گه‌ڕان

Shadow Shadow
سیاسه‌تی

پێشبینییەکی نوێ بۆ نرخی نەوت

بانکێکی سویسری پێشبینییەکی نوێ بۆ نرخی نەوت دەکات

2021.01.09 - 20:49
App store icon Play store icon Play store icon
بانکێکی سویسری پێشبینییەکی نوێ بۆ نرخی نەوت دەکات

ناس كورد-

بانكێکی سویسری پێشبینی دەکات، دۆزینەوەی ڤاكسینی كۆرۆنا‌ و كەمكردنەوەی بەرهەمهێنانی نەوت لەلایەن سعودیە‌ و دەستپێکردنەوەی گەشتە ئاسمانییەکان ببن بە هۆکار بۆ ئەوەی لە ناوەڕاستی ئەمساڵدا بەهای بەرمیلێک  نەوت نزیکبێتەوە لە 63 دۆلار.

کەناڵی ناس کورد لە تێلیگرام جۆین بکە   

 

بەگوێرەی هەواڵێکی ماڵپەڕی "خەلیج ئۆن لاین" ( 9ی کانوونی دووەمی 2021) کە "ناس کورد" بەدواداچوونی بۆ کردووە، "بانكی (یو. بی. ئێس)ی سویسری لەڕاپۆرتێکدا، ئەوەی خستووەتەڕوو، كەمكردنەوەی بەرهەمهێنانی نەوت لەلایەن وڵاتی سعودییەوە بەبڕی یەك ملیۆن بەرمیلی رۆژانە لە دوو مانگی داهاتوودا، كاریگەرییەكی ئەرێنی دەبێت لەسەر بوژانەوەی بازاڕی نەوت".

 

ئاماژەی بەوەشکردووە، "دابەشكردنی ڤاكسینی كۆرۆنا‌ و دەستپێکردنەوەی گەشتە ئاسمانییەکان و زیادبوونیان، دەبنەهۆی بەرزبوونەوەی خواست لەسەر نەوت، بۆیە پێشبینی دەکرێت لە چارەكی دووەمی ئەمساڵدا نرخی نەوت 60 دۆلار تۆماربکات".

 

بەگوێرەی ڕاپۆرتەکەی ئەو بانکە سویسرییە، "پێشبینی دەکرێت لەنیوەی دووەمی ئەمساڵدا نرخی یەك بەرمیل نەوتی برێنت بگاتە 63 دۆلار‌ و بەرمیلێک نەوتی تەكساس بۆ 60 دۆلار بەرزببێتەوە، ئەوە لەكاتێكدایە كە لەئێستادا نرخی یەك بەرمیل نەوتی برێنت لە دەوروبەری 56 دۆلار مامەڵەی پێوە دەكرێت".

 

لەدواین کۆبوونەوەی وڵاتانی (ئۆپیك +)  کە هەفتەی ڕابردوو بەڕێوە چوو، بڕیاردرا لەمانگی شوبات‌ و ئاداری داهاتوودا بەرهەمهێنانی نەوت تەنها 75 هەزار بەرمیلی رۆژانە زیاد بكەن، هاوكات سعودیە بەشێوەیەكی خۆبەخشانە بڕیاریدا لەماوەی ئەو دوو مانگەدا بەرهەمهێنانی نەوت بەبڕی یەك ملیۆن بەرمیلی رۆژانە كەمبكاتەوە وەک پاڵپشتییەک بۆ نرخی نەوت لە بازارەکانی جیهاندا.

 

لە مانگی ئاداری 2020دا نرخی نەوت بەهۆی کاریگەریی ڤایرۆسی کۆرۆنا بەسەر ئابوریی جیهانەوە نزمترین ئاستی لەماوەی 17 ساڵی رابردوو تۆمارکرد، بەجۆرێک بەرمیلێک نەوتی خاوی تەکساسی ئەمەریکا دابەزی بۆ 20 دۆلار و بەرمیلێک نەوتی برێنت-یش بە 23 دۆلار مامەڵەی پێوە کرا.