گه‌ڕان

Shadow Shadow
سیاسه‌تی

بەپەلە

لەسەر کەیسێکی دیکە شێروان شێروانی بردرایە بەردەم دادوەر

2021.02.28 - 11:33
App store icon Play store icon Play store icon
لەسەر کەیسێکی دیکە شێروان شێروانی بردرایە بەردەم دادوەر

 ناس کورد-

لەسەر سکاڵایەکی دیکە، ئەمڕۆ شێروان شێروانی بردرایە بەردەم دادوەری لێکۆڵینەوە و پارێزەرەکەشی دەڵێت، دەترسن لەوەی دادگای پێداچوونەوە سزای شەش ساڵەکە هەمواربکاتەوە و دەیانەوێت بەم سکاڵایە لە زیندان بیهێڵنەوە، ئاشکراشیکرد، لە بنکەی پۆلیسی خانەقا ئاسایش ڕێگرییان لێکردووە بچێتە ژوورەوە. 

کەناڵی ناس کورد لە تێلیگرام جۆین بکە   

 

بەشدار حەسەن، پارێزەری شێروان شێروانی (یەکشەممە 28ی شوباتی 2021) بە "ناس کورد"ی ڕاگەیاند، "ئەمڕۆ شێروان شێروانی بردرایە بنکەی پۆلیسی خانەقا بۆ ئیفادە لێوەرگرتن لەسەر سکاڵایەکی ئاسایشی هەولێر کە گوایە لە ڕۆژی دادگاییکردنەکەیدا شێروان شێروانی تەشهیری بە ئاسایش کردووە، لەکاتێکدا من خۆم لەوێ بووم هیچ شتێکی لەوشێوەیە ڕووی نەداوە."

 

وتیشی، "ڕاستییەکەی ئەوەیە کە دەترسن دادگای تەمیز سزای شەش ساڵ زیندانییەکە هەڵبوەشێنێتەوە و دەیانەوێت بەو کەیسە لە زیندان بیهێڵنەوە و سزاکەی زیاد بکەن."

 

ئەو پارێزەرە ئەوەشی ئاشکراکرد، "ئەمڕۆ شێروان شێروانی لە بنکەی پۆلیسی خانەقا لە هەولێر ئیفادەی لێوەرگیرا، بەڕێوەبەری بنکەکە ڕێگەیدا کە من بچمە ژوورەوە و لەگەڵی بم، بەڵام ئاسایش ڕێگرییان لێکردم و نەیانهێشت بچمە ژوورەوە، واتە لە بکەی پۆلیس ئاسایش حوکم دەکات."

 

پارێزەرەکەی شێروان شێروانی ئاماژەی بەوەشکرد، "لەدوای ئیفادە لێوەرگرتن، شێروان شێروانی بردرایە بەردەم دادوەری لێکۆڵینەوە و تاوەکو ئێستا دیارنییە چ بڕیارێک دراوە."