گه‌ڕان

Shadow Shadow
سیاسه‌تی

زانیاری زیاتر

ناس کورد ئاماری توشبووانی کۆرۆنا لە قوتابخانەکانی سلێمانی ئاشکرا دەکات

2021.03.01 - 14:37
App store icon Play store icon Play store icon
ناس کورد ئاماری توشبووانی کۆرۆنا لە قوتابخانەکانی سلێمانی ئاشکرا دەکات

ناس کورد-

بەپێی ئاماری هەردوو پەروەردەی ڕۆژهەڵات و ڕۆئاوای سلێمانی لە سەرجەم قوتابخانە و خوێندنگەکانی سنوری پارێزگاکە تاوەکو ئێستا 20 قوتابی و 6 مامۆستا وەکو توشبووی کۆرۆنا دیاریکراون و بەرێوەبەری پەروەردەی ئەو بەڕێوەبەرایەتییانەش داوای بەردەوامی پرۆسەی خوێندن دەکەن. 

کەناڵی ناس کورد لە تێلیگرام جۆین بکە   

 

تریفە محەمەد، بەڕیوەبەری پەروەردەی رۆژهەڵاتی سلێمانی لە لێدوانێکدا بۆ "ناس کورد" (1ی ئاداری 2021) ڕایگەیاند، "تاوەکو ئێستا ژمارەی توشبووانی کۆرۆنا لە قوتابخانە و خوێندنگەکانی سنوری پەروەردەی ڕۆژهەڵاتی سلێمانی نەگەیشتووەتە ئامارێکی مەترسیدار و بەپێی ئامارەکان لە سەرجەم سنوری پەروەردەکەماندا کە 92 هەزار خوێندکارمان هەیە 6 خوێندکار و تەنها یەک مامۆستا توشی پەتاکە بوون و ئەوانیش کەرەنتین کراون و لە ئێستادا دۆخی تەندروستییان جێگیرە."

 

لەبارەی بەردەوامی پرۆسەی خوێندن وتی، "پێمان باشە پرۆسەکە بەردەوامبێت، چونکە ئاماری توشبووانی کۆرۆنا لە قوتابخانە و خوێندنگەکان نەگەیشتووەتە حاڵەتێکی مەترسیدار".

 

لەلایەکی دیکەوە بەکر محەمەد، بەڕێوەبەری پەروەردەی ڕۆژئاوای سلێمانی (دووشەممە 1ی ئاداری 2021) لە لێدوانێکی ڕۆژنامەوانیدا ڕایگەیاند، "لە کۆی 152 هەزار خوێندکاری سەربە پەروەردەکەی ئێمە 14 حاڵەتی توشبوون بە کۆرۆنامان هەیە، هەروەها لەناو مامۆستایانیشدا نزیکەی پێنج مامۆستا توشی ڤایرۆسەکە بوون."  

 

بەپشتبەستن بەو ئامارانە دەردەکەوێت، لە 00.8%ی خوێندکارانی سلێمانی توشی کۆرۆنا بوون، بە دیاریکراویش لە هەردوو هەزار و 400 خوێندکارێک، یەک خوێندکار توشی کۆرۆنا بووە. 

 

وتیشی، "ئەو ژمارەیەی توشبوو لەنێو خوێندکاران و مامۆستایاندا ژمارەیەک نییە شایەنی باس بێت و وەک هەر شوێنێکی دیکەی کۆمەڵگە کە کراوەیە ئەگەری توشبوون لەنێو قوتابخانەکانیشدا هەیە، بەڵام بەشێوەیەک نییە کە لەدەست دەرچووبێت، بۆیە ئێمە ئومێد دەکەین دەرگای قوتابخانەکان دانەخرێن."  

 

ئاماژەی بەوەشکرد، "ئەگەر لیژنەی باڵای ڕووبەڕووبوونەوەی کۆرۆنا و وەزارەتی تەندروستیش بڕیاربدەن خوێندنگەکان دابخرێت، پێموایە بەشێویەکی کاتی دەبێت و ماوەیەکی کەم دەخایەنێت، کە ڕەنگە بۆ دوو هەفتەیەک بێت".  

 

سەبارەت بە پابەند نەبوون بە ڕێنماییەکانی خۆپارێزی، بەرێوەبەری پەروەردەی ڕۆژئاوا باسی لەوەکرد، "ئەوە دوو لایەنەیە، لە هەندێک خوێندنگەدا خوێندکاران ئەوەندە زۆرن، ناتوانین کەمی بکەینەوە بۆ ئەو ڕێژەیەی کە وەزارەتی تەندروستی دیاریکردووە".  

  

ئاماژەی بەوەشکرد، "بەشێکی دیکەشی پەیوەندی بە هۆشیاری تەندروستییەوە هەیە، کە بەداخەوە هۆشیارییەکی تەندروستیی ئەوتۆ لەنێو هاووڵاتیان و خوێندکاراندا نییە".  

  

بڕیارە ئەمڕۆ وەزارەتى تەندروستى و لیژنەى باڵاى بەرەنگاربوونەوەى کۆرۆنا لە هەرێم کۆبنەوە، بۆ تاوتوێکردنى دۆخى بڵاوبوونەوەى پەتاکە دواى هەڵکشانى دوبارەى ئامارەکان.    

 

دکتۆر ڕەهێڵ فەرەیدون، بریکاری وەزارەتی تەندروستیی حکومەتی هەرێمی کوردستان لە لێدوانێکدا بۆ "ناس کورد" پێش دەستپێکردنەوەی کۆبوونەوەی لیژنەی بالای ڕوبەڕوبوونەوەی کۆرۆنا (1ی ئاداری 2021) وتی، "لە کۆبوونەوەی ئەمڕۆی لیژنەی باڵای ڕوبەڕوبونەوەی کۆرۆنا هیچ پێشنیارێکمان لەبارەی داخستنی قوتابخانەو خوێندنگەکان نەکردووە بەڵکو جەخت لەسەر ڕێگری لەهاتوچۆی گەشتیاران دەکەینەوەو کە ئەمەش بەهۆی کاری بازرگانییەوە بەردەوامەو وەکو پێویست ڕێگری لێ نەکراوە".  

  

ئەوەشی وت، "وەکو وەزارەتی تەندروستی پێمان وایە ئەگەر هاتوچۆی گەشتیاران بەمجۆرە بەردەوامبێت دۆخەکە مەترسی لەسەر دەبێت و لە داهاتوودا قۆناغ بەقۆناغ ڕەنگە کەرەنتینەی گشتی لە هەرێمی کوردستان ڕابگەیەنرێتەوە".  

  

جەختی لەوەشکردەوە، لە کۆبوونەوەی ئەمڕۆی لیژنەی باڵای ڕوبەڕوبوونەوەی کۆرۆنا کە بڕیارە کاتژمێر 2:30 خولەک ئەنجامبدرێت پێشنیاری وەزارەتی تەندروستی جەختکردنەوەیە لە داخستنی دەروازەکان بە ڕووی گەشتیاران و هیچ شتێک لەبارەی داخستنی قوتابخانەو ڕاگەیاندنی کەرەنتین لەلایەن وەزارەتی تەندروستییەوە پێشنیاری نەکراوە لەم قۆناغەدا.