گه‌ڕان

Shadow Shadow
سیاسه‌تی

زانیاری زیاتر

شێروان شێروانی پەیوەندی بە هاوسەرەکەیەوە کرد.. چی پێ وت؟

2021.02.20 - 19:44
App store icon Play store icon Play store icon
شێروان شێروانی پەیوەندی بە هاوسەرەکەیەوە کرد.. چی پێ وت؟

ناس کورد- هەڤاڵ فەتاح 

هاوسەری ڕۆژنامەنوسی زیندانیکراو شێروان شێروانی ڕایگەیاند، ئەمڕۆ لەگەڵ شێڕوانی هاوسەری بە تەلەفۆن قسەی کردووە، ئاماژەی بەوەشکرد، هاوسەرەکەی و هاوڕێەکانی لە ڕۆژی دادگاییکردنەکەیانەوە مانیان لە خواردن گرتووە، بەڵام پێی ڕاگەیاندووە کە تائێستا تەندروستی باشە.

کەناڵی ناس کورد لە تێلیگرام جۆین بکە   

 

ڕوگەش عزەدین، هاوسەری ڕۆژنامەنوس شێروان شێروانی (شەممە 20ی شوباتی 2021) لە لێدوانێکی تایبەتدا بۆ"ناس کورد" ڕایگەیاند، " ئەمڕۆ شێروان خۆی تەلەفۆنی بۆ کردین، ئێمە ناتوانین تەلەفۆن بۆ ئەو بکەین، پێی وتم خۆی و هاوڕێەکانی لە ڕۆژی دەرچوونی بڕیاری دادگاوە مانیان لە خواردن گرتووە".

 

وتیشی، هەواڵی تەندروستیی پرسیوە، وەک خۆی دەڵێت، تائێستا باشە، ئەو وتی، " دەنگم بە هەموو لایەک بگەیەنن کە من بێتاوانم."

 

هاوسەرەکەی شێروان شێروانی ئەوەشی وت، " لەلایەن پارێزەرەکەیەوە ئاگادارکراوینەتەوە کە بەم نزیکانە تێهەڵچوونەوە بۆ بڕیاری دادگا دەکرێت، هیوامان هەیە ئەنجامێکی باشی هەبێت".

 

لە( 7ی  تشرینی یەکەمی 2020 ) رۆژنامەنوس، شێروان شێروانی لە پارێزگای دهۆک  بەتۆمەتی "ئاڕاستەکردنی قسەى نەشیاو، تۆمەت دروستکردن و تێکدانى ئاشتیی کۆمەڵایەتى دەستگیرکرا".

 

بەشدار حەسەن، ئەندامی تیمی پارێزه‌رانی ده‌ستگیركراوانی بادینان (20ی شوباتی 2021) لە لێدوانێکدا بۆ "ناس کورد" وتی، "بەپێی سەرچاوەیەک لە زیندانەوە پێمان ڕاگەیەندراوە ڕەوشی ئەو پێنج ڕۆژنامەنوس و چالاکوانەی لەلایەن دادگای دووی کەتنی هەولێر بە شەش ساڵ زیندانی سزادران، لە زیندانی هەولێر لە خراپیدایە و لەبەرانبەر ئەو قسانەی کردوویانە سزای دەرونییان دەدەن، وەکو بە ئێمە وتراوە شوێنەکەیان زۆر ساردە و لە شوێنێکی زۆر خراپدا زیندانیان کردوون."  


باسی لەوەشکرد، هەرچەندە دڵنیا نەکراوینەتەوە لە مانگرتنیان، بەڵام دەوترێت بەهۆی خراپی ژیانیان و شوینەکەیان لە ئیستادا لە زیندان مانگرتنیان لە خواردن ڕاگەیاندووە.  


ئەوەشی ئاشکراکرد، بەهۆی ئەوەی بەڵگەکان لەبارەی تۆمەتبارکردنی ئەو چالاکوان و ڕۆژنامەنوسانە وەکو پێویست نییە و لە ڕۆژانی ڕابردووش چەندین لایەن و کەسەیاتی و کونسوڵی وڵاتان هاتوونەتە دەنگ لەسەریان و چاوەڕوان دەکرێت لەلایەن دادگای پێداچوونەوە ئەو دەستگیرکراوانە ئازاد بکرێن و بۆ ئەوەش لە ناوەڕاستی ئەم هەفتەیەدا پەڕوای تایبەت بە دەستگیرکراوان ئامادەدەکرێت و ڕەوانەی دادگای پێداچوونەوە دەکرێت."  


ڕۆژی 16ی شوباتی 2021، دادگای تاوانەکانی دووی هەولێر سزاى شەش ساڵ زیندانى بۆ هەریەکە لە شێروان شێروانی، شڤان سەعید، گوهدار زێباری، هاریوان عیسا و ئەیاز کەرەم دەرکرد.  



ئەو بڕیارە کاردانەوەى بەرفراوانى لێکەوتەوە کە تا ئێستاش بەردەوامە.  

  

ڕۆژی پێنجشەممە نێچیرڤان بارزانی، سەرۆکی هەریمی کوردستان ڕایگەیاند، بڕیاری دادگا بۆ سزادانی چەند ڕاگیراوێک نيگه‌رانى دروست کردووە، بەڵام ئەوە دوا بڕیار نییە.  

  

وتيشى بەپێی یاسا، مافى سزادراوانه‌ تانە لە بڕیاره‌كە بده‌ن، دادگای پێداچوونەوەش ئەرکیەتی بە پشتبەستن و ڕێزگرتن لە یاسا و مافەکانی مرۆڤ و مافی یاسایيی سکاڵالێکراو و سکاڵاکار، بە کەیسه‌كه‌دا بچێتەوە تا هەمووان هەست بکەن وەک یەک مافيان پارێزراوە.  

 

ڕۆژی 19ی شوباتی 2021 ئۆفیسی راگەیاندنی نێردەی ویلایەتە یەکگرتووەکانی ئەمریکا لە باڵیۆزخانەى ئەو وڵاتە لە هەولێر لەسەر سزادانى دەستگیرکراوانى بادینان هاتە دەنگ و رایگەیاند، دەربارەی پرسی ئازادیی ڕادەربڕین و لەو نێوەندەشدا ئازادی بۆ ڕاگەیاندکاران بەردەوام لە پەیوەندیدا بووە لەگەڵ بەرپرسانی حکومەتی هەرێم.  

  

ئۆفیسەکە لە راگەیەنراوێکدا کە وێنەیەکى دەست "ناس کورد" کەوتووە ئاماژەى بەوەکردووە، کۆمەڵگا دیموکراتیەکان ڕێز لە ئازادیی ڕادەربڕین دەگرن و پشتیوانی لە توانای ڕاگەیاندکاران دەکەن بۆ ئەنجامدانی کارەکانیان بە بێ ترس لە تۆڵە لێسەندنەوه.  

  

لاى خۆیەوە، مەسرور بارزانى سەرۆکى حکومەتى هەرێم داواى رێزگرتنی کرد لە سیستەمى دادوەرى، لەیەکەم هەڵوێستیدا دواى سەرهەڵدانى ناڕەزایی بەرفراوان لەسەر بڕیارى سزادانى دەستگیرکراوانى بادینان لەلایەن دادگاوە.