گه‌ڕان

Shadow Shadow
سیاسه‌تی

وردەکاریى

گۆڕانکاری لە سیستمی پەروەردەی هەرێمی کوردستاندا دەکرێت 

2020.12.02 - 23:11
گۆڕانکاری لە سیستمی پەروەردەی هەرێمی کوردستاندا دەکرێت 

ناس کورد- هەڤاڵ فەتاح

ئەندامێکى لیژنەى پەروەردە لە پەرلەمانى کوردستان رایگەیاند، پڕۆژە یاساى پەروەردە هەموار دەکرێتەوە و پرۆژەکە لە ئێستادا لە ئەنجومەنی شورای هەرێمی کوردستانە و دوای پێداچوونەوە بۆى ئاڕاستەی سەرۆکایەتی هەرێم دەکرێت.

 

ئاشنا عەبدوڵا ، ئەندامی لیژنەی پەروەردە لە پەرلەمانی كوردستان، لە لێدوانێکی بۆ "ناس کورد" (2ی کانوونی یەکەمی 2020) ڕایگەیاند :"پڕۆژە یاسای هەموارکردنەوەی سیستمی پەروردە لە ئێستادا لە ئەنجومەنی شورای هەرێمی کوردستانە، پڕۆژەکە حکومەت پێشکەشی کردووە، دوای پێداچوونەوە بە پڕۆژەکە، بڕیارە ڕەوانەی پەرلەمانی کوردستان بکرێت بەمەبەستی گفتۆگۆکردن لەسەری".

 

وتیشی :"پڕۆژەکە لە 200 بڕگە پێکهاتووە، ئەنجومەنی شورای هەرێم تائێستا پێداچوونەوەی بۆ 80 بڕگەی ئەو  پڕۆژەیە کردووە، دوای تەواوبوونی ڕەوانەی پەرلەمانی کوردستان دەکرێت بۆ ئەوەی لیژنەی یاسایی پەرلەمانیش تێڕوانین بۆ بڕگەکانی بکات لە ڕووی یاساییەوە و دواتریش دەخرێتە  بەرنامەی کاری دانیشتەنەکانی پەرلەمانەوە". 

 

 ئەندامەكەی لیژنەی پەروەردە ئەوەشی وت :"پڕۆژە یاسای پەروەردە مەبەست لێی بەرەوپێشبردنی كەرتی پەروەردە و بەرزكردنەوەی ئاستی خوێندنە لە ھەرێمی كوردستان، زیاتر گرینگی بە ئاستی قوتابیان و مامۆستایان دەدرێت، ئەم پڕۆژە یاسایە قوتابخانە ئەهلییەکانیش دەگرێتەوە و دەبێت بۆ لەمەودوا هەمان ئەو یاسایانە جێبەجێبکەن کە لە قوتابخانە حکومییەکاندا پەیڕەو دەکرێن".

 

بەوتەی ئەندامەکەی لیژنەی پەروەردەی پەرلەمانی کوردستان "لەبەر گرنگی یاساکە و زۆری بڕگەکانی پێناچێت لەوەرزی یاسادانانی ئەمجارەی پەرلەماندا بتوانرێت گفتۆگۆی لەسەر بکرێت، پێشبینی دەکەین لەوەرزی یاسادانانی داهاتوودا بخرێتە بەرنامەى کاری دانیشتنەکانی پەرلەمانەوە".