گه‌ڕان

Shadow Shadow
سیاسه‌تی

ڕوسیاش چووە سەر هێڵ

تورکیا وەڵامى سزاکانى ئەمریکاى دایەوە

2020.12.14 - 23:36
App store icon Play store icon Play store icon
تورکیا وەڵامى سزاکانى ئەمریکاى دایەوە

ناس کورد-

وەزارەتی دەرەوی تورکیا رایگەیاند، سزادانى وڵاتەکەى لەلایەن ئەمەریکاوە هەڵەیە، ڕوسیاش هۆکاری سزاکەى گەڕاندەوە بۆ کڕینى سیستمی بەرگریی ئاسمانی سیستمی ئێس 400.

کەناڵی ناس کورد لە تێلیگرام جۆین بکە   

 

وەزارەتی دەرەوەی تورکیا لە بەیاننامەیەکدا کە ناس کورد بەدواداچوونی بۆ کردووە ڕایگەیاند، "ئەو هەنگاوەی ئەمریکا هەڵەیە و زیان بە پەیوەندییەکانی نێوانمان دەگەیەنێت، داوادەکەین ئەمەریکا لەو هەنگاوەی پەشیمان بێتەوە".

 

جەختیشیکردووەتەوە، "کڕینی سیستمی موشەکی بەرگریی لە ڕوسیا هەڕەشە نییە بۆ ناتۆ و دودڵیش نین لە پەرەپێدانی سیستمی بەرگری و ئاسایش".

 

لاى خۆیەوە، سێرگی لاڤرۆڤ وەزیری دەرەوەی ڕوسیا، بە میدیاکانی وڵاتەکەی ڕاگەیاندووە، "ئەمەریکا پلانی داناوە بەهۆی کڕینی سیستمی بەرگری موشەکی ( ئێس 400 ) لەڕوسیا سزا بەسەر تورکیادا بسەپێنێت".

 

وەزارەتى خەزێنەى ئەمریکا (14ی کانونی یەکەمی 2020) لە ڕاگەیەنراوێکدا کە "ناس کورد" بەدواداچوونی بۆ کردووە ڕایگەیاند، واشنتن سزاى بەسەر ئیدارەى پیشەسازى بەرگرى تورکیا و ئیسماعیل دەمیرى بەڕێوەبەری و سێ کەسى دیکەدا سەپاندووە.

 

مایک پۆمپیۆ، وەزیری دەرەوەی ئەمەریکا، لە تویتێکدا نووسیویەتی "سەرەڕای هۆشدارییەکانمان، تورکیا بەردەوام بوو لە کڕین و تاقیکردنەوەی سیستەمی بەرگریی ئێس 400 لە روسیا".

 

وتیشى، "سزاکانی ئەمڕۆ بەسەر کەرتی پیشەسازیی بەرگریی تورکیادا دەرخەری ئەوەیە کە ئەمریکا بەتەواوی یاسای ڕووبەڕووبوونەوەی دوژمنانی ئەمەریکا لەڕێگەی سەپاندنی سزاکان جێبەجێ دەکات".

 

پۆمپیۆ جەختیکردووەتەوە، هیچ لێبوردنێک نیشان نادەن لە بەرامبەر مامەڵەکردن لەگەڵ کەرتی بەرگریی ڕوسیا.