گه‌ڕان

Shadow Shadow
سیاسه‌تی

زانیاری زیاتر

دادگایی دەستگیرکراوانی بادینان دواخرا.. دادوەرەکە نەخۆشە

2021.02.14 - 10:49
App store icon Play store icon Play store icon
دادگایی دەستگیرکراوانی بادینان دواخرا.. دادوەرەکە نەخۆشە

ناس کورد-

ئەگەرچی بڕیاربوو سبەینێ دووشەممە دادگایی کردنی بەشێک لە دەستگیرکراوانی بادینان بەڕێوەبچێت، بەڵام بەهۆی نەخۆشکەوتنی دادوەرەکەوە دادگاییەکەی دواخراوە و کەسوکاریشیان دەڵێن، ناوێرن هیچ قسەیەک لە میدیاکانەوە بکەن.

کەناڵی ناس کورد لە تێلیگرام جۆین بکە   

 

کەناڵی ناس کورد لە تێلیگرام جۆین بکە

 

بڕیاربوو سبەینێ دووشەممە 15ی شوباتی 2021، حەوت کەس لە دەستگیرکراوانی سنوری بادینان و هەولێر بەتۆمەتی "تێکدانی ئاسایشی نیشتیمانی" لەدادگای تاوانی 2ی هەولێر دادگایی بکرێن.

 

هەرێم ڕەفعەت، پارێزەری گۆهدار زێباری، یەکێک لە دەستگیرکراوەکان (یەکشەممە 14ی شوباتی 2021) بە "ناس کورد"ی ڕاگەیاند، "ئەمڕۆ چوومە دادگا بۆ بەدواداچوونی کەیسەکە، بەڵام دادگاییەکە دوادەخرێت، ئەوەش بەهۆی ئەوەی دادوەرەکە نەخۆشە و ئەم هەفتەیە ناچێتە دادگا."

 

وتیشی، "تاوەکو ئێستا نازانین دادگاییەکە بۆ کەی دوادەخرێت، سبەینێ ئەوە یەکلایی دەبێتەوە و وادەیەکی نوێ دیاردەکرێت."

 

پێشتر پارێزەری یەکێکی دیکە لە دەستگیرکراوەکان بە "ناس کورد"ی وت، ئەو حەوت کەسە کەیسەکانیان جیاکراوەتەوە، چونکە پێنج کەسیان دانپێدانیان هەیە و "ئیعترافیان" کردووە، بەڵام دوو کەسیان دانپێدانانیان نییە و ئەوان کەیسەکەیان جیایە.

 

بەوتەی ئەو پارێزەرە کە بەهۆی هەستیاری دۆخەکەوە نەیویست ناوی ئاشکرابکرێت، "پێنج کەسەکە کە پێکەوە دادگایی دەکرێن دانیانپێدانیان کردووە، بەڵام تاوەکو ئێستا نازانین دانیان بە چیدا ناوە، لەگەڵ ئەوەشدا دیارنییە ئاخۆ لەژێر فشار و ئەشکەنجەدا دانپێدانیان لێوەرگیراوە یاخود نا، دوو کەسەکەی دیکەش دانیان بە هیچ شتێکدا نەناوە." 

 

لەوبارەیەوە هەرێم ڕەفعەت ئاماژەی بەوەکرد، زۆرینەی دەستگیرکراوان ئیفادەیان لێوەرگیراوە و دانپێدانیان هەیە، بەڵام ئەوە دادگا یەکلایی دەکاتەوە کە ئەو کەسانە تاوانبارن یاخود نا.

 

ناس کورد زانیویەتی، یەکێک لە دوو کەسەکەی دیکە کە دانیان بە هیچ شتێکدا نەناوە، مامۆستا بەدەل بەروارییە و کەسی دووەمیش گۆهدار زێبارییە.  

 

ناس کورد پەیوەندیکرد بە کەسوکار و پارێزەری چەند دەستگیرکراوێکەوە، بەڵام ئەوان ئامادە نەبوون بە ئاشکرا لێدوان بدەن و ڕایانگەیاند، "کە دەترسن لێدوان بدەن و کەیسی کەسوکاریان قورستر بێت، بۆیە لەئێستادا بێدەنگی هەڵدەبژێرن.

 

ماوەی شەش مانگە لە سنوری بادینان ژمارەیەک چالاکوان و ڕۆژنامەنوس و خۆپیشاندەر دەستگیرکراون کە ژمارەیان 76 کەسە و تاوەکو ئێستا دادگایی نەکراون و چارەنوسیان نادیارە.