گه‌ڕان

Shadow Shadow
سیاسه‌تی

هاوسەری کچە 13 ساڵانەکە

ئەو کەسەی دەوترێت کچە 13 ساڵانەکەی مارەکردووە چووە بەڕێوەبەرایەتیی توندوتیژی

2020.11.30 - 11:59
App store icon Play store icon Play store icon
ئەو کەسەی دەوترێت کچە 13 ساڵانەکەی مارەکردووە چووە بەڕێوەبەرایەتیی توندوتیژی

ناس کورد- 

بەڕێوەبەرایەتیی بەرەنگاربوونەوەی توندوتیژی دژی ئافرەتان و خێزان/هەولێر ڕایگەیاند، ئەو کەسەی بڵاوبووەتەوە کە کچێکی تەمەن 13 ساڵانی مارەکردووە بانگهێشتی بەڕێوەبەرایەتییەکەیان کردووە و داوای ڕوونکردنەوەیان لێکردووە، بەڵام ئەو نکۆڵی لێکردووە، بەڕێوەبەرایەتییەکە داواش لە هاووڵاتیان دەکات ئەگەر زانیاریان هەیە لەوبارەیەوە ئاگاداریان بکەنەوە. 

کەناڵی ناس کورد لە تێلیگرام جۆین بکە   

 

لە ڕاگەیەندراوێکدا بەڕێوەبەرایەتیی بەرەنگاربوونەوەی توندوتیژی دژی ئافرەتان و خێزان/هەولێر (دووشەممە 30ی تشرینی دووەمی 2020) ڕایگەیاند: " سەبارەت بە بڵاوبوونەوەى هەواڵی بەشوودانى كچێكى تەمەن 13 ساڵان، لەبڕى قەرز و مارەكردنى لەلايەن كەسێك بەناوى (م ، ن ، ر ) لە بەشێك لەدەزگا راگەياندنەكان، کەسی ناوبراو بانگهێشتی بەڕێوەبەرایەتییەکەمان کرا و نکۆڵی لە مارەکردنی ئەو کچە کرد." 

 

بەگوێرەی ڕاگەیەندراوەکە، ئەو کەسە وتوویەتی: "ئەو وێنەیەى لة بەشێك لەدەزگا راگەياندنەكان بڵاوكراوەتەوە، لەكاتى پرۆسەى هاوسەرگيرى كچە 13 ساليەکە گیراوە، لەگەڵ كەسێكى تر لە شارى موصل." 

 

بەڕێوەبەرایەتیی بەرەنگاربوونەوەی توندوتیژی دژی ئافرەتان و خێزان ئەوەشی خستووەتەڕوو: "لە هەوڵی كۆكردنەوەى بەڵگەداین لەسەر ڕاستى رووداوەکە، بۆیە داوا لە هاوونیشتيمانيانى خۆشەويست دەكەين، ئەوەی زانيارى دروست و بەلگەدارى لايە لەسەر ئەو بابەتە، دەتوانێت ئاگادارمان بكاتەوە لە رێگاى هێلى گەرمى ژماره (١١٩) ى بەڕێوەبەرایەتیەکەمان يان ئەكاونت و پەيجى بەڕێوەبەرایەتیمان ( بەڕێوەبەرایەتی بەرەنگاربوونەوەی توندوتیژی دژی ئافرەتان و خێزان/هەولێر یاخود ئەکاونتی Tundutezhy Hawler    ) بەمەبەستى گەيشتن بەراستى رووداوەکە ." 

 

لەچەند ڕۆژی ڕابردوودا وێنەی هاوسەرگیریی پیاوێک لەگەڵ کچێکی تەمەن 13 ساڵ لە تۆڕە کۆمەڵایەتییەکان کاردانەوەی زۆری لێکەوتەوە و چەند بەیاننامەیەکیش دژ بەو کارە بڵاوکرایەوە، بەڵام دواتر ئەو کەسە لە لێدوانێکی تەلەفزیۆنیدا هەواڵەکەی بەدرۆخستەوە و ڕایگەیاند: " ئەو کچە کچی هاوڕێیەکمە و  باوکی بانگێشتی هاوسەرگیریەکەی کردووم." 

 

لە بەرامبەردا ماڵپەڕی "نەوژین" کە تایبەتە بە ژنان لە زاری سەفین تاهیر، لێپرسراوی نوسینگەی بەرەنگاربوونەوەی توندوتیژی دژ بە ئافرەتان و خێزان لە شەقڵاوە، بڵاویکردووەتەوە: "بۆ ئەو حاڵەتە بەوردی بەدواداچوونم کردووە، ئەو کەسە سێ ژنی هێناوە، ئەمە ژنی چوارەمیەتی، ماوەی دوو ساڵە لەهەریرەوە چووەتە هەولێر لەوێ نیشتەجێیە."  

  

سەفین تاهیر ئاماژەی بەوەشكردووە، پەیوەندی بەو کەسەوە کردووە و قسەی لەگەڵ کردووە، وەڵامەکی بەمشێوەیە بووە: "بەڵێ من هاوسەرگیریم لەگەڵ ئەو کچە کردووە، بەڵام تەنها پرۆسەی مارەکردنمان ئەنجامداوە، خیزانی کچەکە خەڵکی پارێزگای موسڵن و لە نەتەوەی عەرەبن، باوکی هاوڕێمە و پێی وتم، کچەکەی خۆمت پێدەدەم ئەگەر یەکتان بەدڵ بوو، دواتر یەکمان بینی بەدڵم بوو و هاوسەرگیریمان کرد".  

  

لێپرسراوی نوسینەگەی بەرەنگاربوونەوەی توندوتیژی دژ بە ئافرەتان و خێزان لە شەقڵاوە، دەشڵێت، ئەگەر کەیسێکی لەو شێوەیە لە سنوری کارەکانیان هەبێت رێکاری یاسایی دژی دەگرنەبەر.