گه‌ڕان

Shadow Shadow
سیاسه‌تی

لەبارەی دابەشكردنی شوققە

ئاوەدانكردنەوە لەبارەی ’’بەخشین و داگیركردن’’ی شوقە ڕوونكردنەوەیەكی بڵاوكردەوە

2021.01.20 - 17:07
App store icon Play store icon Play store icon
ئاوەدانكردنەوە لەبارەی ’’بەخشین و داگیركردن’’ی شوقە ڕوونكردنەوەیەكی بڵاوكردەوە

وەزارەتی ئاوەدانكردنەوە وەڵامی پەرلەمانتاری یەكێتی دایەوە كە پاش بڵاوكردنەوەی بەڵگەیەک باسی لەوەكردبوو، دانا عەبدولکەریم، وەزیری ئاوەدانکردنەوە و نیشتەجێکردن "بەدەر لە یاسا و ڕێنمایەکان چەندین شوقەی دابەشکردووە" و ئەوەش ئاشكرا دەكات كە 9 یەكەی نیشتەجێبوون "داگیركراون". 

 

کەناڵی ناس کورد لە تێلیگرام جۆین بکە   

 

لە ڕوونكردنەوەكەدا كە وێنەی دراوەتە "ناس كورد" ئەمڕۆ (20 كانونی دووەمی 2021) وەزارەتی ئاوەدانكردنەوەی هەرێم  لەبارەی دابەشكردنی شوقەكانی كەندەكەوەی سلێمانی ڕوونكردنەوەیەكی بڵاوكردەوە.

 

لەڕوونكردنەوەكەدا هاتووە، شوقەکانی کەندەکەوە کە پێکهاتوە لە (564) یەکە، لە کۆتایی ساڵی (2013)ەوە تەواوکراون و لە ساڵی (2014)دا دابەشکراون، لە سەرەتای ساڵی (2015)شدا گرێبەست بۆ سودمەندبوان کراوە بەپێی ریزبەندی خاڵ و رێنماییەکانی وەزارەت.

 

هەروەها جەخت لەوە كراوەتەوە "لەو یەکانە تەنها دو شوقەی چۆڵ هەبون، یەکێکیان دراوە بە خێزانێکی کەمدەرامەت و شایستە کە خێزانێکی سێ کەسی بون و لە سێ خوشکی بێ لانە پێکهاتبون، لەڕێی ئەنجومەنی پارێزگاوە داواکەیان بەرزکراوەتەوەو دواتر رەزامەندی لەسەر دراوە. ئەوەی دیکەش بەهەمان شێوە لەچوارچێوەی یاساو رێنماییەکان دراوە بە خێزانێکی کەمدەرامەت و شایستە، کە ئەو دو خێزانە هەمان رێنماییە کارپێکراوەکان دەیانگرێتەوە".

 

وەزارەتی ئاوەدانكردنەوە باسی لەوەش كردووە، ئەم رێکارەش کە لەلایەن وەزیری ئاوەدانکردنەوەو نیشتەجێکردن جێبەجێکراوە، کە دەسەڵاتەکەی پاڵپشتە بە رێنمایی ژمارە (1)ی ساڵی (2012) و یاسای ژمارە (16)ی ساڵی (2011) یاسای یەکەمی هەموارکردنی یاسای ژمارە (7)ی ساڵی (2008)ت یاسای دابینکردنی یەکەی نیشتەجێبون بۆ هاوڵاتیان لە هەرێمی کوردستان-عێراق.

 

لە ڕوونكردنەوەی وەزارەتدا ئەوەش هاتووە "لەئێستادا نۆ (9) یەکە لە شوقەکانی کەندەکەوە داگیرکراوە کە کاتی خۆی دراوە بە ژمارەیەک هاوڵاتی کە خانویان هەبوەو شایستە نەبون، بەڵام دوای چەندین جار ئاگادارکردنەوەی لایەنە پەیوەندیدارەکان لەلایەن بەڕێوەبەرایەتی ئاوەدانکردنەوەی سلێمانی، بەڵام تائێستا چۆڵیان نەکردوە".

 

 

سەلما فاتیح لە پەیامێکیدا لە فەیسبوکی خۆی کە "ناس کورد" بەدواداچوونی بۆ کردووە، داوا لە سەرۆکى حکومەت و جێگرەکەی دەکات لە پێناو دادپەروەری کۆمەڵایەتی، بڕیارێکی وەزیری ئاوەدانکردنەوە ڕابگرن. 

 

دەشڵێت، "سەدان خێزان بە هیوا و ئومێدێکی گەورەوە لە ساڵی 2013 فۆڕمی نیشتەجێبوونیان پڕکردوەتەوە و بەهیوان لە کرێچێتی ڕزگاریان بێت، بەڵام جەنابی وەزیری ئاوادانکردنەوە بەدەر لە یاسا و ڕێنمایەکان چەندین شوقەی دابەشکردوە لە شوقەکانی کەنەکەوە بەبێ وردبینی و بەبێ فۆڕم لەبری ناوەی یەدەگەکان."  

  

سەلما فاتیح نوسراوێکی بڵاوکردووەتەوە کە 14ی کانونی یەکەمی 2020 دەرچووە و واژۆی دانا عەبدولکەریمی لەسەرە کە لە پشکی بزوتنەوەى گۆڕان وەزیری ئاوەدانکردنەوەیە و ڕەزامەندی داوە بە پێدانی یەکەیەکی نیشتەجێبوون بە کەسیک.  

  

ئەو پەرلەمانتارەى یەکێتی دەشڵێت، "ئەم بریارە پرە لە ناعەدالەتی، بۆیە تکایە ئەم بڕیارە ڕابگرن، ئێمەش هەموو ڕێکارێکی یاسایی دەگرینە بەر بۆ ڕیگرتن لەم گەندەڵی و ناعەدالەتیە لە پێناو بەرژەوەندی گشتی."