سێ سیناریۆی جیاواز لە ئەگەری هێرشی ئەمریکا بۆسەر ئێران

ناس کورد- شارەزایەکى سەربازیی ڕوسی باس لە سێ سیناریۆ دەکات ئەگەر هاتوو ئەمریکا بیەوێت هێرش بکاتەسەر ئێران. كۆنستاتین سیفكۆف، شارەزایی سەربازیی ڕوسی دەڵێت، "ئەمریكا بۆ ئەنجامدانی هێرشێكی سەربازی ڕاستەوخۆ  و فراوان بۆسەر خاكی ئێران هاوشێوەی ئەوەی لە عێراق ئەنجامیدا لە ساڵی 2003، نزیكەی یەك ملیون سەربازی پێویستە. . كۆنستاتین سیفكۆف کە هاوکات جێگری ئەكادیمیای ڕوسییە بۆ  موشەك و تۆپهاوێژی رایگەیاند،"دوای ئەوەی ئەمریكا هێزێكی  زۆری ڕەوانەی خۆرهەڵاتی ناوەڕاست کردووە، پێشبینی دەكەین ئەمریكا بۆ یەكلایيكردنەوەی كێشەكەی لەگەڵ ئێراندا سێ‌ سیناریۆ بەكاربهێنێت." . كۆنستاتین سیفكۆف بەم  شێوەیەی خوارەوە سیناریۆکانى خستووەتەڕوو، سیناریۆی یەكەم: ئەمریكا ئەگەری هەیە هێرشێكی ئاسمانی و موشەكی بكاتە سەر دامەزراوە ئەتۆمییەکانى ئێران، لەو حاڵەتەشدا ئەمریكا پێویستی بە 120 هەزار سەرباز هەیە بۆ ئەنجامدانی ئەو سیناریۆیە". سیناریۆی دووەم: هاوشێوەی یۆگسلافیا، هێرشێكی ئاسمانی بەرفراوان بكاتە سەر ژێرخانی ئابوریی ئێران و ئەو کاتەش ئەمریکا پێویستى بە زیاتر لە 120 هەزار سەرباز هەیە. سیناریۆی سێیەم: ئەنجامدانی هێرشیكی ڕاستەوخۆی سەربازیی فراوانە بۆسەر خاکی ئێران هاوشێوەی هێرشەکەى سەر عێراق لە ساڵی 2003دا، لەوەها حاڵەتێکیشدا ئەمریكا بۆ ئەنجامدانی ئەو پلانە یەك ملیۆن سەربازی دەوێت. . ئەو شارەزا ڕوسییە دەشڵێت، "ئەمریكا بۆ ئەوەی هێزەكانی لە ناوچەكەدا زیاد بكات پێویستی بە بیانووە، هێرشكردنە سەر چوار كەشتییە نەوت هەڵگرەكە لە ئاوەكانی  كەنداو  نزیك كەنارە ئاوەكانی ئێران و ئیمارات لە چەند ڕۆژی ڕابردوودا سیناریۆییەكی دیكە بوو كە دەزگا هەواڵگرییەكانی ئەمریكا و ئیسرائیل و سعودیە ئەنجامیان داوە بۆ ئەوەی ببێتە بیانوویەك بۆ ڕاگەیاندنی شەر دژ بە ئێران، بەڵام بیانووەكە دەنگدانەوەى نەبوو و نەبووە هۆی ڕاگەیاندنی کردەى سەربازیی دژى ئێران، بەڵام ئەمریكا  لەمەولا وەك ئامرازیك بەكاردەهێنێت بۆ زیادكردنی هێزەكانی لە ناوچەكەدا.