەتەوە.

 

لەبارەى تۆمەتبارى هێرشکردنە سەرى کە هێزە ئەمنییەکان ناسنامەیان دیاریکردووە، ئەو پەرلەمانتارە وتى، "من پیشتر نەمبینیوە و نازانم کێیە، ئێستاش بەتەواوى ناوەکەى نازانم".


بەپێی راپۆرتێکى "ناس کورد" کە دوێنێ بڵاویکردەوە، هێزە ئەمنییەکانى سلێمانى ناسنامە و شوێنى دانیشتنى ئەو تۆمەتبارەیان دیاریکردووە کە شەوى شەممە لە سلێمانى پەلامارى غالب محەمەد پەرلەمانتارى هاوپەیمانى هیوای دا، بەڵام هێشتا نازانرێت بۆ کوێ هەڵهاتووە.  

  

سێ سەرچاوەى ئاگادار لە دۆسیەکە یەکشەممە بە "ناس کورد" یان راگەیاند، هێزە ئەمنیەکان چونەتە سەر ماڵى ئەو تۆمەتبارە کە ماڵیان لەگەڕەکى توى مەلیکە لە نزیک شەقامى سى مەترى بەڵام خۆى لەماڵەوە نەبووە.  

  

ئاماژەیان بەوەشکرد، بۆ وەرگرتنى زانیارى، هاوسەرى هەڵهاتووەکە و خەزورى بۆ وەرگرتنی وتەیان لەسەر شوێن و ناونیشانی ئەو پیاوە ڕاگیراون.  

 

سەرچاوەکانى ناس کورد دەڵێن، ئەو کەسە ناوى (ح ، م) ەو لەپەنجاکانى تەمەنیدایە و خەڵکى پێنجوێنە و دەمێکە لەسلێمانى دادەنیشێت و پێشتر لەسوپاى ڕزگاریدا پێشمەرگە بووە و کەسێکى هەژارە و لەخانووى کرێدایە.  

  

بەوتەى سەرچاوەکان، هاوسەرى ئەو تۆمەتبارە، بەهێزە ئەمنیەکانى وتووە نازانێت هاوسەرەکەى بەرەو کوێ ڕۆشتووە و ماوەیەکە پەیوەندى تەلەفۆنى زۆرى بۆ هاتووە و ئەویش لەو بارەیەوە پرسیارى لێکردووە، بەڵام وردەکارى بۆ باس نەکردووە.  

 

یەکێک لە سەرچاوەکان وتى لەئێستادا غالب محمەد گومانى ئەوەى لەلادروستبووە حزبێکى دەسەڵات بەو کارە تێوە گلابێت، پێشتریش دەزگاى هەواڵگرى عێراق لەسەر بوونى چەند هەڕەشەیەک ئاگادارى کردووەتەوە، بەڵام دیارنەمانى ئەو تۆمەتبارە بووەتە پرسیار لەلاى بەرامبەر بەرپرسانى سلێمانى.  

 

سەرچاوەكان بەگومانن لەوەی ئەو كەسە لەسنوری سلێمانیدا مابێتەوە.  

 

دواى رووداوەکە هێزە ئەمنییەکانى سلێمانى سەرجەم بەڵگەکانیان کۆکردووەتەوە کە دەریدەخات چۆن ئەو تۆمەتبارە لەشەقامى سەهۆڵەکەى سلێمانیەوە شوێنپێى ئەو پەرلەمانتارەى تا بەردەمى ماڵى خۆیان لە گەڕەکى مامۆستایانى سلێمانى هەڵگرتووە و دواتر لەبەردەرگا بەچەقۆ هێرشى کردووەتە سەرى و بریندارى کردووە.  

 

سەرکەوت ئەحمەد، بەڕێوەبەری ڕاگەیاندن و پەیوەندییەکانی بەڕێوەبەرایەتی گشتی پۆلیسی سلێمانی لە لێدوانێکدا بۆ "ناس کورد" (1ی ئاداری 2021) ڕایگەیاند، "لەسەر کەیسەکەی غالب محەمەد بەدواداچوونەکانی پۆلیس بەردەوامە و ماڵی تۆمەتبارەکە دۆزراوەتەوە و بە بڕیاری دادوەر پشکنینی ماڵەکەی کراوەو بەڵام لە ماڵەکەی نەبووە".  

  

وتیشى، "خێزانەکەی پێی ڕاگەیاندووین کە نەڕۆشتووەتەوە بۆ ماڵەکەی و بۆ ئەوەش پۆلیسی سلێمانی لە هەوڵدایە بۆ دەستگیرکردنی ئەو کەسە لە هەر شوێنێک بێت".  

  

سەرکەوت ئەحمەد باسی لەوەشکرد، "ئێمە نازانین ئێستا چووەتە دەرەوەی سلێمانی یاخود لە ناو شاردایە، بەس گومان دەکەین سلێمانی بەجێهێشتبێت، بۆ ئەوەش گەڕان بەدوایدا بەردەوامە و بازگە و شوێنە گشتییەکانیشمان لێ ئاگادار کردوونەتەوە".  

  

لەبارەی دەنگۆى هەڵهاتنى تۆمەتبارەکە بۆ هەولێر، سەرکەوت ئەحمەد وتى، "ڕەنگە ئێمە هەندێک ڕێککاری تایبەت بەخۆمان هەبێت لە ڕووی پەیوەندی تەلەفونی یاخود ڕێگەی دیکە بۆ ئاگادارکردنەوەیان لەوەی کەسێک فەرمانی گرتنی هەیە و ڕادەستمان بکەن".  

  

ڕوونیشیکردەوە، "بەڵام لە کاتی هەڵاتنی تۆمەتبارێک بۆ شارێکی دیکە و هەوڵدان بۆ دەستگیرکردنی دەبێت دادوەر ئاگادار بکرێتەوە، لەو ئەگەرەشدا ئێمە بەفەرمی پۆلیسی هەولێر ئاگادار دەکەینەوە لەوەی ئەو کەسە فەرمانی گرتنی هەیەو هاوکاریمان بکەن لە دەستگیرکردنی".  

  

"شتی وانییە داوای تۆمەتبارێک بکرێت و ڕادەست نەکرێت، هەر تۆمەتبارێک فەرمانی گرتنی هەبوو بێت ئێمە دەستگیرمان کردووە و ڕادەستمان کردوون، ئەوانیش بەهەمان شێوە هەرچی فەرمانێکی دەستگیرکردنی تۆمەتبارمان ئاڕاستەکردبن و چووبێتە بەردەستیان دەستگیریان کردووەو ڕادەستیان کردووینەتەوە"، سەرکەوت ئەحمەد وایوت.