گه‌ڕان

Shadow Shadow
سیاسه‌تی

بەغدا زانیاری نوێ لەسەر هێرشەکەى سەر هەولێر ئاشکرا دەکات

2021.02.16 - 22:19
App store icon Play store icon Play store icon
بەغدا زانیاری نوێ لەسەر هێرشەکەى سەر هەولێر ئاشکرا دەکات

ناس کورد-

یەحیا ڕەسوڵ، وتەبێژی فەرماندەی گشتیی هێزە چەکدارەکانی عێراق ڕایگەیاند، ئەو موشەکانەى شەوی ڕابردوو لە هەولێر کەوتنەخوارەوە لە ناوخۆی هەرێمی کوردستانەوە تەقێنراون.

کەناڵی ناس کورد لە تێلیگرام جۆین بکە   

 

یەحیا ڕەسوڵ لە میانی بەشداری لە بەرنامەیەکی تەلەفزیۆنی فەرمی عێراقییە کە "ناس کورد" بەدواداچوونی بۆ کردووە (16ی شوباتی 2021) دەڵێت، "ژمارەی ئەو موشەکانە لە هێرشەکەی هەولێردا بەکارهێنران 11 موشەک بوون، موشەکەکان لە دوو شوێنەوە لە ناو سنوری هەرێمی کوردستانەوە ئاڕاستەکراون."

 

باسی لەوەشکردووە، "چوار لە موشەکەکان لەناو حەرەمی فڕۆکەخانەی هەولێردا کەوتوونەتەوە، هەندێکی تریش لە ناوچەی نیشتەجیبوونی هەولێردا کەوتوونەتەخوارەوە."

 

وتیشی، "ئەو موشەکانەی کەوتوونەتەوە تەنها پێنج کیلۆمەتر لە ناوەندی هەولێرەوە دور بوون، بۆیە پێویستە دامەزراوە ئەمنییەکانی هەرێم پێداچوونەوەیەکی ورد بە درزە ئەمنییەکاندا بکەن."

 

وتەبێژی فەرماندەی گشتیی هێزە چەکدارەکانی عێراق جەختی کردەوە کە مستەفا کازمی، فەرماندەی هێزە چەکدارەکانی عێراق فەرمانی کردووە بە هاوبەشی لەگەڵ هەرێمی کوردستان و هاوپەیمانی نێودەوڵەتی دژی داعش لێکۆڵینەوە لە هێرشەکە بکرێت."

 

 

هاوکات ئەو گروپەی کە ناوی خۆیان ناوە "سرایا أولیاء الدم" و بەرپرسیارێتی هێرشە موشەکییەکەی شەوی ڕابردووی هەولێریان لە ئەستۆگرت ڕاگەیەنراوێکی بڵاوکردەوە و تێیدا دەڵێت، "ویستمان بە هەندێک لە سیاسییەکانی کوردی بڵێین کە ڕێگای هەڵەتان گرتووە و ئەگەر ڕاستی نەکەنەوە، ئەوە ئێمە بەو موشەکانە ڕاستتان دەکەینەوە کە لە هەرێمی کوردستان و بە تایبەت لە هەولێر خەزنمان کردوون."  

 

گروپەکە لە ڕاگەیەنراوێکدا کە کۆپییەکی دەستی "ناس کورد" کەوتووە و لەژێر ناوی "المقاومة الاسلامية في العراق" دەڵێت، "داگیرکەری ئەمریکا سەلامەت و سەقامیر نابێت تەنانەت ئەگەر بنکە سەربازییەکانیشیان ناو حکومەتێکی بەکرێگیراو."  

  

دەشڵێت، "ئێوە ئەى سەرکردە کوردەکان پێشوازیتان لە سوپاى داگیرکەری تورکیا کردوە و تائێستاش دەیکەن لە عێراق، مەسعود بارزانى عەرابى یەکەمى داگیرکارى تورکیا و هاتنە ناو خاکى عێراقى خۆشەویستە."
  

هەروەها جەخت دەکەنەوە کە "سەرجەم هاوڵاتیانی و سەربازیی گەلى کورد برا و خۆشەویستمانن، جگە لە بنکە سەربازییەکانی داگیرکەری ئەمریکا و تورکى و ئیسرائیلى هیچ شتێکى تر ناکەینە ئامانج."  

  

ئەو گروپە کە هێشتا ناسنامەی تەواوی دیار نییە دەڵێت، "ئێمە بە کوچە و کۆڵانەکانى هەولێرى خۆشەویستدا دەگەڕێین و لە خانو و هۆتێلەکانیدا نیشتەجێین و بیر لە ئازاردانى کەس ناکەینەوە، لێرەوە خەڵکەکەمان و براکانمان لە هێزە ئەمنیەکان ئاگادار دەکەینەوە کە لە بنکە و بارەگاکانى داگیرکارى ئەمریکا و تورکى و ئیسرائیلى دوربکەونەوە."  

  

باسیان لەوەش کردووە کە "هەوڵى بێبەهاکردن و بچوککردنەوەى هێرشەکانمان خوییەکی میدیای دوژمنە کە پێى ڕاهاتووین، لە ڕاستیدا گەورە ئەفسەران و سەبازانى ئەمریکى لە هێرشەکەدا کوژراون، تەلار و کۆگا و فڕۆکەى داگیرکەر سوتاون و بوون بە خۆڵەمێش و هەندێکیان تا چەندین کاتژمێر بەردەوام تەقیونەتەوە."  

  

گروپی "سرایا اولیاء الدم" دەشڵێت، "جۆرى موشەکەکان و چۆنێتى تەقاندنیان داگیرکارى ترساندووە بەجۆرێک شوێنى تەقاندنەکەیان بۆ نەدۆزرایەوە تا ئەو کاتەى "سرايا اولياء الدم" بە بەیاننامەکەى پێشتر وردەکارى هێڕشەکە و شوێنەکەى ئاشکرا کرد."  

  

لە کۆتاییدا جەختیان لەوەکردووەتەوە کە "فڕۆکەخانەى نێودەوڵەتى هەولێر هەمیشە پارێزراو دەبێت و هەرگیز نایکەینە ئامانج، ئەگەر ئەوەمان بویستایە ئەوا زۆر ئاسانتر دەبوو."