گه‌ڕان

Shadow Shadow
سیاسه‌تی

باس لە هەڵایسانەوەی شەڕی حكومەتی عێراق و كوردستان دەكات

دیدارێكی رادیۆیی بەر لە 58 ساڵی تاڵەبانی لەپاریسەوە

2021.01.08 - 20:06
App store icon Play store icon Play store icon
دیدارێكی رادیۆیی بەر لە 58 ساڵی تاڵەبانی لەپاریسەوە

مامۆستایەكی زانكۆ، ئەرشیفی دیدارێكی سەرۆكی كۆچكردوو جەلال تاڵەبانی بڵاوكردەوە كە ساڵی 1963 لە پایتەختی فەرەنسا لەگەڵ رادیۆی پاریس ئەنجامیداوە لەبارەی هەڵایسانەوەی شەڕ دەكات لەنێوان بەعسییەكان و شۆڕشی كوردیدا.

کەناڵی ناس کورد لە تێلیگرام جۆین بکە   

 

دیدارەكە كە بەناونیشانی "تاڵەبانی لە پاریسەوە" یە و د. یاسین خالید سەردەشتی بڵاوی كردووتەوە ئەمە ناوەڕۆكەكەیەتی:

 

رادیۆی پاریس کە بەزمانی عەرەبیی ئاراستەی رۆژهەڵاتی ناوەڕاست کراوە، لەرۆژی ١٢ی جونی ١٩٦٣و لەکاتژمێر ١٧٣٠ بەکاتی گرینچ (واتە پێنج و نیوی عەسر بەکاتی لەندەن/هەشت و نیو بەکاتی بەغدا) وتویەتی:

"تاڵەبانی سەرکردەی کورد کە دوێشەو گەیشتبووە پاریس، وتویەتی کە دەستپێکردنەوەی پەلاماری سەربازیی دژی کورد، هەروەک ئەوەی لەلایەن حکومەتی عێراقییەى بڕیاری لێدراوە، هاوشێوەی ئەوەی سەردەمی قاسم شکستخواردوو دەبێت.

تاڵەبانی ئەوەی زێدەکرد، کە سوپای کوردیی لەراستییدا لەپێشان بەهێزترەو دوو ئەوەندەی پێشووش ئیمکاناتی لەبەردەستە. ئەو رایگەیاند کە ژمارەیەکی زۆری عەرەب بە کوردەوە پەیوەیستبوون.

 

سەرکردەی کورد رایگەیاند، کە حیزبی بەعس چاەسەری ئاشتییانەی رەتکردۆتەوە، چونکە بەدوای پاساوێکدا دەگەڕا بۆ جێبەجێنەکردنی رێکەوتننامە سیانییەکەی کە لە١٧ی ئەپڕڵدا لە قاهیرە مۆرکرا. هەروەها بەعسییەکان پەرۆشن بۆئەوەی دیکتاتۆرییەتێکی کۆنەپەرستانە بەسەر عێراقدا بسەپێنن. هەرچەندە ئەوەی زێدەکرد کە، جوڵانەوەی کوردیی تەنیا رەگەزێکە بتوانێت لەبەرامبەر رژێمێکی دکتاتۆریی بەم چەشنەدا بەرگریی بکات.

 

لەچوارچێوەی گفتوگۆکانی نێوان وەفدە کوردییەکەو سەرۆک ناسڕدا، تاڵەبانی وتی کە سەرۆک ناسڕ تێگەیشتنێکی قووڵی بۆ کێشەی کورد هەیەو هەست بەوەدەکات کە داواکارییەکانی کورد دادپەروەرن.

 

سەبارەت بەو سەردانەشی بۆ پاریس، تاڵەبانی ئاماژەی بەوەدا کە مەبەستەکەی ئەوەیە پێزانینی گەلی کورد بەگەلی فەرەنساو رۆژنامەکانی دەرببڕێت و هەروەها بۆئەوەی پەیوەندیی بە (ئادیرخان/ هەڵەی فۆنەتیک و نووسینەو مەبەست لێی کامەران بەدرخانە) سەرکردەی مەزنی کوردەوە بکات.

 

تاڵەبانی لەدەرئەنجامدا رایەگەیاند کە یاداشتێکی ناڕەزایەتیی پێشکەش بە سکرتێری گشتیی نەتەوە یەکگرتووەکان دەکات لەدژی چالاکییەکانی حکومەتی عێراق.

 

تێبینی ئامادەکار کە هەمان کات و هەمان رۆژ بڵاوکراوەتەوە:

بەبانێکی بارزانی راگواستووە کە دەڵێت "ئێمە لەبەردەم تەنیا بژاردەیەکداین، ئەویش دەستپێکردنەوەی شەڕە بۆ پاراستنی گەلەکەمان و گوندەگانمان. ئێمە دەستدرێژییکەر نین، شەرەکەمان شەڕێکی بەرگرییکارانەیە، ئێمە لەخەبات بەردەوامدەبین تاوەکو ئەو کاتە حکومەتی عێراق گەمارۆی ئابووری و سەربازیی لەسەرمان لادەبات و داواکارییەکانمان سەبارەت بە چارەسەرێکی ئاشتییانە بۆ کێشەکە پەسەند دەکات. بارزانی ئەوەی زێدەکرد، بڕوامان وایە کە گەلەکەمان دەتوانێت لەنێو کۆماری عێراقییدا بژی، هەروەها لەنێو فیدراسیۆنی عەرەبیشدا. "           "