گه‌ڕان

Shadow Shadow
سیاسه‌تی

سەرو 50 دۆلار

عێراق پێشبینی مژدەبەخشی بۆ وادەی بەرزبوونەوەى نرخی نەوت ئاشکرا کرد

2020.11.29 - 09:28
عێراق پێشبینی مژدەبەخشی بۆ وادەی بەرزبوونەوەى نرخی نەوت ئاشکرا کرد

ناس کورد-

وەزیری نەوتی عێراق پێشبینی دەکات لە سەرەتای ساڵی داهاتوودا نرخی نەوت زیاتر بەرزبێتەوە و جەخت دەکاتەوە کە بڕیارەکەى ئۆپێک پڵەس بۆ کەمکردنەوەى بڕی بەرهەمهێنان کاریگەری ئەرێنی هەبووە لە بوژانەوەى بازاڕ.

 

ئیحسان عەبدولجەبار لە لێدوانێکیدا بۆ ڕۆژنامەی سەباحی فەرمی کە "ناس کورد" بەدواداچوونی بۆ کردووە (29ی تشرینی دووەمی 2020) دەڵێت، "لە سەرەتای ساڵی 2021دا نرخی نەوت دەچێتە سەرو 50 دۆلار بۆ هەر بەرمیلێک، ئەوەش بەهۆی بوونی ئاماژەى باش لە بوژانەوەى بازاڕی جیهانی لەدوای بڵاوبوونەوەى پەتای کۆرۆنا."

 

جەختی دەکاتەوە کە "عێراق سورە لەسەر فرۆشتنی پێشوەختەى نزیکەى 48 ملیۆن بەرمیل نەوت لە بازاڕەکانی جیهاندا."

 

وەزیری نەوتی عێراق ئاماژەى بەوەشکرد کە "ڕێککەوتنی کەمکردنەوەى بڕی بەرهەمهێنان کە ڕێکخراوی وڵاتانی بەرهەمهێنی نەوت (ئۆپێک پڵەس) بڕیاری لێدرا کاریگەری ئەرێنی هەبووە و ئامانجەکانی پێکاوە بۆ گەڕاندنەوەى سەقامگیری و هاوسەنگی بۆ بازاڕی نەوت."

 

دەشڵێت، "ئەنجامی بڕیارەکە ئەرێنی و کاریگەرە سەرباری بەردەوامی تارمایی پەتای کۆرۆنا بەسەر ئابوری و پیشەسازی وڵاتانی بەرهەمهێن."

 

ئیحسان عەبدولجەبار ڕەتیشی کردەوە کە داوایان لە ئۆپێک پڵەس کردبێت هەڵاوێردە بۆ عێراق بکەن لە بڕیارەکە و دەڵێت، "سوربوونی وڵاتانی ئەندامی ئۆپێک لەسەر بڕیارەکە زیاتر کاریگەری دەبێت لەسەر بەرزکردنەوەى نرخەکەی."