گه‌ڕان

Shadow Shadow
سیاسه‌تی

وردەکاری بخوێنەوە

عامری لە فایلەکانی ویکیلیکسدا.. فارسی نازانێت و لەگەڵ ئەمریکییەکان هاوهەڵوێستە

2021.02.16 - 23:27
App store icon Play store icon Play store icon
عامری لە فایلەکانی ویکیلیکسدا.. فارسی نازانێت و لەگەڵ ئەمریکییەکان هاوهەڵوێستە

ناس کورد-

چەندین بەڵگەى پێگەى ویکیلیکس باس لە هادى عامرى، سەرۆکى هاوپەیمانى فەتح دەکات و دەڵێت، سەرەڕاى ئەوەى پیاوى سەرەکى ئێرانیەکانە لە عێڕاق دیوێکى تریشى هەیە، ئەویش پەیوەندییەکانیەتى لەگەڵ بەرپرسانى ئەمریکا و بونى باوەڕ بە مافەکانى مرۆڤ، لەو دیوەیدا هاوپەیمانى ئێران نییە.

کەناڵی ناس کورد لە تێلیگرام جۆین بکە   

 

محەمەد ڕیاز، نوسەر و ڕۆژنامەنوس لە وتارێکیدا (16ى شوباتى 2021) سەبارەت بە بەڵگەکانى پێگەى ویکیلیکس لەسەر هادى عامرى کە "ناس کورد" بەدواداچونى بۆ کردوە نوسیویەتى، 160 بەڵگە لەسەر عامرى هەیە و لە بەشێکى لەو بەڵگانەدا وێنەیەکى جیاواز لەوەى ئێستاى ناوبراو هەیە، پیشانى دەدات کە لەگەڵ ئەمریکیەکاندا کۆدەبێتەوە و بڕواى بە دیموکراتى و مافەکانى مرۆڤ و دەستور هەیە و هاوپەیمانى ئێران نییە.



ڕونیشیکردووەتەوە، لە بەڵگەیەکدا کە بۆ 3ى نیسانى 2008 دەگەڕێتەوە عامرى لەگەڵ ڕایان کرۆکەر، باڵیۆزى ئەمریکا لە عێراق کۆبووەتەوە و وتویەتى، پرۆسە سەربازیەکەى پارێزگاى بەسرە سەرکەوتوە بووە و گروپە تایبەتەکانى سوپاى مەهدى نورى مالکى سەرۆک وەزیرانى ئەو کاتەى عێراقیان ناچار کردوە کە ئەو پرۆسەیە لە بەسرە ئەنجام بدات.

 

لە وتارەکەدا باس لەوەکراوە، عامرى باسى وردەکارى پرۆسەکەى لەگەڵ بەرپرسانى عێراقیدا کردوە و داوایان لە ئێران کردوە فشار بخاتە سەر موقتەدا سەدر بۆ کشانەوەى هێزەکانى لە بەسرە، عامرى ئەوەشى بە کرۆکەر وتووە کە تووشى سەرسوڕمان بوون کاتێک بینیویانە ئێرانیەکانیش بەهەمان زمانى سەدریەکان قسە دەکەن و چەکیان داونەتێ.

 

بەپێى بەڵگەیەکى تر کە بۆ 8ى تشرینى یەکەمى 2005 دەگەڕێتەوە، عامرى لەگەڵ جەیمس یلین، ڕاوێژکارى ئەمریکى لە وەزارەتى ناوخۆى عێراق کۆبوەتەوە و ناوبراو هۆشدارى داوەتە عامرى لە هەر پرۆسەیەکى چەکدارى لە عێراق  و ئەویش ڕەتیکردوەتەوە ڕێکخراوى بەدر هیچ چالاکییەکى سەربازى هەبێت و داواشى لە یلین کردوە خۆى سەرکردایەتى بەدر بگرێتە دەست بۆ ئەوەى سەرپەرشتى تێکەڵکردنەوەى لەگەڵ دەزگا ئەمنیەکانى عێراق بکات، بەڵام ئەو بەرپرسە ئەمریکیە ڕەتیکردوەتەوە و وتویەتى سیاسەتى ئەمریکا تێکەڵکردنى هێزى چەکدار وەک گروپە ڕەتدەکاتەوە و تەنها ئەندامەکانیان وەردەگیردرێن.

 

نوسەرەکە دەڵێت، لە بەڵگەنامەیەکى تردا کە مێژوەکەى بۆ 5ى تشرینى دووەمى 2006 دەگەڕێتەوە، عامرى لەگەڵ جۆن هانا، ڕاوێژکارى ئاسایشى و ڕیچارد چینى، جێگرى سەرۆکى ئەمریکا کۆبووەتەوە و سوپاسى کردوون بۆ ڕزگارکردنى عێراق و دیموکراتیەت، هەروەها ڕەتیشیکردوەتەوە ڕێکخراوى بەدر هیچ پەیوەندیەکى نەگونجاوى لەگەڵ هەواڵگرى ئێرانیدا هەبێت و لە هیچ پرۆسەیەکى چەکداریشدا تێوەگلابن.

 

بەپێى بەڵگەنامەکان عامرى لەگەڵ چەندین جەنراڵ و بەرپرسى ترى ئەمریکى کۆبوەتەوە و لە سەرجەمیاندا پشتگیرى خۆى بۆ دیموکراتى و مافى مرۆڤ دوپاتکردوەتەوە و ڕەتیشیکردوەتەوە پەیوەندیان لەگەڵ ئێران هەبێت، هەروەها وتویەتى ماوەى 20 ساڵ لە ئێران ژیاوە بەڵام زمانى فارسى فێر نەبووە چونکە ئەو عەرەبە، نوسەر پێى وایە "ئەگەر ئەوە ڕاست بێت، ئەوە لەبەر نیشتمان پەروەرییەکەى نییە بەڵکو بەهۆى گەمژەییەتی".