گه‌ڕان

Shadow Shadow
سیاسه‌تی

ناوەڕاستى ئەمساڵ

چوار هۆکار ’’نەوت دەگەیەننە نرخێکى بەرز’’

2021.01.11 - 23:31
چوار هۆکار ’’نەوت دەگەیەننە نرخێکى بەرز’’

ناس کورد-

 

دامەزارە جهانییەکانی تایبەت بە وزە پێشبینی دەکەن بەهۆی دۆزینەوەی ڤاكسینی كۆرۆنا‌ و كەمكردنەوەی بەرهەمهێنانی نەوت لەلایەن سعودیە‌ و باشبوونی ئابوریی وڵاتانی جیهان و گەیشتنی دیموکراتەکان بە دەسەڵات لەئەمەریکا، لە ناوەڕاستی ئەمساڵدا بەهای بەرمیلێک نەوت نزیکبێتەوە لە 65 دۆلار.

 

بەگوێرەی پێشبینییەکانی دامەزارەی" گۆڵدن ساکس"(11ی کانوونی دووەمی 2021) کە "ناس کورد"بەدواداچوونی بۆکردووە، "نرخی بەرمیلێک نەوت لەبازارەکانی جیهاندا لەهاوینی ئەمساڵ دەگاتە 65 دۆلار".

کەناڵی ناس کورد لە تێلیگرام جۆین بکە

ئاماژە بەوەشکراوە، لەدواین کۆبوونەوەی وڵاتانی (ئۆپیك+) کە هەفتەی ڕابردوو بەڕێوە چوو، بڕیاردرا لەمانگی شوبات‌ و ئاداری داهاتوودا بەرهەمهێنانی نەوت تەنها 75 هەزار بەرمیلی رۆژانە زیاد بكەن، هاوكات سعودیە بەشێوەیەكی خۆبەخشانە بڕیاریدا لەماوەی ئەو دوو مانگەدا بەرهەمهێنانی نەوت بەبڕی یەك ملیۆن بەرمیلی رۆژانە كەمبكاتەوە وەک پاڵپشتییەک بۆ نرخی نەوت لە بازارەکانی جیهاندا.

 

کەمکردنەوەی بەرهەمهێنانی نەوت لەلایەن سعودیە و وڵاتانی بەرهمهێنی نەوت لە کاتێکدایە کە پێشتر لەچوارچێوەی رێککەوتنێکی نێوان ئەندامانی ئۆپێک و بەرهەمهێنەرانی نەوتی دەرەوەی رێکخراوی ئۆپێک، کە لە مانگی 11ی ساڵی رابردوو کرا، ئەو وڵاتانە رێککەوتن لە مانگی یەکی ئەمساڵدا خستنەڕووی نەوت رۆژانە 500 هەزار بەرمیل زیاد بکەن.

 

هاوکات بەگوێرەی ڕاپۆرتێکی "بانكی (یو. بی. ئێس)ی سویسری  پێشبینی کراوە، لەنیوەی دووەمی ئەمساڵدا نرخی یەك بەرمیل نەوتی برێنت بگاتە 63 دۆلار‌ و بەرمیلێک نەوتی تەكساس بۆ 60 دۆلار بەرزببێتەوە، ئەوە لەكاتێكدایە كە لەئێستادا نرخی یەك بەرمیل نەوتی برێنت لە دەوروبەری 56 دۆلار مامەڵەی پێوە دەكرێت.

 

لاى خۆیەوە، فەرمانگەی زانیاری وزەی ئەمەریکا لە نوێترین راپۆرتیدا، ئاماژەی بەوەکردووە، کە ناوەندی هاوردەی نەوتی ئەمەریکا لە چوار مانگی رابردوودا، تەنیا لە چوار وڵات بووە و تێکڕای هاوردەکەش 4 ملیۆن و 792 هەزار بەرمیل نەوتی رۆژانە بووە، کە ئەو بڕەش بەراورد بە هەفتەی پێش خۆی 197 هەزار بەرمیل نەوت زیاتر بووە.

 

لە مانگی ئاداری 2020 خواست لەسەر نەوتی خاو بە رێژەی 30٪ دابەزی، ئەوەش بەهۆی کاریگەرییەکانی بڵاوبوونەوەی ڤایرۆسی کۆرۆنا لە جیهاندا، بەڵام لەگەڵ پەسندکردنی ڤاکسینەکانی کۆرۆنا، نرخی نەوت رووى لەبەرزبوونەوە کردووە.

 

لە مانگی نیسانی ساڵی 2020 دا بەهۆی لێکەوتەکانی ڤایرۆسی کۆرۆنا، نەوت نزمترین ئاستی له‌ دوای ساڵی 2002ه‌وه‌ تۆماركرد، به‌ جۆرێك نرخی یه‌ك به‌رمیل نه‌وتی خاوی برێنت له‌ خوار 25 دۆلاره‌وه‌ مامه‌ڵه‌ی پێوه‌ده‌كرا. نرخی بەرمیلێک نەوتی رۆژئاوای تەکساس بۆ -37 دۆلار دابەزی.