گه‌ڕان

Shadow Shadow
سیاسه‌تی

’’مادام لە سلێمانییەوە کێشە نییە’’

سەرکردایەتییەکی پارتی قسەى جیاواز لەسەر هەڵگرتنی پارێزبەندی لە دوو پەرلەمانتارەکەى گۆڕان دەکات

2021.01.13 - 16:15
سەرکردایەتییەکی پارتی قسەى جیاواز لەسەر هەڵگرتنی پارێزبەندی لە دوو پەرلەمانتارەکەى گۆڕان دەکات

ناس کورد-

ئەندامێکی سەرکردایەتی پارتی دەڵێت، کاتێک هەولی لابردنی پارێزبەندی لەسەر سۆران عومەر، پەرلەمانتاری کۆمەڵی ئیسلامی درا داوای "پسپۆڕانی کەمپین و خۆپیشاندان لە سلێمانی" داوای بایکۆتی پەرلەمانیان کرد، بەڵام کاتێک لە سلێمانییەوە داوای هەڵگرتنی پارێزبەندی لە دوو پەرلەمانتاری گۆڕان کرا" هیچ کەسێک قسە ناکات.

 

عەلی عەونی، ئەندامی سەرکردایەتی پارتی لە بابەتێکدا لە فەیسبوکی خۆی کە "ناس کورد" بەدواداچوونی بۆ کردووە دەڵێت، "پسپۆڕانی کەمپین و بەزم و ڕەزمی خۆپیشاندان و مانگرتن لە شاری سلێمانی و تەپڵ لێدەرەکان دەنێرنە ناو پەرلەمانی کوردستان و دەڵێن، ئەگەر دوو کۆترباز لە هەولێر بوو بە شەڕیان، پێویستە کەمپەینی (کوا کۆترەکەم) ڕێک بخەین."

 

دەشڵێت، "ئەو کەسانە دەڵێن ئەگەر مامۆستایەک لە هەولێر زلـلەیەکی بەرکەوت پێویستە پۆستەری بۆ چاک بکرێت و کەمپەینی (بۆچی لێم دەدەی) ساز بکەن."

 

عەلی عەونی دەشڵێت، ئەو کەسانە دەیانەوێت "ئەگەر داواکرا پارێزبەندی لە پەرلەمانتارێکی کۆمەڵ هەڵبگیرێت، مادام پەیوەندی بە هەولێرەوە هەیە دەبێت بایکۆتی پەرلەمان بکرێت، بەڵام ئەگەر لە سلێمانی لەقە لە پشتی کادیر پارتی درا، بارەگاکانی پارتی سوتان و تاڵان کران، ئەوە شتێکی ئاساییە و پێویست ناکات خۆتی بۆ تێک بدەیت."

 

باسی لەوەشکردووە، "ئەگەر لە سلێمانی داوا کرا پارێزبەندی لەسەر دوو پەرلەمانتاری گۆڕان هەڵبگیرێت، مادام داواکە لەلایەن دەسەڵاتدارانی سلێمانییەوەیە، پێویست بە قسە و تەپڵ لێدان و بتڵ هاوێشتن و بایکۆت ناکات."

 

هەردوو پەرلەمانتار عەلى حەمە ساڵح  دابان محەمەد داوا لە سەرۆکایەتى پەرلەمان دەکەن پارێزبەندیان لەسەر هەڵبگرێت، بۆ ئەوەى بتوانن بچنە بەردەم دادگا لەسەر ئەو سکاڵایەى لەسەریان تۆمارکراوە.  

  

هەردوو پەرلەمانتارەکە لە نوسراوێکدا (12ی کانونی دووەمی 2021)  کە ئاڕاستەى سەرۆکایەتى پەرلەمانیان کردووە و وێنەیەکى دەست "ناس کورد" کەوتووە، جەختیانکردووەتەوە کە هەڵگرتنى پارێزبەندى لەدەسەڵاتى سەرۆکایەتى پەرلەماندایە و پێویستى بە دانیشتنى پەرلەمان نییە.  

  

داواشدەکەن پارێزبەندییان لەسەر هەڵبگیرێت و دادگاش بەزوترین کات دانیشتنى دادگاییکردن رێکبخات، تا بەڵگەکانیان لەبارەى قاچاخچێتى بخەنەڕوو.  

  

  

دوێنێ عەلی حەمە ساڵح و دابان محەمەد پەرلەمانتارانى فراکسیۆنى گۆڕان ڕایانگەیاند، لەسەر سکاڵای کۆمەڵگەی نێودەوڵەتیی باشماخ، دادگای لێکۆڵینەوەی پێنجوێن داوای لابردنی پارێزبەندی لەسەر کردوون.    

  

سەرچاوەیەکی بەرپرس لە سەرۆکایەتی پەرلەمانی کوردستان کە نەیویست ناوەکەی ئاشکرا بکرێت لە لێدوانێکدا بۆ "ناس کورد" (11ی کانونی دووەمی 2021)  وتی، "وەکو سەرۆکایەتی پەرلەمان لە کاتی داواکاری بۆ هەڵگرتنی پارێزبەندی لە پەرلەمانتارێک پێشتر ڕاویژی لەگەڵ دەکەین کە ئایا خۆی ڕەزامەندە لەسەر لابردنی پارێز بەندییەکە یاخود نا".    

  

وتیشى، "زۆرکات پەرلەمانتاران لە پەیجەکان و لێدوانەکانیاندا بێمنەتی خۆیان دەردەبڕن بەوەی بچنە بەردەم دادگا، بەڵام ئێمە پرسیان پێدەکەین ئەگەر ڕەزامەندیدا لەوەی بچیتە بەردەم دادگا ئەوکات پارێز بەندی لەسەر لادەبرێت".    

  

بەپێی ماددەى 24ى پەیڕەوى ناوخۆى پەرلەمانى کوردستان، ئەندامى پەرلەمان لەرۆژى سوێندخواردنییەوە پارێزبەندى هەیە و نابێت راوەدو بنرێت و دەستگیربکرێت و ماڵەکەى بپشکنرێت، بەبێ مۆڵەتى پەرلەمان، تەنها لەحاڵەتێکدا نەبێت کە تاوانى بینراوى ئەنجام دابێت.    

  

هەر بەپێی ئەو ماددەیە، هەڵگرتنى مافى پارێزبەندى پێویستى بە دەنگى زۆرینەى ئامادەبووانى دانیشتنى پەرلەمانە و لەدەرەوەى وەرزى یاسادانانیش بڕیار لەدەست دەستەى سەرۆکایەتیدایە.    

  

سەرچاوەکەى سەرۆکایەتى پەرلەمان وتى، "لە ئێستادا کە لە پشوودان، دەسەڵات لە دەستی سەرۆکایەتی پەرلەمانە بۆ لابردنی پارێز بەندی و پێویستی بە دەنگی پەرلەمانتاران نییە، خۆ ئەگەر ئەو پەرلەمانتارە ڕەزامەند نەبوو بەلابردنی پارێزبەندییەکەی بەوەی دادگا سەربەخۆ نییە یاخود مەترسی هەبێت، ئەوکات ئێمە بەنوسراو وەڵامی دادگا دەدەینەوە بەوەی پارێزبەندییەکە هەڵناگرین لەسەر پەرلەمانتارەکە".    

  

سەرچاوەکە نیگەرانی دەربڕی کە نوسراوەکە دراوەتە ئەو دوو پەرلەمانتارە تا بۆچوونیان وەربگرن بەوەی ڕەزامەندن یاخود نا، بەڵام پێش ئەوەی وەڵامی سەرۆکایەتی پەرلەمان بدەنەوە نوسراوەکەیان لە تۆڕەکۆمەڵایەتییەکان بڵاوکردووەتەوە.    

  

لەم خولەى پەرلەمانى کوردستاندا تەنها پارێزبەندى لەیەک پەرلەمانتار وەرگیراوە، کە سۆران عومەر پەرلەمانتارى کۆمەڵ بوو، ئەوەش لەسەر بنەماى سکاڵایەک کە مەسرور بارزانى سەرۆکى حکومەت لەسەرى تۆمارکردبوو.    

  

تا ئێستا دیار نییە پەرلەمانى کوردستان بڕیارى چیدەدات لەبارەى هەڵگرتنى پارێزبەندى لەسەر عەلى حەمەساڵح و دابان محەمەد، لەکاتێکدا هەردوکیان بێمنەتى خۆیان نیشانداوە و دەڵێن ئامادەن بچنە بەردەم دادگا.    

  

بەڵام سەرچاوەکە دەڵێت، "ئێمە کار بەنوسراوی پەیجەکانیان ناکەین و داوامان کردووە خۆیان وەڵاممان بدەنەوە و تا ئێستا هیچ وەڵامێکیان نەداوینەتەوە، بەڵام نەدەبوو ئەو نوسراوەیان بڵاوبکردایەتەوە پێش ئەوەی وەڵامی ئێمە بدەنەوە".    

  

رونیشیکردەوە، "ئێمە سەرۆکی فراکسیۆنەکەمان ئاگادار کردووەتەوەو ئەوانیش لە ڕێگەی سەرۆکی فراکسیۆنی گۆڕانەوە داوای نوسراوەکەیان کردووەو پێش ئەوەی وەڵاممان بدەنەوە چوون نوسراوەکەیان بڵاو کردووەتەوە".