گه‌ڕان

Shadow Shadow
سیاسه‌تی

زانیاری زیاتر

هۆشداری لە هەڵگیرسانی ’’شەڕێکی گەورە’’ لە هەرێمی کوردستان دەدرێت

2021.02.12 - 09:38
App store icon Play store icon Play store icon
هۆشداری لە هەڵگیرسانی ’’شەڕێکی گەورە’’ لە هەرێمی کوردستان دەدرێت

 ناس کورد-

هاوسەرۆکی دەستەی بەڕێوەبەری کەجەکە ڕایگەیاند، تورکیا بۆ ئەوەى ڕەوایی بە هێرشەکانی خۆی بدات، رۆڵێکی گەورەی لە بابەتی پاکتاوکردنی پەکەکەدا بە پارتی دیموکراتی کوردستان داوە، هۆشداریشدا لە ئەگەری ڕوودانی شەڕێکی گەورە لە هەرێمی کوردستان لەماوەیەکی نزیکدا.

کەناڵی ناس کورد لە تێلیگرام جۆین بکە   

 

کەناڵی ناس کورد لە تێلیگرام جۆین بکە

 

جەمیل بایک هاوسەرۆکی دەستەی بەڕێوەبەری کەجەکە، وڵامی پرسیارەکانی ماڵپەری مەدیانیوزی دایەوە. بایک باسی لە چوونی وەزیری بەرگری تورک بۆ عێراق کرد و رایگەیاند، سەردانێکی سەربازی بوو. بایک ئاماژەی بەوەدا کە جگە لە رۆژهەڵاتی کوردستان، ئامانجی هێرشەکان داگیرکەری هەموو پارچەکانی کوردستانە و گۆتی، "لە ماوەیەکی نزیکدا، پێدەچێت لە باشوری کوردستان، لەدژی دەوڵەتی تورک و هاوکارەکەی پەدەکە، شەڕێکی گەورە رووبدات."

 

جەمیل بایک هاوسەرۆکی دەستەی بەڕێوەبەری کەجەکە بە میدیای فەرمیی پەکەکەی ڕایگەیاند، "وەزیری بەرگریی تورکیا کە لەماوەی ڕابردوو لەگەڵ شاندێکی میت سەردانی هەرێمی کوردستانی کرد وەک ئەوەی لە شاندەکەدا دیارە، سەردانێکی سەربازی بوو، لە لێدوانەکانی دوای سەردانەکەشدا دەرکەوت کە بابەتی سەرەکی سەردانەکە، تەسفیەکردنی پەکەکەیە."

 

ئاماژەی بەوەشکردووە، " گەشەدانەکانی دەرەوەی باکوری کوردستان، تورکیا دەترسێنێت و لەلایەکی دیکەوە لەبەرئەوەی ئەو هەرێمانە وەک سنوری نەتەوەیی خۆی دەبینێت، مەرجەکانی جەنگی سێیەمی جیهانی، وەک هەلێک دەقۆزێتەوە و دەیەوێت جگە لە رۆژهەڵاتی کوردستان هەموو پارچەکانی کوردستان داگیر بکات، داگیرکەری سەر عەفرین، سەرێکانی، گرێ سپی و رۆژئاوا، پلانی داگیرکەری لەسەر باشوری کوردستان کە شەنگال، مەخمور، موسڵ و کەرکوکی لەناودایە، بەپێی ئەم بناغەیە دەکرێت، سەردانەکەش بەم ئامانجە کراوە و نایشارنەوە."

 

باسی لەوەشکردووە، "بەم شێوەیە دەیانەوێت، پەکەکە کە لەبەردەم سیاسەتی لەناوبردن و تواندنەوە ئاستەنگە، تەسفیە و پاکتاو بکەن و تا لە دەستیان دێت، باشوری کوردستان داگیر دەکەن.

 

بایک باسی لەوەشکردووە، " دەوڵەتی تورک بۆ ئەوەى رەوایی بە هێرشەکانی خۆی بدات، رۆڵێکی گەورەی لە بابەتی پاکتاوکردنی پەکەکەدا بە پارتی دیموکراتی کوردستان داوە، پارتیش ئەوە نیشان دەدات، کە ئەو رۆڵە گەورەیەی لە ئەستۆ گرتووە، بە قسەى خۆیان دەیانەوێت ئەو شوێنانەى داگیریان کردوون بەرفراوانیان بکەن، هەر خۆی ئەوە دیارە، ئەگەر ئێمە بڵێین، لە مێژوویەکی نزیکدا لە باشوور لەگەڵ کۆماری تورکیا و پارتی دیموکراتی کوردستان کە هاوکاریی دەوڵەتی تورک دەکات، شەڕێکی گەورە روودەدات، بە هەڵەدا نەچووین."

 

هاوسەرۆکی دەستەی بەڕێوەبەری کەجەکە ئاماژەی بەوەشکردووە، "ئەو عەقڵییەتە پاکتاوکارەی ڕژێمی ئەردۆگان نە ریفۆرمی پێدەکرێت و نە دەستوورێکی بنەڕەتیی دیموکراتیکیش ئامادە دەکات، دەسەڵاتێک کە لە دەرەوەیى خۆی هەموو کەس بە تیرۆریست و دوژمن دەزانێت و پاکتاویان دەکات، کۆمەڵگە پارچە پارچە دەکات، جیاکاری دەکات، لە تورکیا و لە دەرەوە جگە لە فرمێسک، ئێش و زوڵم هیچی نییە و هیچی پێناکرێت، بۆ ئەوەش دەبێت گۆڕانکارییەک رووبدات و ئەوەى دەبێت بگۆڕدرێت ئەو دەسەڵاتە فاشیستییە، کە لە پێش هەموو شتێکەوە بۆ کوردان و تورکیا و هەموو گەلان بووەتە مەترسی، دەبێت ئەو دەسەڵاتە فاشیستە پاکتاوکەرە بڕوات."

 

لە بەرامبەر تۆمەتبارکردنی پارتیش بە هاوکاریکردنی تورکیا، لە ڕوونکردنەوەیەکدا مەحمود محەمەد، وتەبێژی پارتی دیموکراتی کوردستان (پێنجشەممە 11ی شوباتی 2021) ڕایگەیاند، "لەبارەی گرژی و پێكدادانی نێوان چەكدارانی پەكەكە و سوپای توركیا، دیسان كەجەكە لە بەیاننامەیەکیدا کەوتووەتە بڵاوكردنەوەی قسەی بێ بنەما و تۆمەتبەخشینەوە لە دژی پارتی دیموكراتی كوردستان."  

  

ئاماژەی بەوەشکردووە، "وێڕای ڕەتكردنەوەی ئەو قسە و تۆمەتە بێ بنەمایانە، جەخت لەوە دەكەینەوە كە پارتی هیچ پەیوەندیی بە ناكۆكی و گرژییەكانی نێوان ئەو دوولایەنەوە نییە، لە ڕاستیدا، ئەوە پەكەكەیە كە دەستی سوپای توركیای ڕاكێشاوەتە ناو هەرێم و ئاڵۆزی و تێكدان و ناسەقامگیری بۆ هەرێم گواستووەتەوە، كە پەكەكە شەڕی توركیای لەناو خاكی توركیادا نەكردووە و بەردەوام لە هەڵاتندایە و خەڵكی تر بە دوای خۆیدا ڕادەكێشێت، پارتی چ تاوانێكی كردووە؟ ."  

  

وتەبێژی پارتی ئەوەشی خستووەتەڕوو، "دووپاتی دەكەینەوە كە پارتی پەیوەندیی بەم شەڕانەوە نییە و هیچ ڕێگەشی لە پەکەکە نەگرتووە كە شەڕ بكات یان نا، کە شەڕیان پێ ناکرێ و هەر لە هەڵاتندان هیچ خەتای پارتی نییە و با واز لەو تۆمەتە بێ بنەمایانە بهێنن، پەکەکە خۆی باش دەزانێ کە ئەگەر پارتی بە ڕاستی دەستی لەو شەڕانەدا هەبووایە، پەکەکە لە دۆخێکی خراپتردا دەبوو."  

  

ئاماژەی بەوەشکردووە، "پێمان وایە باشترین چارەسەری بۆ ئەو ناسەقامگیرییە ئەوەیە كە پەكەكە بەڵای خۆی لە كۆڵی هەرێمی كوردستان بكاتەوە و چیتر نەبێتە هۆی ناسەقامگیری و تێكدانی ژیانی هاووڵاتیانی هەرێم."  

  

بەرەبەیانى (چوارشەممە 10ی شوباتی 2021) سوپاى تورکیا بۆردومانى چیاى گارەى سەر بەپارێزگاى دهۆکى کرد و دواتر لە ڕێگەى هەلیکۆپتەرەوە هێزى دابەزاند و شەڕ و پێکدادان لەنێوان ئەو هێزە و گەریلاکانى پەکەکە سەریهەڵدا.