گه‌ڕان

Shadow Shadow
سیاسه‌تی

’چەند بەرپرسێکی سەربازی’

سلێمان هەڵشۆیی لەزیندانەوەى قسەى نوێ لەسەر دۆسیەکەى دەکات

2020.12.27 - 23:11
App store icon Play store icon Play store icon
سلێمان هەڵشۆیی لەزیندانەوەى قسەى نوێ لەسەر دۆسیەکەى دەکات

ناس کورد-

دواى نۆ رۆژ لە دەستگیرکردنى پۆلیس رێگەی بە گفتوگۆى راستەوخۆى سلێمان هەڵشۆیی و بەشێک لەو کەسانەدا کە مامەڵەیان لەگەڵدا کردووە و ناس کورد ناوەڕۆکەکەى بڵاودەکاتەوە.

 

کەناڵی ناس کورد لە تێلیگرام جۆین بکە   

کەناڵی ناس کورد لە تێلیگرام جۆین بکە  

 

رێگەدان بەو کەسانە کە ژمارەیان شەش کەس بووە، دواى دیاریکردنیان هاتووە وەک نوێنەر لەلایەن ئەو کەسانەوە کە ئەمڕۆ لە نزیک دەربەندی نێوان قەزای پشدەر و بتوێن گردبونەوە و داوای چارەنوسی پارەکانیان کرد.

 

بایز  محەمەد یەکێک لەو کەسانەى لە زیندان چاوى بە سلێمان کەوتووە (یەکشەممە، 27ى کانونى یەکەمى 2020) بە "ناس کورد" ى راگەیاند "نزیکەی دوو کاتژمێر گفتوگۆمان لەگەڵ سلێمان کرد، پێی وتین مامەڵەى ئەوە بووە کە پارەکەى لەکەسێک وەرگرتووە و داویەتى بە کەسێکى دیکە، هەر بەو شێوەیە مامەڵەیکردووە".

 

دەشڵێت سلێمان وتویەتى بەتەنها نەبووە و هاوبەشى هەبووە و چەند کەسێکیش دەڵاڵی بوون و پارەکە بەشێکی لای ئەوانە.

 

بەوتەى بایز، سلێمان هەڵشۆیی ئاماژەی بەوەشکردووە "ئیفلاسی کردووە" و پارەکانی لەدەست چوون، بەڵام سەرجەم زانیارییەکان و ناوی ئەو کەسانەش دەداتە پۆلیس  کە بەشێکی  پارەکەیان لایە.

 

لەسەر دۆسیەکە جگە لە سلێمان هەڵشۆیی، پۆلیس 19 کەسى دیکەى دەستگیرکردووە و لێکۆڵینەوە لەگەڵیان بەردەوامە، بەڵام هێشتا ئەنجامى لێکۆڵینەوەکان ئاشکرانەکراوە.

 

بایز  محەمەد وتى ئەوان پێیان وایە سلێمان تەنها لەلایەن چەند کەسێکەوە بەکار هێندراوە بۆ کۆکردنەوەی پارە "ناوی چەند بەرپرسێکی سەربازی هێناوە کە وەنەوەشەی پێداون و وتویەتی لەبری قەرز پێم داونەتەوە".

 

تائێستا 50 کەس سکاڵایان لەسەر سلێمان تۆمارکردووە، 500 کەسی دیکەش ناوى خۆیان بۆ تۆمارکردنى سکاڵا تۆمارکردووە.

 

هەفتەى رابردوو شۆڕش ئیسماعیل وتەبێژى پۆلیسى راپەڕین لەکۆنگرەیەکى رۆژنامەنوسیدا کە پەیامنێرى "ناس کورد" تێیدا ئامادەبوو رایگەیاند، بۆیان روونبووەتەوە مامەڵەکان بەدەر بووە لە یاسا و ئەو کەسانە ئۆتۆمبیل و زەویان داوە بەو کەسە بەمەبەستى دەستکەوتنى قازانج.  

 

ئەپی نوێی ناس کورد دابەزێنە بۆ بینینی بەپەلە و هەواڵەکان: بۆ ئایفۆن بۆ گالاکسی - بۆ هواوى  

 

رۆژى شەممە (19ى کانونى یەکەمى 2020)، بڵاوبوونەوەى هەواڵى "مایەپووچبوونى سلێمان" دەڤەرى پشدەرى هەژاند و پەردەى لەسەر مامەڵەیەکى 30 ملیۆن دۆلارى ئەو سەرمایەدارە گەنجە لەگەڵ سەدان کەسى دیکەدا هەڵماڵى.  

 

بەپێی بەدواداچونەکانى "ناس کورد"، مامەڵەى سلێمان لەگەڵ ئەو کەسانە بەچەند شێوازێک بووە، کە دیارترینیان وەرگرتنى ئۆتۆمبیل بووە لە خەڵک بە گرانتر لە نرخى بازاڕ و پێدانى پارەکان بەو کەسانە لەماوەى چەند مانگێکدا. 

 

جگە لە ئۆتۆمبیل، سلێمان دەمانچە و ئاژەڵیشى بە نرخى دوو هێندە یان کەمتر لەخەڵک وەردەگرت و خۆى راستەوخۆ بە نرخى راستەقینە دەیفرۆشت و مۆڵەتى چەند مانگێکى بۆ ئەو کەسە دادەنا تا پارەکەى پێبدات.  

 

سلێمان لە مامەڵەکانیدا پشتى بە بەڵگەنامەى فەرمى و یاسایی نەبەستووە، تەنها وەسڵێکى بەناو و واژۆى خۆیەوە بۆ ئەو کەسانە کردووە.