گه‌ڕان

Shadow Shadow
سیاسه‌تی

ئامارێکی سەیری دەربەندیخان

’’نیوەی خێزانەکانی دەربەندیخان لە هێڵی هەژاریدان’’

2020.12.03 - 19:00
’’نیوەی خێزانەکانی دەربەندیخان لە هێڵی هەژاریدان’’

ناس کورد-

بەڕێوەبەری چاودێریی کۆمەڵایەتیی دەربەندیخان ڕایگەیاند، لە کۆی 11 هەزار خێزان لە دەربەندیخان نزیکەی نیوەی ئەو ژمارەیە پێویستیان بە هاوکارییە.

 

بەرزان محەمەد، بەڕێوەبەری چاودێری کۆمەڵایەتی دەربەندیخان (3ی کانونی یەکەمی 2020) بە "ناس کورد"ی راگەیاند، نزیکەی 11 هەزار خێزان لە دەربەندیخان هەن و لە ئێستادا بەهۆی ئەم قەیرانە داراییەوە و بەهۆی نەبوونی مووچە ژمارەیەکی زۆری خێزانەکان پێویستیان بە هاوکارییە لە خۆراک و جل و بەرگ و پێداویستی گەرم کەرەوە.

 

باسی لەوەشکرد، لە رابردوو دوو هەزار کەس سودمەندبووە لەو هاوکارییەی حکومەتی هەرێمی کوردستان کە بۆ خێزانە کەمدەرامەتەکان دیاریکرابوو، جگە لەوەش بەهاوکاری خێرخوازان نزیکەی شەش هەزار خێزان هاوکاری کراون.

 

بەرزان محەمەد ئاماژەی بەوەشكرد، " لە رابردوو خێزان هەبووە داوای هاوکاری خۆراکی کردووە کاتێک خۆم چوومەتە بازاڕو مارکێتەکان بۆ کڕینی جۆرێک لە برنج کە نرخەکەی کەمتربووە دەستم نەکەوتووە، ئەوەش بەهۆی ئەوەی داواکاری زۆری لەسەرەو خێزانەکان لە ئیستادا دۆخی داراییان باش نییە و بەدوای شتومەکێک دەگەڕێن نرخەکەی هەرزانتر بێت. "