یەکەم کاردانەوەى یەکێتی لەبارەى بەرزکردنەوەى نرخی دۆلار

ناس کورد-

حاكم قادر حەمەجان، ئەندامی ئەنجومەنی باڵای سیاسی و بەرژەوەندی یەكێتی دەڵێت، بەرزبوونەوەی نرخی دۆلار بەر لە ھەموو کەس خەڵکی ھەژار و بێدەرەتانی نیشتیمان زەرەری لێدەکات و پێویستە کارێک بکرێت کە قورسایی سەر ژیان و گوزەرانی مووچەخۆران و ھاوڵاتیان کەم بکرێتەوە.

کەناڵی ناس کورد لە تێلیگرام جۆین بکە   

کەناڵی ناس کورد لە تێلیگرام جۆین بکە  

حاكم قادر حەمەجان، ئەندامی ئەنجومەنی باڵای سیاسی و بەرژەوەندی یەكێتی لە پەیامێکیدا لەژێر ناوی "بەرزبوونەوەى نرخی دۆلار و دەرئەنجامەکانی" کە ناس کورد بەدواداچوونی بۆ کردووە (22ی کانونی یەکەمی 2020) دەڵێت، "لە کاتێکدا ڕۆژ بەڕۆژ گیرفانی ھاوڵاتیان بەتاڵتر دەبێت، ئابوری وڵات لە لێواری ڕووخان و لێکترازاندایە، گەندەڵی تا بینەقاقای حکومداری چووە، جەردەیی لە داھاتی نەوت و سەر مەرزەکان و قاچاخچێتی لە داغڵکردنی خواردنی ئێکسپایەر و مادەی سەرەتانیدا زیاد دەکات، لێبڕینی مووچە و نەبوونی مووچە بۆ فەرمانبەران وخانەنشینان، ھەروەھا بۆ ھاوڵاتیان ھیج دەرفەتێکی نەھێشتۆتەوە، بێکاری باڵی بەسەر گەنجانی وڵاتدا کێشاوە، بە تایبەت لەم کاتەدا بڕیاری بەرزکردنەوەی نرخی دۆلار بەرامبەر دیناری نیشتمانی رایچڵەکاندین."

دەشڵێت، "بەرزبوونەوەی نرخی دۆلار بەر لە ھەموو کەس خەڵکی ھەژار و بێدەرەتانی نیشتیمان زەرەری لێدەکات و پێویستە کارێک بکرێت کە قورسایی سەر ژیان و گوزەرانی مووچەخۆران و ھاوڵاتیان کەمبکرێتەوە و دۆخێکی ئابوری سەقامگیر بۆ ھاوڵاتیان دابین بکرێت، تا چیدی ھاوڵاتیان لەم دۆخە ناھەموارەدا نەمێننەوە."