گه‌ڕان

Shadow Shadow
سیاسه‌تی

بژاردەکان ئاشکراکران

چارەنوسى خوێندن لە هەرێم یەکلاییکرایەوە

2020.12.06 - 23:06
App store icon Play store icon Play store icon
چارەنوسى خوێندن لە هەرێم یەکلاییکرایەوە

ناس کورد-

وەزارەتەکانى پەروەردە و خوێندنى باڵا بژاردەکانى خۆیان بۆ خوێندنى ئەمساڵ ئاشکراکرد، بۆ یەکلاییکردنەوەى چارەنوسى خوێندنى ئەمساڵ کە بەهۆى بڵاوبوونەوەى کۆرۆناوە هێشتا دەستیپێنەکردووە.

 

کەناڵی ناس کورد لە تێلیگرام جۆین بکە   

بژاردەکان ئەمڕۆ (6ى کانوونى یەکەمى 2020) لەکۆبوونەوەیەکى نێوان هەردوو وەزارەتەکە و لیژنەى پەروەردە و خوێندنى باڵاى پەرلەمانى کوردستان ئاشکراکران.

 

موسلیم عەبدوڵڵا جێگرى سەرۆکى لیژنەى  په‌روه‌رده‌ و خوێندنى باڵا لە لێدوانێکدا بە "ناس کورد"ى ڕاگەیاند، لە کۆبونەوەکە باسى پرۆسەى خوێندن و چارەنوسى پرۆسەکە کرا، وەزارەتى پەروەردە ڕۆژى 7ى 1ى 2021ى دیارى کردووە بۆ دەستپێکردنەوەى خوێندن، ئەگەر بارودۆخى تەندروستیش لەبارنەبوو ئەوا پلانى B جێبەجێدەکرێت.

 

رونیشیکردەوە، پلانەکە ئەوەیە هەفتەى 3 ڕۆژ دەوام بکرێت بۆ ئەوەش بەرنامە و میکانیزمى جۆراوجۆر دانراوە.

 

بەوتەى ئەو پەرلەمانتارە، لە هەموو حاڵەتەکاندا پۆلى 12 دەستدەکەنەوە بە خوێندن لەناو هۆڵەکان و پەروەردە ئامادەنیییە پرۆگرامى خوێندن کەمبکاتەوە و ئەو دوو مانگەى خوێندن دواخراوە قەرەبوو دەکرێتەوە و پشووەکان کەمدەکرێنەوە.

 

بەپێی نوێترین بڕیارى لیژنەى باڵاى کۆرۆنا، دەستپێکردنەوەى خوێندن تا حەوتى مانگى داهاتوو دواخراوە و دواتر بڕیارى دیکە لەو بارەیەوە دەدرێت لەسەر بنەماى هەڵسەنگاندنى تەندروستى بۆ دۆخى کۆرۆنا.

 

لەبارەى دەوامى خوێندنى باڵاوە، موسلیم عەبدوڵا باسى لەوەکرد، خوێندن بەشێوەى پرۆسەى ئاوێتە بەردەوام دەبێت، ئەگەر بارودۆخى تەندروستیش لەباربوو ئەوا دەچنەوە ناو هۆڵەکانى خوێندن و ڕێژەى ئامادەبونیان لەناو هۆڵى خوێندن زیاتر دەبێت لە سیستمى ئۆنلاین و ئەلکترۆنى.

 

تەوەرێکى دیکەى کۆبوونەوەکە داشکاندنى کرێی خوێندن بووە، کە بەوتەى ئەو پەرلەمانتارە سەبارەت ئەمساڵ داشکاندنەکە دەکرێت بە 20%، بۆ خوێندنى باڵاش بەهەمان شێوازى پار دادەشکێنرێت بەڵام سیستمێکى تر دانراوە بۆ ڕێزبەندیکردنى زانکۆکان و 10% دەستپێدەکات تا 20%.

 

بەپێی ساڵنامەى وەزارەتى پەروەردە، ساڵانە لە مانگى کانونی یەکەمدا تاقیکردنەوەى وەرزى یەکەم دەستپێدەکات و ئەو وەرزە کۆتایی دێت، بەڵام ئەمساڵ بەهۆى کۆرۆناوە هێشتا خوێندن دەستیپێنەکردووە.  

 

عومەر محەمەد ئەمین جێگری بەڕێوەبەری گشتی پەروەردەی سلێمانی (2ی کانونی یەکەمی 2020) بە "ناس کورد"ی راگەیاند، بڕیارە پیش 15ی کانونی یەکەمی 2020 بەئامادەبوونی سەرجەم بەڕێوەبەرەکانی پەروەردە وەزارەتی پەروەردە کۆبوونەوەیەک بکات و پلان و بەرنامەی سەرجەم پەروەردەکان گفتوگۆی لەسەر بکرێت.  

  

باسی لەوەشکرد، وەکو پەروەردەی سلێمانی داوایانکردووە پرۆگرامەکانی کۆرسی یەکەم و دووەم بکرێت بەیەک و لەلایەن بەڕێوەبەرێتی پرۆگرامەکان و بەهاوکاری کەسانی شارەزا پێداچوونەوەی بۆ بکرێت و بابەتە گرنگەکانی دیاری بکرێت و تەنها ئەوانە بخوێنرێت.