گه‌ڕان

Shadow Shadow
سیاسه‌تی

’’بەقاچاخ هێنراون’’

زیاتر لە 15 هەزار ئوتومبێلی خوار مۆدێل نایاسایی ’’ژمارەیان پێدەدرێت’’

2020.11.29 - 19:44
زیاتر لە 15 هەزار ئوتومبێلی خوار مۆدێل نایاسایی ’’ژمارەیان پێدەدرێت’’

ناس کورد-

 

ئەندامێکى پەرلەمانى کوردستان رایگەیاند،  زیاتر لە 15 هەزار ئوتومبێلی خوار مۆدێل بە نایاسایی هێندراونەتە هەرێم و چاوەڕێن ژمارەیان پێبدرێت.

 

ئاشنا عەبدوڵا لە لاپەڕەى خۆى لە فەیسبوک (یەکشەممە 29ى تشرینى دووەمى 2020) کە "ناس کورد" بینیویەتى نوسیویەتى "لەدوای کەرەنتینەوە لە هەرێمی کوردستان جۆرێکی دیکە لە قاچاخی لە سنورەکان سەریهەڵداوە، ئەویش هێنانی ئۆتۆمبێلی خوار مۆدێلە بە شێوەی قاچاخ و نایاسایی".

 

ئاماژەى بەوەشکردووە "ئەو ئۆتۆمبێلانەی لەو ماوەی چەند مانگەدا هێندراونەتە هەرێمی کوردستان زیاتر لە 15  هەزار ئۆتۆمبێلەو لە جۆری مارسیدس، بی ئێم، شۆفرلێت، لێگزز، تیۆتا، یەو مۆدێلیان لە 2014 بۆ خوارەوەیە".

 

بەوتەى ئەو پەرلەمانتارە "گرفتەکە تەنها هێنانی ئەو ئۆتۆمبێلانە نیە بە قاچاخ، بەڵکو مەترسیەکە شەرعیەتدانە بەم قاچاخیە ئەوەش لەکاتێکدا دەبێت ئەمانە ژمارەیان پێبدرێت".

 

دەشڵێت "ئەگەر ئەم ئۆتۆمبێلانە ژمارەیان پێبدرێت نەک تەنها شەرعیەت دەدرێت بە قاچاخی سنورەکان بەڵکو وەزارەتی ناوخۆ ئیهانەی بڕیارەکانی خۆی دەکات، چونکە ئەم ئۆتۆمبێلانە بەدەر لە ڕێنماییەکانیان هێندراون و لەپێناو کەسانێکی باڵادەستی حیزبی زەرەر لە هاوڵاتیانی خاوەن ئۆتۆمبێل دەدرێت".

 

بەپێی بەدواداچوێکى ناس کورد کە (8ى تشرینى دووەمى 2020)  بڵاویکردەوە ماوەی چەند هەفتەیەکە لە شەقامەکانی سلێمانی و هەولێر، چەند جۆرێک ئۆتۆمبێلی جۆری مێرسیدسی مۆدێل 2008 و لێگززی مۆدێل 2006 و چەند جۆرێکی دیکە بەبێ ژمارە و بێ سەرەتا لە شەقامەکاندا دەبینرێن و ڕۆژانەش دەهێنرێنە ناوەوە، لەکاتێکدا بەگوێرەی بڕیاری وەزارەتی ناوخۆ هاتنەناوەوەی ئۆتۆمبێلی مۆدێل 2018 و بەرەوخوار قەدەغەیە.

 

ناس کورد زانیویەتی، ئەو ئۆتۆمبێلانە لە ئیمارات دەکڕدرێن و دەکرێنە ناو کۆنتێنەری داخراو و لەسەرجەم دەروازە سنورییەکانەوە بە قاچاخ دەهێنرێنە هەرێم و لێرە نرخیان لەنێوان "130 وەرەقە بۆ زیاتر لە دوو دەفتەر دۆلار دۆلاردایە."  

  

بەگوێرەی بەدواداچوونەکانی ناس کورد، ئۆتۆمبێلەکان هیچ سەرەتا و تۆمارێکیان لە بەڕێوەبەرایەتیی هاتوچۆ بۆ ناکریت، بەڵام تابلۆیەکی ژمارە کاتیی ساختەیان لێدەدرێت.   

  

کەسێک کە ئۆتۆمبێلێکی لەو جۆرەی کڕیوە بە ناس کوردی وت: "لەڕێگەی چەند کەسێکەوە قاچاخچییەکیان پێناساندنم و چوار ئۆتۆمبێلی بۆ من و سێ کەسی دیکە هێنا و جگە لە پارەی کڕینەکەی، تەنها بۆ هێنانە ناوەوەی هەر ئۆتۆمبێلێکیان بڕی 50 وەرەقە ئۆتۆمبێلەکەی لێ سەندین."  

  

لەوبارەیەوە فەرەیدون عومەر، بەڕێوەبەری هاتوچۆی سلێمانی بە ناس کوردی ڕاگەیاند: "ئەو ئۆتۆمبێلانە لە سەرجەم سنورەکانی هەرێم و عێراقیشەوە بەشێوەی قاچاخ دەهێنرێنە ناوەوە، بەڵام هیچ تۆمارێکیان بۆ ناکرێت."  

  

وتیشی: "بڕیارمان هەیە کە لە بازگە یاخود مەفرەزەکانماندا ئەو ئۆتۆمبێلانە دەستیان بەسەردا بگیرێت، چونکە ڕێگەپێندراو و نایاسایین."  

  

دەربارەی ئەوەی هیچ بڕیارێک هەیە بۆ ئەوەی تۆمار بکرین و ژمارەیان پێبدرێت: "بەڕێوەبەری هاتوچۆی سلێمانی ئاماژەی بەوەکرد: "تاوەکو ئێستا هیچ بڕیارێک نییە بۆ تۆمارکردنیان، بەڵام ناشزانین چی ڕوودەدات و بڕیاری نوێ لەوبارەیەوە دەدرێت یاخود نا."  

  

ئۆتۆمبێلەکان هەر لە سلێمانی نین، بەڵکو لە هەولێریش هەن و وتەبێژی هاتوچۆی هەولێریش دەڵیت، هەرێمی کوردستان سنوری نییە و هەموو شتێک دێتە ناوەوە.  

  

فازڵ حاجی، وتەبێژی هاتوچۆی هەولێر بە ناس کوردی ڕاگەیاند: "بێگومان ئاگادارین لەو ئۆتۆمبێلە بێ سەرەتایانە و بەردەوامیش دێنە ناوەوە، بەڵام کە دێنە ناوەوە ئەوکات پێی دەزانین، چونکە بە قاچاخ دێن، نەوەک بە ئاشكرا."  

  

وتیشی: "لە ئەمریکاش کاری قاچاخچێتی هەیە و تەنها لە هەرێم نییە، ناتوانرێت ڕێگە لەو کارە بگیرێت، هەرێم سنوری هەر نییە و هەموو شتێک دەهێنرێتە ناوەوە."  

  

وتەبێژی هاتوچۆی هەولێریش بەهەمانشێوەی هاتوچۆی سلێمانی ئاماژەی بەوەکرد: "ئەو ئۆتۆمبێلانە لە بازگە و مەفرەزەکاندا دەستیان بەسەردا دەگیرێت و هیچ بڕیارێک نییە بۆ ئەوەی تۆمار بکرێن."