گه‌ڕان

Shadow Shadow
سیاسه‌تی

گروپە چەکدارییە عێراقییەکانى نزیک لە ئێران هۆشداری لە هەڵگیرسانى شەڕ دەدەن

2019.05.20 - 09:48
App store icon Play store icon Play store icon
گروپە چەکدارییە عێراقییەکانى نزیک لە ئێران هۆشداری لە هەڵگیرسانى شەڕ دەدەن

کەناڵی ناس کورد لە تێلیگرام جۆین بکە   

ناس کورد- دوای ئەوەى شەوی ڕابردوو موشەکێکى کاتیۆشا لە ناوچەى سەوزی بەغدا و لە نزیک باڵیۆزخانەی ئەمریکا کەوتەوە، هەرزوو گروپە چەکدارییە عێراقییەکانى نزیک لە ئێران هەڵوێست و بێ تاوانی خۆیان لە هێرشەکە ڕاگەیاند. قەیس خز عەلی، سەرۆکى گشتی عەسائیبی ئەهلی حەق کە نزیکترین گروپی چەکدارییە لە ئێران ڕایگەیاند، "جەنگی چاوەڕوانکراو لە بەرژەوەندی ئێران و ئەمریکادا نییە بەڵکو لە بەرژەوەندی ئیسرائیلدایە." . قەیس خزعەلی پەیامەکەى لە تویتەر بڵاوکردەوە و ڕاشیگەیاند، "ئامانج لە جەنگی هەردوولاش زیانگەیاندنە بە دۆخی عێراق." دەشڵێت، "مەبەست لەو کردارانە [ڕووداوی هێرشی موشەکی بۆسەر ناوچەى سەوز] دۆزینەوەى بیانوویەکە بۆ جەنگ و دەیەوێت زیان بە دۆخی سیاسیی و ئابوریی و ئاسایشی عێراق بگەیەنێت." . هەر دوای تویتەکەى خزعەلی، هادی عامری، سەرۆکى هاوپەیمانی فەتح لە هاوپەیمانێتی سەرجەم گروپە چەکدارییەکانى حەشدی شەعبییە هۆشداری دا لە هەوڵەکانى "دروستکردنی فیتنەی جەنگ" و داوا دەکات ئاگرەکەى لە عێراق دوربخرێتەوە. هادی عامری لە لێدوانێکى ڕۆژنامەنوسیدا ڕایگەیاند، "دووپاتیدەکەینەوە کە بەرپرسیارێتى نیشتمانی و ئاینی و مێژوویی لەسەر هەموانە تاوەکو پشکۆی جەنگ لە عێراق و ناوچەکە دور بخەنەوە، چونکە خوانەکردە ئەگەر جەنگ بەرپا بێت، هەمووان دەسوتێنێت." . دەشڵێت، "هەموو ئەوانەى دەیانەوێت ئاگر بە پڵیتەى جەنگەوە بنێن لە عێراق یان نەزانن یان ئاڕاستەکراوە، هەموو لایەنەکان جەنگیان ناوێت، نە ئێران نە ئەمریکا." عامری کە هاوکات سەرۆکى ڕێکخراوی بەدریشە دەڵێت، "ئەوەى پاڵ بە جەنگەوە دەنێت قەوارەى سەهیۆنییە بەڵام عێراقییەکان نایانەوێت ببنە ئاگری ئەو جەنگە."