گه‌ڕان

Shadow Shadow
سیاسه‌تی

بافڵ تاڵەبانی لەبارەى هێرشەکانی هەولێر: ھەموو ھەوڵێک دەدەین

2021.02.15 - 23:41
App store icon Play store icon Play store icon
بافڵ تاڵەبانی لەبارەى هێرشەکانی هەولێر: ھەموو ھەوڵێک دەدەین

ناس کورد-

بافڵ تاڵەبانی، هاوسەرۆکی یەکێتیی نیشتمانیی کوردستان پەیامێکی لەبارەى هێرشەکانی ئەمشەوی سەر هەولێر بڵاوکردەوە و دەڵێت، "ھەموو ھەوڵێک دەدەین بۆ رووبەڕووبوونەوەی ھەر گروپ و تاقمێک کە ئاسایشی ھەرێم بخەنە مەترسییەوە".

کەناڵی ناس کورد لە تێلیگرام جۆین بکە   

 

بافڵ تاڵەبانی لە پەیامێکدا کە کۆپییەکی دەست "ناس کورد" کەوتووە دەڵێت، " ئیدانەی ھەر پیلانێک دەکەین کە مەرامی تێکدانی ئارامی ھەرێمی کوردستانی لەپشتەوە بێت و ھەموو ھەوڵێک دەدەین بۆ رووبەڕووبوونەوەی ھەر گروپ و تاقمێک کە ئاسایشی ھەرێم بخەنە مەترسییەوە. بە هیچ شێوەیەکیش رێگەنادەین ئاسایش و ئارامی کۆمەڵانی خەڵک تێکبدرێت."

 

دەشڵێت، "ئەو ھێرشانەی کرایە سەر شاری ھەولێر مایەی نیگەرانیمانە، ھیوای زوو چاکبوونەوە بۆ برینداران دەخوازین و دڵنیام بە یەکڕیزی و یەک ئیرادەیی ھێزە ئەمنییەکانمان دەتوانین باشتر رووبەڕووی ئاڵنگارییە ئەمنییەکان ببینەوە و ژیانێکی باشتر و ئارامتر بۆ ھەمووان فەراھەم بکەین."

 

هاوکات لاهور شێخ جەنگی، هاوسەرۆکی یەکێتیی نیشتمانیی کوردستان ڕایگەیاند، "بە توندی ئیدانەی ئەو هێرشەکانە دەکەم کە کرایە سەر هەولێر و داوا لە هێزە ئەمنییەکان دەکەم لێکۆڵینەوەی ورد بکەن و تاوانباران بدۆزنەوە."

me_ga.php?id=2593

وەزارەتی ناوخۆی حکومەتی هەرێمی کوردستان ڕاگەیەنراوێکی لەبارەى هێرشە موشەکییەکەى ئەمشەوی سەر هەولێر بڵاوکردەوە و دەڵێت، "بەداواچوون و لێکۆڵینەوەی ورد لە لایەن دامودەزگا ئەمنییەکانەوە دەستی پێکردووە."  

  

لە ڕاگەیەنراوێکدا وەزارەتەکە دەڵیت، "کاتژمێر 9:30 ئەمشەو (15ی شوباتی 2021) چەند موشەکێک ئاڕاستەی شاری هەولێر و دەوربەری كران و بەر چەند شوێنێک کەوتن."  

  

دەشڵیت، "لە ئەنجامدا و بە پێی زانیارییە سەرەتاییەکان چەند کەسێک برینداربوون. بەداواچون و لێکۆڵینەوەی ورد لە لایەن دامودەزگا ئەمنییەکانەوە دەستی پێکردووە."  


داواش "لە هاووڵاتییانی خۆشەویستی شاری هەولێر دەکەین لەو شوێنانە دووربکەنەوە و لە ماڵەکانیان بمێننەوە تا دواتر زانیاری زیاتر بڵاودەکەینەوە."  

  

سەرچاوەیەک لە ئاسایشى هەولێر رایگەیاند، لە هێرشەکەى سەر هەولێر ئەوەى یەکلا بووەتەوە سێ بۆ چوار موشەک بووە کە یەکێکیان بارەگاى هێزەکانى ناتۆى لەناو فڕۆکەخانە کردووەتە ئامانج.  

  

سەرچاوەکە کە نەویست ناوى بهێنرێت بە "ناس کورد" ى راگەیاند، موشەکەکان کەوتونەتە مەیدانى ئاژەڵان، گەڕەکى بەختیارى لە نزیک شوقەکانى زەکەریا، لەناو فڕۆکەخانە لە نزیک بارەگاى هێزەکانى ناتۆ.    

  

وتیشى دەوترێت موشەکێک تێپەڕبووە بەسەر فڕۆکەخانە بەهۆى ئەوەى سیستەمى دژە موشەکى ئەمریکى وەڵامیداوەتەوە، بەڵام ئەوە هێشتا یەکلانەبووەتەوە.    

  

بەهۆى کەوتنەخوارەوەى موشەکەکانەوە دوو کەس برینداربوون و رەوانەى نەخۆشخانە کراون.    

  

ئەمە دووەم هێرشى موشەکییە بۆ سەر هەولێر لەماوەى کەمتر لە شەش مانگدا.    


هێرشەکەى پێشوو لە 30 ئەیلولى 2020دا بوو کە سێ موشەک لە نزیک بارەگای دیموکرات لە گردەچاڵی هەولێر و سێ موشەکیش لە نزیک هێزی هاوپەیمانان لە فڕۆکەخانەی نێودەوڵەتیی هەولێر کەوتنەخوارەوە و هەرێم حەشدى شەعبى بە ئەنجامدانى تۆمەتبارکرد.