ناس کورد-
کۆبوونەوەى یەکێتی و گۆڕان لە دەباشان کۆتایی هات و لە ڕاگەیەنراوێکدا داوا دەکەن "بەپەلە وەفدێکی خاوەن بڕیاری حکومەتی ھەرێم پێکبھێنرێت و بچێتە بەغدا بۆ گفتوگۆکردن لەسەر چارەسەرکردنی ریشەیی و کۆتایی کێشەی بودجەو موچەی ھەرێمی کوردستان."
کەناڵی ناس کورد لە تێلیگرام جۆین بکە
ئەمڕۆ هەردوو شاندی باڵای یەکیتی نیشتمانی کوردستان و بزوتنەوەى گۆڕان لە دەباشان کۆبوونەوە، لە ڕاگەیەنراوی هاوبەشی هەردوولا کە ناس کورد کۆپییەکی پێگەیشتووە داوای بەپەلە پێکهێنانی "شاندێکی خاوەن بڕیار" دەکات بۆئەوەى "بچێتە بەغدا بۆ گفتوگۆکردن لەسەر چارەسەرکردنی ریشەیی و کۆتایی کێشەی بودجەو موچەی ھەرێمی کوردستان ، لەھەمانکاتدا ئەم ھەنگاوە ببێتە بناغەیەکی پتەو بۆ یاسای بودجەی 2021 فیدڕاڵی."
دەشڵێت، تەوەری سەرەکی کۆبوونەوەکە گفتوگۆکردن بوو لەسەر دواین گۆڕانکاری و پێشھاتە سیاسی و ئابوورییەکانی ھەرێم و عێراق ، بەتایبەت خراپی بژێوی ژیانی ھاوڵاتیان و مووچەخۆرانی ھەرێم کە بەرئەنجامی قەیرانی دارایی و بڵاوبوونەوەی ڤایرۆسی کۆرۆنا دروست بووە، دواتریش بەدیارکراوی دوای دەرکردنی یاسای ئەنجومەنی نوێنەرانی عێراق، پەیوەندیدار بە کورتھێنانی بودجەو وەرگرتنی قەرز قەیرانەکە قوڵتربووەتەوە.
ڕاشیگەیاندوو کە هەردوولا "پێشوازی لەھەنگاوەکانی بەرەوپێشچوونی سیستمی لامەرکەزی کارگێڕی و دارایی دەکەین، ھەروەک لەکارنامەی کابینەی نۆیەمی حکومەتی ھەرێمدا ھاتووە."
"زەمینەخۆشکردن بۆ کۆبوونەوەی لایەنە سیاسیەکانی کوردستان و پەرەپێدانی پەیوەندییەکان بە مەبەستی چارەسەرکردنی ئەو کێشانەی رووبەڕووی واقیعی ھەرێم و عێراق دەبێتەوە" بەشێکی ترە لە ڕاگەیەنراوی هەردوو حزب.
