گه‌ڕان

Shadow Shadow
سیاسه‌تی

زانیاری و وردەکاری

نوێترین هەڵسەنگاندنى لیژنەى پەروەردە لەبارەى پڕۆسەى خوێندن لە هەرێم

2021.02.15 - 20:33
App store icon Play store icon Play store icon
نوێترین هەڵسەنگاندنى لیژنەى پەروەردە لەبارەى پڕۆسەى خوێندن لە هەرێم

ناس کورد-

لیژنەی پەروەردەی پەرلەمانی کوردستان جەخت دەکاتەوە لە ئێستادا مەترسی لەسەر پرۆسەی خوێندن نییە و پڕۆسەکە لەناو پۆل بەردەوام دەبێت.

 

کەناڵی ناس کورد لە تێلیگرام جۆین بکە   

 

ئەمڕۆ دوشەممە لیژنەی پەروەردەی پەرلەمانی کوردستان کۆبووەوە بەمەبەستى هەڵسەنگاندنی دۆخی تەندروستی لە قوتابخانەکان کە تێیدا ڕاپۆرتی تایبەت بە رەوشى خوێندن لە پارێزگاکان و مەترسی بڵاوبوونەوەى کۆرۆنا تاوتوێکرا.

 

موسلیم عەبدوڵڵا، جێگری سەرۆکی لیژنەکە (15ی شوباتی 2021) بۆ "ناس کورد" وتى "بەپێی راپۆرتەکان ژمارەیەک کەم توشبووی کۆرۆنا تۆمار کراون ئەوانیش بەپێی ڕێنماییەکان ڕەوانەی ماڵەوە کراونەتەوە تاوەکو تێپەڕاندنی ڤایرۆسەکە".

 

وتیشی، "بەپێی بەدواداچوون و گفتوگۆکانی ئەمڕۆی لیژنەی پەروەردەی پەرلەمانی کوردستان لە ئیستادا مەترسیی لەسەر قوتابخانەکان نییە و پرۆسەی خویندن بەردەوامدەبێت".

 

موسلیم عەبدوڵڵا باسى لەوەشکرد، ڕۆژی 21ی ئەم مانگە وەزارەتی تەندروستی و لایەنە پەیوەندیدارەکانی دیکە کۆبوونەوەیەک دەکەن و تییدا هەڵسەنگاندن بۆ دەستپێکردنەوەی پرۆسەی خوێندن دەکرێت، لە ڕۆژی 23ی شوباتیش لە کۆبوونەوەی لیژنەی باڵای ڕوبەڕوبونەوەی کۆرۆنا ئەنجامی هەڵسەنگاندنەکە کاری پێدەکرێت کە پرۆسەی خوێندن بەردەوام بێت یاخود نا.

 

پێشتر دکتۆر ڕەهیڵ فەرەیدون، بریکاری وەزارەتی تەندروستی حکومەتی هەرێمی کوردستان (15ی شوباتی 2021) لە لێدوانێکدا بۆ "ناس کورد" ڕایگەیاند، لە دوای بڵاوبوونەوەی ڤایرۆسی کۆرۆنای گۆڕاو لە پارێزگاکانی عێراق ئامادەکاری دەکەن بۆ ڕێکاری پێویست و لە ڕۆژانی داهاتووش وەکو وەزارەتی تەندروستی کۆدەبنەوە و بڕیاری پێویست دەدەن لەبارەی ڕێکارەکان.  

 

وتیشی "لەماوەی ڕابردوو چەند حالەتێکی گوماناوی کۆرۆنای گۆڕاو لەهەرێمی کوردستانیش هەبووە بەڵام تاوەکو ئێستا کیتی پشکنین لەبەردەستمان نییە تاوەکو بزانین ئایا ئەوە کۆرۆنای گۆڕاوە یاخود جۆرەکەی پێشترە".

 

سەبارەت بە ئەگەری بڵاوبوونەوەی کۆرۆنای گۆڕاو و راگرتنى دەوامى قوتابخانەکان و سەرلەنوێ کەرەنتینەکردن، بریکاری وەزارەتی تەندروستی ئاشکرای کرد، لە ئەگەری بڵاوبوونەوەی کۆرۆنای گۆڕاو یاخود هەڵکشانی کۆرۆنای پێشتریش کۆبوونەوەیان دەبێت و بڕیاری پێویست دەدەن.