گه‌ڕان

Shadow Shadow
سیاسه‌تی

بەپەلە و تایبەت

دیوێکى دیکەى شەڕەکەى تاسڵوجە؛ پێش ڕووداوەکە چی روویدا؟

2021.02.11 - 16:01
App store icon Play store icon Play store icon
دیوێکى دیکەى شەڕەکەى تاسڵوجە؛ پێش ڕووداوەکە چی روویدا؟

ناس کورد-

 

قایمقامى چەمچەماڵ و بەڕێوەبەرى ناحیەى تەکیە دوا ساتەکانى پێش شەڕەکەى بازگەى تاسڵوجە ئاشکرادەکەن، کە بەهۆیەوە ئاسایشێک کوژرا و پێنجى دیکەش برینداربوون.

 

کەناڵی ناس کورد لە تێلیگرام جۆین بکە   

 

رووداوەکە نیوەڕۆى دوێنێ چوارشەممە روویدا، لەنێوان هێزێکى کۆماندۆى سەر بە شێخ جەعفەر مستەفا جێگرى سەرۆکى هەرێم و هێزەکانى ئاسایشى بازگەى تاسڵوجە.

 

لەگەڵ روودانى رووداوەکەدا ناوى چەند بەرپرسێک هێنرا، لەناویاندا بەڕێوەبەرى ناحیەى تەکیە کە لەکاتى رووداوەکەدا بەڕێگاوە بووە بەرەو سلێمانى بەمەبەستى پیرۆزبایی لە دەستبەکاربوونى جێگرى پارێزگارى سلێمانى.

 

رەمەک رەمەزان قایمقامى چەمچەماڵ کە لەرووى ئیدارییەوە تەکیە سەر بەچەمچەماڵە (11ى شوباتى 2021) بە "ناس کورد" ى راگەیاند، دوێنێ بەرێوەبەرى ناحیەى تەکیە لەکاتى دەوامى فەرمیدا بەرەو پارێزگاى سلێمانى چووە بۆ پیرۆزبایی لە جێگرى پارێزگار و تاوتوێکردنى کێشەى ئاوى خواردنەوە.

 

وتیشى "لەرێگا ئۆتۆمبێلێک چەند جارێک پێشیکەوتووە و دواى کەوتووە، ئەویش گومانى لێکردووە، بۆ ئەوەى توشى گرفت نەبێت پەیوەندى بە بازگەى تاسڵوجەوە کردووە کە لێکۆڵینەوە بکەن لەوەى هۆکارى ئەوە چییە".

 

رەمەک رەمەزان باسى لەوەشکرد، لە بازگەکە بەهۆى لێکتێنەگەیشتنى هێزەکانى ئاسایش و پیشمەرگە ئەو کارەساتە دروستبوو، کە هیچ پەیوەندییەکى بەبەڕێوەبەرى ناحیەکەوە نییە.

 

"ئێمە لەڕێگا هەرکەسێکمان توشى گرفت بین، نزیکترین بازگەى هێزە ئەمنییەکان ئاگاداردەکەینەوە، ئەوەى بەڕێوەبەرى ناحیە کردویەتى شکاتکردن نەبووە و تەنها داوایکردووە لێکۆڵینەوە بکەن"، رەمەک رەمەزان وایوت.

 

دەشڵێت "بەڕێوەبەرى ناحیەى تەکیە نە تۆمەتبارە نە سکاڵاکارە، بەڵکو دەتوانرێت تەنها وەک شاهیدێک بانگبکرێت. بریکارى وەزیرى ناوخۆش ئاگادارە لەو پرسە و ئەمڕۆ لەگەڵ ئاسایشى سلێمانى کۆبوونەوەیان کردووە".

 

ناس کورد پەیوەندى بە مەمەند رەشید بەڕێوەبەرى ناحیەى تەکیەوە کرد، بەڵام تەنها ئەوەندەى وت کە پرسەکە لە وەزارەتى ناوخۆیە و ئەو هیچ سکاڵایەکى نییە لەو بارەیەوە.

 

ناس کورد پەیوەندى چەتۆ ساڵح بریکارى وەزیرى ناوخۆوە کرد، بەڵام وەڵامى پەیوەندییەکانى نەدایەوە.