گه‌ڕان

Shadow Shadow
سیاسه‌تی

وردەکاری بخوێنەوە

تۆمەتێک لە پارتییەوە بۆ یەکێتى: هاوکارى هێزە هاوبەشەکە نییە بۆ کۆنتڕۆڵکردنى دەروازەکان

2021.03.01 - 20:40
App store icon Play store icon Play store icon
تۆمەتێک لە پارتییەوە بۆ یەکێتى: هاوکارى هێزە هاوبەشەکە نییە بۆ کۆنتڕۆڵکردنى دەروازەکان

ناس کورد-
سەرۆکى فراکسیۆنى پارتى لەپەرلەمانى کوردستان یەکێتى تۆمەتبارکرد بەوەى هاوکار نەبووە بۆ ئەرکى ئەو هێزە هاوبەشەى پێکهێنراوە بەمەبەستى کۆنتڕۆڵکردنى خاڵە سنورییەکان.

 

کەناڵی ناس کورد لە تێلیگرام جۆین بکە   

 

زانا مەلا خالید ئەمڕۆ دووشەممە،1ی ئازاری 2021، لە چاوپێکەوتنێکدا لەگەڵ تەلەفزیۆنى فەرمى حزبەکەى کە "ناس کورد" بینیویەتى ئاماژەى بەوەکرد، هێزە هاوبەشەکەى وەزارەتى ناوخۆ و پێشمەرگە پێکهێنراوە بۆ کۆنتڕۆڵکردنى خاڵە سنورییەکان، بەڵام پێویستە لایەنەکان هاوکاربن.

 

وتیشى، "پێویستە یەکێتى هاوکاربێت بۆ ئەوەى دەروازە سنورییەکان سەرجەمیان کۆنتڕۆڵ بکرێن و هاوکارى ئەو هێزە هاوبەشە بێت کە پێکهێنراوە، بەڵام بەداخەوە تا ئێستا هاوکار نەبووە".

 

زانا مەلا خالید جەختیکردەوە، کۆنتڕۆڵکردنى دەروازەکان و نەهێشتنى قاچاخچییەتى فەرمانى حکومەتە و دەبێت جێبەجێ بکرێت، ئەگەر تەنها داهاتى خاڵە سنورییەکان وەک خۆى بگاتەوە بە حکومەت کێشەى موچە چارەسەر دەبێت.

 

لەبارەى رێژەى لێبڕینى موچەوە، زانا مەلا خالید وتى، "لێبڕینى موچە خۆگونجاندنە لەگەڵ ئەو داهاتەى لەبەردەستى حکومەتە، هیچ حکومەتێک نییە پارەى هەبێت و نەیدات بە موچەخۆر، بۆیە ئەو رێژەیە پەیوەستە بە داهاتەوە، بەڵام گرنگە 30 رۆژ جارێک موچە بدرێت وەک حکومەت بەڵێنیداوە".

 

باسى لەوەشکرد، لەداهاتوودا ئەم بڕە داهاتە زیاد دەکرێت، لەگەڵ زیادکردنى داهات و کەمکردنەوەى خەرجییەکان، ئەوەش بەشى موچە و پڕۆژەکان دەکات.

 

ڕۆژی 7ی کانونی دووەمی 2021، ئەنجومەنى وەزیرانى هەرێمى کوردستان ڕایگەیاند، "بە ڕاسپاردەی سەرۆک وەزیران، ئەنجومەنی وەزیران بڕیاریدا بە ڕاسپاردنی هەردوو وەزارەتی ناوخۆ و پێشمەرگە کە هێزێکی تایبەت و هاوبەش پێکبهێنن، بۆ ڕێگەکرتن لە هەر پێشێلکاری و سەرپێچی و کارێکی نایاسایی لە سەرجەم دەروازە سنوورییەکانی هەرێمی کوردستان".

 

 

لەوبارەیەوە سەرچاوەیەکی ئاگادار لە وەزارەتی پێشمەرگە (31ی کانوونی دووەمی 2021) بە "ناس کورد"ی ڕاگەیاند، "ئەو پرسە تەنها پێشنیازێک بووە و تاوەکو ئێستا هیچ هەنگاوێکی کرداری بۆ نەنراوە بۆ دروستکردنی هێزە هاوبەشەکە."

 

هەر لەسەر هەمان بابەت، بەرپرسێکی باڵای پێشمەرگە کە نەیویست ناوی ئاشكرابکرێت بە "ناس کورد"ی وت، "ئەو پرسە تەنها لە ئەنجومەنی وەزیران باسکراوە و وەزیری پێشمەرگە و وەزیری ناوخۆ ئاگاداریین، هەر لەوبارەیەشەوە کۆبوونەوەیەکیان کردووە، بەڵام ئاگاداری ناوەڕۆکەکەی نیین.

 

جەختیشیکردەوە، "جگە لەو پێشنیاز و گفتوگۆیانەی کە باسم کرد، تاوەکو ئێستا نوسراوێک یاخود بڕیارێک لەوبارەیەوە نەهاتووەتە وەزارەتی پێشمەرگە و هیچ شتێک لەبارەی وردەکارییەکەیەوە دیارنییە."

 

پرسی قاچاخچێتی و کاری نایاسایی لە خاڵە سنورییەکان یەکێکە لەو پرسانەی ماوەیەکە زۆر بە بەربڵاوی باس دەکرێت و داوای ڕێگریکردنی لێدەکرێت.

 

هەر لەو چوارچێوەیەدا و لەماوەی ڕابردوودا، چەند بەرپرسێکی سنوری گەرمیان بەتۆمەتی ساختەکاری و کاری قاچاخچێتی دەستگیرکراون.