گه‌ڕان

Shadow Shadow
سیاسه‌تی

وردەکاریى

فڕۆکەخانەی نێودەوڵەتی سلێمانی هۆشداریدەدات لە بایکۆت و ڕاوەستانی گەشتەکان

2021.02.22 - 15:22
App store icon Play store icon Play store icon
فڕۆکەخانەی نێودەوڵەتی سلێمانی هۆشداریدەدات لە بایکۆت و ڕاوەستانی گەشتەکان

ناس کورد-

بەڕێوەبەری فڕۆکەخانەی نێودەوڵەتی سلێمانی نیگەرانی خۆی لە هاوکاری نەکردنی فڕۆکەخانەکە دەردەبڕێت و رایدەگەیەنێت "بەهۆی دواکەوتنی موچەی کارمەندانەوە هەڕەشەی بایکۆتکردن هەیە و بەوەش سەرجەم گەشتەکان ڕادەگیرێت".

 

کەناڵی ناس کورد لە تێلیگرام جۆین بکە   

 

تاهیر عەبدوڵا، بەڕێوەبەری فڕۆکەخانەی نێودەوڵەتی سلێمانی (22ی شوباتی 2021) لەمیانی کۆنگرەیەکی ڕۆژنامەوانیدا کە "ناس کورد" بنیەری بوو ڕایگەیاند، ماوەی 14 ساڵە فڕۆکەخانەی نێودەوڵەتی سلێمانی هەیە و تا ئێستاش هیچ کەسێک هاوکاری فڕۆکەخانەکەی نەکردووە و چەندینجاریش داوامانکردووە بەڵام هیچ هاوکارییەک نەکراوین، جگە لەوەش شەش مانگ جارێک تیمێکی پشکنین لە بەغداوە دێت تاوەکو بزانێت فڕۆکەخانە بەپێی یاسای فڕۆکەوانی عێراق کارەکانی دەکات، دوای بەدواداچوون دەستخۆشییان کردووە و ڕەخنەیان نەبووە بەوەش فڕۆکەخانەی نێودەوڵەتی سلێمانی پێشەنگی هەموو فڕۆکەخانەکانی عێراقە بەپێی ڕاپۆرتی تیمەکانی پشکنینی کۆمپانیاکان و دەسەڵاتی فڕۆکەوانی عێراق و تیمە ئەمەریکییەکان ئەوەش بە هاوکاری کارمەندانی فڕۆکەخانەکەیە.

 

باسی لەوەشکرد، ئێمە لەنێوان هەردوو حکومەتی هەریم و بەغدا تێدا ماوین نازانین کارەکان کێ بۆمان دەکات حکومەتی هەرێم کەمێک هاوکاریی مادیمان دەکات بەڵام شارەزاییان لە کاری فڕۆکەخانە نییە و وەکو پێویستیش بەدەنگمانەوە نایەن و حکومەتی عێراقیش هیچ هاوکارییەکی فرۆکەخانەکە ناکات.

 

بەڕێوەبەرى فڕۆکەخانەى نێودەوڵەتى سلێمانى رونیکردەوە "کارمەندانی فڕۆکەخانەی نێودەوڵەتی سلێمانی مووچەیان دوادەکەوێت و سەرجەم کاتەکانیش بەهۆی کارەوە لێرەن لە فڕۆکەخانە بەوەش گیرفانیان بەتاڵە و ناتوانن بەردەوام بن بەمجۆرە و داوای بایکۆتکردنی کارەکانیان کردووە کە ئەوەش دەبێتە هۆکاری ڕاگرتنی سەرجەم گەشتەکان.

 

نیگەرانی خۆشی دەربڕی بەوەی ژمارەیەک لە بەرپرسانی هەرێم و پەرلەمانتاران کاتێک لە فڕۆکەخانەوە گەشت دەکەن ئیهانەی کارمەندانی فڕۆکەخانەکە دەکەن کە ئەوەش نیگەرانی زۆری دروستکردووە، جگە لەوەش کەسانی وا دێنە بەشی VIPو دەیانەوێت لەوێوە گەشت بکەن بۆنی ڕیخیان لێدێت، لەکاتێکدا گەورەیی ئەوە نییە لە VIPیەوە گەشت بکەیت و ئەوبەشە تەنها بۆ سەرۆک وەزیران و جێگیری سەرۆک وەزیران و وەزیرو پارێزگارەکانە.

 

باسی لەوەشکرد، هێڵی نیشتمانیی یەک لە عێراق تاکە هێڵی نیشتمانییەو لە 2021ەوە چەندینجار داوامان کردووە هێڵی نیشتمانی ژمارە 2 لە هەرێمی کوردستان دابمەزرێت تاوەکو فڕۆکەخانەکانی هەرێمی کوردستان لە هەندێک کاردا سەربەخۆبن بەڵام هیچ وەڵامێکمان نەدراوەتەوە ئەگەر ئەوە بکرایە زۆر کارئاسانیمان بۆ دەکرا، بەڵام ئیستا هەرچی ئیلتزامات لە فرۆکەخانەکانی عێراقەوە دەردەچێت دەبێت پابەندی بین لەکاتێکدا ئەوان هیچ هاوکارییان نەکردووین و تاوەکو ئێستا 21 ملیار دۆلار قەرزارین. 

 

تاهیر عەبدوڵا، وتیشى "یاسای فڕۆکەوانی عێراق پێویستی بە هەموارکردنەوە هەیەو بۆ ئەوەش لە ساڵەکانی 2007، 2008و 2009 یەکێک بووم لە ئەندامانی نوسینەوەی یاسای فڕۆکەوانی عێراق بەڵام کاتێک پرۆژە یاساکە چووە پەرلەمانی عیراق دەنگی لەسەر نەدراو لە ئێستاشدا چەندین ماددە لە یاسای فڕۆکەوانی عێراق پێویستی بە هەموارکردنەوەیە بەڵام کاری لەسەر ناکرێت.

 

باسی لە گرفتێکی دیکەی فڕۆکەخانەی نێودەوڵەتی سلێمانی کرد بەوەی، پشتیوانی بلیتی فڕۆکەخانەکانی هەرێمی کوردستان ناکرێت و ئەوەی بەنمونە هێناوە لە زەمەنێکدا گەشتی فڕۆکە لە بەغداوە بۆ بەسرە 50 هەزار بووە بەهۆی ئەوەی وەزیری گواستنەوە پشتیوانی کردووە بەڵام بۆ سلێمانی 100 هەزار بووە جگە لەوەش جیاوازی لە نێوان گەشتی سلێمانی و هەولێر سلێمانی و نەجەف هەیە.

 

جەختیشى کردەوە "ئاسمانی عێراق دراوەتە کرێ بە کۆمپانیایەک رۆژانە 500 تاوەکو هەزار فڕۆکە بەسەر ئاسمانى عێراق و هەرێمی کوردستان دەڕوات کە هەموویان پێویستە پابەندبن بە پێدانی بڕە پارەیەک بەڵام ئەو پارەیە دەچێتە بانکێک لەدەرەوە و هیچ کەس نازانێت چی بەسەر دێت لەکاتێکدا هیچ بڕە پارەیەک لەو پارەیە بۆ هەرێمی کوردستان و فڕۆکەخانەکانی ناگەڕێتەوە، جگە لەوەش لە ئێستادا هەوڵ هەیە ئەرزی فڕۆکەخانەکان بدرێتە کۆمپانیاو بەوەش فرۆکەخانەکان بەتەواوی لەدەست عێراق نامێنێت".