گه‌ڕان

Shadow Shadow
سیاسه‌تی

کۆرۆنای گۆڕاو گەیشتە هەرێمی کوردستان

2021.02.20 - 13:24
App store icon Play store icon Play store icon
کۆرۆنای گۆڕاو گەیشتە هەرێمی کوردستان

ناس کورد-

وەزارەتی تەندروستیی هەرێم ئاشکرای کرد، "لە ئێستادا پێنج حاڵەتی گومانلێکراوی ڤایرۆسی نوێی کۆڕۆنا هەیە، بە ئامێری تایبەت دڵنیا دەکرێتەوە و ڕایدەگەیەنین کەوا جۆری نوێی ڤایرۆسی کۆڕۆنا لە هەرێمی کوردستان بوونی هەیە."

کەناڵی ناس کورد لە تێلیگرام جۆین بکە   

 

ئاسۆ حەوێزی، وتەبێژی وەزارەتی تەندروستیی هەرێم لە ڕوونکردنەوەیەکدا کە کۆپییەکی دەستی "ناس کورد" کەوتووە (20ی شوباتی 2021) دەڵێت، "سەبارەت بە زنجیرەی نوێی ڤایرۆسی کۆڕۆنا، هەموو پێداویستیەکانی دەستنیشانکردن لە ئامێری تایبەتمەند و تێستی تایبەت بەم ڤایرۆسە دابینکراوە."

 

دەشڵێت، "تا ئێستا لە ڕووی خۆپارێزی و پڕۆتۆکۆلی چارەسەری هیچ جیاوازی نیە لەگەڵ ڤایرۆسی کۆڕۆنا COVID19 بەڵام بە هەستیاریەوە چاودێری ئەم ڤایرۆسە دەکەین."

 

ئاسۆ حەوێزی جەخت دەکاتەوە کە "لە ئێستادا پێنج حالەتی گومانلێکراوی ڤایرۆسی نوێی کۆڕۆنا هەیە، بە ئامێری تایبەت دڵنیادەکرێتەوە و رایدەگەیەنین کەوا جۆری نوێی ڤایرۆسی کۆڕۆنا لە هەرێمی کوردستان بوونی هەیە."

 

ڕوونیشیکردەوە کە "وەزیری تەندروستی، تەندروستی پارێزگا و ئیدارەکانی ڕاسپاردووە بۆ ئامادەکاری تەواو بۆ پشکنین لە بازگەکان و تێستکردنی زنجیرەی نوێی ڤایرۆسی کۆڕۆنا هاوشێوەی فڕۆکەخانەکان و بەدواداچوونی بەرکەوتەکانیان و رووپێوكردنیان و هەماهەنگی کردن لەنێوان تاقیگەکانی تەندروستی گشتی لە پارێزگاکان بۆ ئاڵوگۆڕی شێوازی کارکردن و دەستنیشانکردن و هاوکاری کردن لە پێداویستیەکان."

 

سەباح هەورامی، بەڕێوەبەری تەندروستیی سلێمانی ڕایگەیاند، بەپێی توێژینەوەکان، سەرەتای مانگی ئازار کاتی سەرهەڵدانەوەى ڤایرۆسەکانەوە و "پێشبینی دەکرێت لەو کاتەدا دۆخەکە خراپتر دەبێت و شەپۆلێکی تر ڕوو لە ناوچەکە بکات."  

 

ئەمرۆ شەممە، 20ی شوباتی 2021، سەباح هەورامی لە کۆنگرەیەکی ڕۆژنامەوانیدا کە "ناس کورد" ئامادەی بوو ڕایگەیاند، "بە دڵنیاییەوە شەپۆلێکی نوێی کۆرۆنا ڕوو لە ناوچەکە دەکات بەڵام ئێمە گەشبینین کە شەپۆلەکە زۆر قورس نابێت، چونکە ئێمە ئەزمونمان وەرگرتووە و بەشێکی زۆری خەڵکیش پێشتر توشی بووە و بەرگریی لە دژی ڤایرۆسەکە دروست کردووە."  

  

سەباح هەورامی جەختی کردەوە کە "پێویستە هاوڵاتیان سەرجەم ڕێکارەکانی خۆپارێزی پەیڕو بکەن بۆ کەمکردنەوەى توندی شەپۆلەکە، بەڵام جارێکی تر کەرەنتینەی گشتی ناگەڕێتەوە بۆ سلێمانی."  

  

لەبارەى خوێندن و دەوامی قوتابخانەکان، سەباح هەورامی جەختی کردەوە کە هێشتا دۆخەکە ئارامە و لەژێر کۆنتڕۆڵدایە، "تاوەکو ئێستا ئاماری مەترسیدار لە قوتابخانەکان تۆمار نەکراوە، بۆیە پێویست ناکات دەوام ڕابگیرێت بەڵام دەبێت پابەندی ڕێکارەکان ببن، ئەو حاڵەتانەى لە قوتابخانەکان دەستنیشان کراون زۆر کەمن."  

  

بەڕێوەبەری تەندروستیی سلێمانی ڕایگەیاند، "لە ماوەیەکی نزیکدا ڤاکسینی دژە کۆرۆنا دەگاتە عێراق و هەرێمی کوردستان، بەوەش تاوەکو کۆتایی ساڵ کۆتایی دێت بە بابەتی کۆرۆنا و بە شێوەیەکی باش بنەبڕ دەکرێت."  

  

لەبارەى هاتنی گەشتیاری ناوەڕاست و باشوری عێراقەوە، سەباح هەورامی وتی، "ئێمە پلان و کاری خۆمان زۆر بە باشی بەڕێوەدەبەین بۆ ڕێگریکردن لە بڵاوبوونەوەى زیاتری ڤایرۆسەکە، بەڵام پێویستە ڕێگری لە هاتنی گەشتیارەکان بکرێت چونکە بەشێک لە حاڵەتە نوێیەکانی کۆرۆنا لەناو گەشتیاراندا تۆمار دەکرێت."   

  

وتیشی، "جگە لە پشکنینەکەی، پێمان وانییە کۆرۆنای گۆڕاو جیاوازییەکی زۆری هەبێت لەگەڵ کۆرۆنای پیشتر، بۆ ئەوەش بیرمان لەوەکردووە لەهاتنی ئەم شەپۆلەی کۆرۆنا لەگەڵ ڕێکخراوی تەندروستیی جیهانی قسەمان کردووە تاوەکو دۆسیەی تەندروستی سلێمانی بدەینە ئەوان و ئێمە تەنها هاوکارییان دەکەین."  

  

سەباح هەورامی جەختی لەوەشکردەوە، لە ئیستادا نەخۆشخانەکانی تایبەت بە کۆرۆنا لە سلێمانی نەخۆشی زۆری تێدا نییە و هەتاوەکو نەخۆشخانەکانیش چۆڵ بن ڕێکار ناگیرێتەبەر، هەرکات نەخۆشخانەکان پڕ بوون ئاوکات ڕێککارەکان توند دەکرێنەوە.