گه‌ڕان

Shadow Shadow
سیاسه‌تی

پەیامێک لە لاهور شێخ جەنگییەوە لەبارەی بودجە و ڕێککەوتن لەگەڵ بەغدا

2021.01.11 - 15:51
پەیامێک لە لاهور شێخ جەنگییەوە لەبارەی بودجە و ڕێککەوتن لەگەڵ بەغدا

ناس کورد-

لاهور شێخ جەنگی، هاوسەرۆکی یەکێتیی نیشتیمانیی کوردستان داوادەکات لایەنەکان بۆ ڕێککەوتن لەگەڵ بەغدا یەکهەڵوێست بن و دەشڵێت، وەک یەکێتی هەموو هەوڵێک دەدەن بۆ بەدەستهێنانی پشتیوانی و پەسەندنکردنی بڕگەی تایبەت بە پشکی هەرێم لە بودجەی 2021ی عێراق.  

 

لاهور شێخ جەنگی، هاوسەرۆکی یەکێتیی نیشتیمانیی کوردستان (دووشەممە 11ی کانوونی دووەمی 2021) ڕایگەیاند، "ئەمڕۆ سەردانی کۆمەڵەی پێشمەرگە دێرینەکانی کوردستانمان کرد و لەگەڵ کاک جەمیل هەورامی، سەرۆکی ئەنجوومەنی کۆمەڵەی پێشمەرگە دێرینەکان و ئەندامانی ئەنجوومەن و سەرجەم لقەکانی کۆمەڵەکە کۆبووینەوە."

 

ئاماژەی بەوەشکردووە، " لە کۆبوونەوەکەدا باسمان لە دۆخی ئێستا کرد و جەختمان کردەوە لەسەر یەکهەڵوێستی و بڕیاری سیاسیی لایەنەکان و چڕکردنەوەی هەوڵەکان لە بەغدا بۆ تێپەڕاندنی ئەم قۆناغە کە قۆناغێکی هەستیارە و دووپاتمانکردەوە کە بە ڕێککەوتنی حکومەتی هەرێم و حکومەتی فیدراڵ گرفتی مووچە و بودجەی هەرێم و کێشەی ناوچە دابڕێندراوەکان چارەسەر دەبن."

 

لاهور شێخ جەنگی ئەوەشی خستووەتەڕوو، "وەک یەکێتیی نیشتییمانیی کوردستان جەختدەکەینەوە لەسەر گرتنەبەری  خەباتی پەرلەمانیی بۆ بەدەستهێنانی مافەکانی گەلەکەمان و بەدەستهێنانی پشتیوانی بۆ پەسەندکردنی ئەو بڕگە یاساییە کە لە پڕۆژەی بودجەی ساڵی 2021دا هاتووە و تایبەتە بە پشکی هەرێمی کوردستان بۆ چارەسەرکردن مووچەی مووچەخۆرانی هەرێمی کوردستان."