گه‌ڕان

Shadow Shadow
سیاسه‌تی

کەشناسی لەبارەی مەترسیی وشکەساڵی: لە هەندێ ناوچە لەساڵی ڕابردوو زیاتر باران باریوە

2021.01.30 - 22:19
App store icon Play store icon Play store icon
کەشناسی لەبارەی مەترسیی وشکەساڵی: لە هەندێ ناوچە لەساڵی ڕابردوو زیاتر باران باریوە

ناس کورد- هەڤاڵ فەتاح

ئەگەرچی لەسەرەتای وەرزی بارانبارینی ئەمساڵەوە، باس لە مەترسییەکانی وشکەساڵی دەکرا، بەڵام بەڕێوەبەری کەشناسیی سلێمانی دەڵێت، بەراورد بە ساڵی ڕابردوو ڕێژەی بارانبارین لە چەند شوێن و ناوچەیەکی سنورەکەدا زیاتر بووە، دەشڵیت، لە 85%ی بارانبارین لە هەرێمی کوردستان هێشتا ماوە، بۆیە جارێ زووە پێشبینی حاڵەتی وشکە ساڵی بکەن.

کەناڵی ناس کورد لە تێلیگرام جۆین بکە   

 

ئاسۆ کەمال، بەڕێوەبەری فەرمانگەی کەشناسی و بومەلەرزەزانیی سلێمانی ( 30ی کانوونی دووەمی 2020) لە لێدوانێکی تایبەتدا بە "ناس کورد"ی ڕاگەیاند، "جارێ زووە پێشبینی وشکە ساڵی بکەین، چونکە لە 85%ی دابارین لە هەرێمی کوردستان بەگشتی و سنوری پارێزگای سلێمانی ماوە کە لە 50% دەکەوێتە وەرزی زستانەوە کە تائێستا بەتەواوەتی نەهاتووە و لە 35% ی دەکەوێتە وەرزی بەهارەوە ئەوەش لە مانگەکانی ئادار و نیسانی داهاتوودایە".

 

وتیشی، "بەراورد بە ساڵی ڕابردوو ڕێژەی بارانبارین لە ناوچەکانی چوارتا، قەراغ، پێنجوێن و ناو شاری سلێمانی زۆر زیاتر بووە، بەجۆرێک تەنها لە سنوریی ناحیەی چوارتا 54 ملیم باران باریوە و لە سنوری ناوچەی  قەراغ 50 ملیم باران باریوە  و بەهەمان شێوە لە پێنجوین وسلێمانییش هەر بەو ڕێژە بووە".

 

ئاسو کەمال، ئەوەشی خستەڕوو، " لە سنوریی پارێزگای سلێمانی تائێستا 298 ملیم باران باریوە، ئەوە لە کاتێکدایە کە بە هەموو ماوەی وەرزی بارانبارینی ڕابردوو تەنها 300 ملیم باران باریبوو، بارانبارینی ئەمساڵ بەراورد بە ساڵی 2017 – 2018 جیاوازییەکی زۆری هەیە لەو ساڵدا لە سنوریی پارێزگای سلێمانی 400 ملیم باران باریبوو، ئەوەش ئەوە دەگەیەنێت کە ڕێژەی بارانبارینی ئەمساڵ زۆر زیاترە ".

 

بەوتەی بەڕێوەبەر کەشناسی و بومەلەرزەزانیی سلێمانی، "سروشت و شێوازی دابەشکردنی دابارین لە ساڵێکەوە بۆ ساڵێکی دیکە جیاوازە، بۆیە ناتوانین لە ئێستادا هیچ پێشبینییەکی وشکە ساڵی بکەین، لە ناوەڕاست و کۆتایی مانگی ئاداردا دەتوانرێت پێشبینی بۆ ئەو دیاردەیە بکرێت، ئەوەش کاتێک داتاکان بەراورد بە ساڵانی ڕابردووکەمتردەبن".

 

ڕوونیشیکردەوە، " بارانبارینی ئەم دوو ڕۆژەی ڕابردوو، ناوچەکانی گەرمیانی بوژاندووەتەوە و کاریگەری باشی هەبووە بۆ سەرناوچە کشتوکاڵییەکانی مەیدان، کەلار و کفری".