گه‌ڕان

Shadow Shadow
سیاسه‌تی

هۆشداری دراوەتە یاریدەدەرەكانی

تێلیگراف نهێنییەكانی شەوە درێژەكەی دۆناڵد ترەمپی بڵاوكردەوە

2021.01.09 - 10:40
App store icon Play store icon Play store icon
تێلیگراف نهێنییەكانی شەوە درێژەكەی دۆناڵد ترەمپی بڵاوكردەوە

ناس كورد-

رۆژنامەی تێلیگرافی بەریتانی بڵاویكردەوە، دۆناڵد ترەمپی سەرۆكی ئەمەریكا شەوی پێنجشەممەی بە تەنهایی بە دیار تەلەفزیۆنەوە بەسەربردووە پاش ئەوەی یاریدەدەرەكانی لێی دووركەوتوونەتەوە لەترسی دادگاییكردنیان بەتۆمەتی هاندانی بشێوی و تۆڕە كۆمەڵایەتییەكانیش هەژمارەكەیان هەڵپەساردووە.

کەناڵی ناس کورد لە تێلیگرام جۆین بکە   

کەناڵی ناس کورد لە تێلیگرام جۆین بکە

ڕۆژنامەكە لە ڕاپۆرتێكدا كە "ناس كورد" بەدواداچوونی بۆ كردووە (9 كانونی دووەمی 2021) شەوی پێنجشەممەی بە "درێژ" و "تەنها" بۆ ترەمپ ناو بردووە بەتایبەت كە تویتەر و فەیسبوك هەژمارەكانی سەرۆكی وڵاتە یەكگرتووەكانیان هەڵپەساردووە و دەرفەتی پەیوەندیكردنی بەجیهانی دەرەوە نەماوە، جگە لەوەش یاریدەدەرەكانی خۆیان بەدوورگرتووە لە پێشكەشكردنی راوێژ پێی لەترسی ئەوەی نەبادا دواتر بە یاسای هاندانی بشێوی لەلایەن كۆنگرێسەوە لێپێچینەوەیان لەگەڵدا بكرێت.

 

بەگوێرەی تێلیگراف، ترەمپ بەتەنها جێهێڵراوە بۆ تەماشاكردنی تەلەفزیۆن و بەچاوی خۆی دیویەتی میراتەكەی لەبەریەك هەڵدەوەشێت و تەنانەت چانسی گەڕانەوەشی بۆ كۆشكی سپی لە 2024 دەسووتێت.

 

زیاتر بخوێنەوە: کچە شۆخەکەی کۆشکی سپی لە ترەمپ هەڵدێت

 

رۆژنامە بەریتانییەكە ئەوەشی ئاشكرا كردووە، سەرەتا ترەمپ دڵخۆش بووە بە گردبوونەوەی لایەنگرانی لەبەردەم كۆنگرێس لەسەر بانگهێشتی ئەو، لەوكاتەشدا مەزاجێكی شەڕەنگێزانەی هەبووە، كاتێكیش لایەنگرانی پەلاماری كۆنگرێسیان داوە و توندوتیژی دروستبووە هیچ كەس نەیتوانیوە قسەی لەگەڵدا بكات.

 

سەرچاوەكان ئەوە ئاشكرا دەكەن، پاش هەڵكوتانە سەر كۆنگرێس، یاریدەدەرانی ترەمپ ترسیان لێ نیشتووە و لێی پاڕاونەتەوە گاردی نیشتمانی ڕەوانە بكات بۆ كۆنتڕۆڵكردنی دۆخەكە وەك چۆن لە خۆپیشاندانی ڕەشپێستەكاندا كردی لەهاوینی رابردوو، بەڵام ترەمپ بۆ ماوەیەك بەرگریی كردووە، ئەمەش یاریدەدەرەكانی زیاتر بێهیوا كردووە.

ئەپی نوێی ناس کورد دابەزێنە بۆ بینینی بەپەلە و هەواڵەکان: بۆ ئایفۆن - بۆ گالاکسی - بۆ هواوى

یاریدەدەرەكانی ترەمپ هەوڵیانداوە تۆمارێك بڵاوبكاتەوە هانی لایەنگرانی بدات بكشێنەوە و ئەمەشیان بەتاقە دەرچە زانیوە بۆ هێوركردنەوە، بەڵام ترەمپ تا 24 كاتژمێر رازی نەبووە ئەوە بكات.

 

رۆژنامە بەریتانییەكە ئەوەشی ئاشكراكردووە پارێزەرێك هۆشداری داوەتە یاریدەدەرەكانی ترەمپ كە راوێژی پێشكەش نەكەن بۆ ئەوەی دواتر بەتۆمەتی خیانەت و ئاژاوەگێڕی دادگایی نەكرێن، بەدوای ئەمەشدا شەپۆلێك دەستلەكاركێشانەوە لە كۆشكی سپی دەستی پێكردووە كە ئەمەش هێندەیتر ترەمپی تاك كردووەتەوە.

 

ڕۆژنامەی واشنتۆن پۆست ئاشكرایكرد دۆناڵد ترەمپ سەرەتا ئامادە نەبووە پۆزش بهێنێتەوە بۆ رەفتاری لایەنگرانی و مایك بێنسی جێگریشی تۆمەتباركردووە بە خیانەت، بەڵام دواتر لەژێر گوشاری نزیكەكانی تۆمارێكی بڵاوكردەوە بۆ ئیدانەكردنی هەڵكوتانە سەر كۆنگرێسی ئەمەریكا. 

 

واشنتۆن پۆستی ئەمەریكی لە راپۆرتێكدا كە "ناس كورد" بەدواداچوونی بۆكردووە (8 كانونی دووەمی 2021) نهێنییەكانی شەوی هەڵكوتانە سەر كۆنگرێسی ئەمەریكای لەناو كۆشكی سپییەوە بڵاوكردەوە.

 

رۆژنامەكە ئەوەی ئاشكرا كردووە ترەمپ ماوەیەكی زۆر بەرگری لە لایەنگرانی كردووە و باسی لەوەكردووە بەئاشتی ناڕەزاییان دەربڕیوە، ئەمەش نزیكەكانی ترەمپی بێزار كردووە تا دواجار و پاش 24 كاتژمێر ترەمپ ناچاربوو لەسەر رووداوی هەڵكوتانە سەر كۆنگرێس بێتە دەنگ و ئیدانەی ئەم رووداوە بكات و گقتی سزادانی ئەنجامدەرانی بدات كە چوار كوژراو و 50 بریندار و زیانێكی گەورەی لێ كەوتەوە لەسەر ناوبانگی ئەمەریكا. 

 

بەرپرسانی كۆشكی سپی باس لەوە دەكەن ترەمپ لەدۆخێكی خراپدا بووە، هەرچی هەوڵدراوە لەرێگەی فۆكس نیوزەوە لێدوانێك بدات قایل نەبووە، هەر سوور بووە لەسەر تۆمەتەكانی تەزویركردنی هەڵبژاردن، جگە لەوەش زۆر توڕەو نیگەرانە لە مایك بێنسی جێگری و باسی لەوەكردووە "لەپشتەوە خیانەتی كردووە" و باسی لەوەكردووە ئەو بێ وەفا بووە بەرامبەر چاكەكانی سەرۆكەكەی.

 

بەپێی واشنتۆن پۆست ترەمپ ئەوكاتە قایل بووە ئیدانەی رووداوەكە بكات و مل بۆ رادەستكردنی دەسەڵات كەچ بكات كە نزیكەكانی بەجێیانهێشتووە و هێرشیان كردووەتەسەری لە كۆنگرێسمان و بەرپرسانی كۆشكی سپی و وەزیرانی ئیدارەكەی. 

 

لەوتارە تۆماركراوەكەیدا دۆناڵد ترەمپ بەو خۆپیشاندەرانەی وت کە هەڵیان کوتایە سەر کۆنگرێسی ئەمریکا "نوێنەرایەتی ئەمریکا ناکەن و باجەکەى دەدەن".

 

دوو سەرچاوەی ئاگادار جەخت دەكەنەوە لەوەى ناكۆكییەكانی نێوان دۆناڵد ترەمپی سەرۆكی ئەمەریكا و جێگرەكەی مایك پێنس لە 24 كاتژمێری رابردوودا قووڵتر بووەتەوە و لەپاش هەڵكوتانە سەر كۆنگرێسیش پێكەوە قسەیان نەكردووە.  

  

بەپێی ئەو زانیارییانەی تۆڕی CNN بڵاویكردووەتەوە و "ناس كورد" بەدواداچوونی بۆ كردووە (9 كانونی دووەمی 2021)، ترەمپ زۆر بێزار و توڕەیە لە مایك بێنسی جێگری، لە بەرامبەریشدا پێنس زۆر بێهیوا و دڵشكاوە لە ترەمپ.  

  

بەپێی تۆڕە ئەمەریكییەكە ئەم ساردییە لەوكاتەوە دەستی پێكردووە كە ترەمپ گوشاری ئەوەی دەستپێكرد، پێنس بتوانێت بەرپەرچی پەسەندكردنی ئەنجامەكان بداتەوە، لە رووداوەكانی هەڵكوتانە سەر كۆنگرێسیشدا ناكۆكییەكە گەیشتووەتە لوتكە لە دوو رۆژی رابردوودا.  

  

 هەر بەپێی زانیارییەكان، پێنس هانی وەزیری بەرگری داوە خێرا بەپیر هێوركردنەوەی دۆخەكە بچن، لەم ماوەیەی دوایشدا ترەمپ هیچ پەیوەندییەكی بە جێگرەكەیەوە نەكردووە بۆ دڵنیابوونەوە لە بارودۆخ و كارەكانی.