گه‌ڕان

Shadow Shadow
سیاسه‌تی

ڤیدیۆیەکیان دەستکەوتووە

ئەنجامى لیژنەى لێکۆڵینەوە لە ’’هەڕەشەکردن’’ لە کازم فاروق ئاشکراکرا

2020.11.25 - 15:38
ئەنجامى لیژنەى لێکۆڵینەوە لە ’’هەڕەشەکردن’’ لە کازم فاروق ئاشکراکرا

ناس کورد-

لیژنەى بەدواداچوونى پەرلەمانى کوردستان ناوەڕۆکى لێکۆڵینەوەى لە رووداوى "هەڕەشەکردن" لە کازم فاروق سەرۆکى فراکسیۆنى نەوەى نوێ راگەیاند، سەرۆکایەتى پەرلەمانیش دۆسیەکەى بەتەواوى داخست.

 

لە کۆبوونەوەى (9ى تشرینى دووەمى 2020)ى پەرلەمانى کوردستاندا کازم فاروق، سەرۆکى فراکسیۆنى نەوەى نوێ رایگەیاند کە لەلایەن چەند پەرلەمانتارێکى پارتى و یەکێتییەوە هەڕەشەى لێکراوە، لەسەر ئەو بنەمایەش سەرۆکایەتى پەرلەمان لیژنەى لێکۆڵینەوەى پێکهێنا.

 

بەپێی ئەنجامى بەدواداچونى لیژنەکە کە لەکۆبوونەوەى ئەمڕۆى پەرلەماندا خوێنرایەوە و "ناس کورد" (24ى تشرینى دووەمى 2020) بەدواداچوونى بۆ کردووە، کازم فاروق یەک شاهیدى بردووە بۆ سەلماندنى قسەکانى و هەر سێ کەسى سکاڵالێکراوەش رەتیان کردووەتەوە و وتویویانە هەڕەشەیان نەکردووە.

 

ئاماژە بەوەشکراوە، لیژنەکە ڤیدیۆیەکیان دەستکەوتووە بەڵام دەنگى لەسەر نییە بۆیە هیچ سودێکیان لێوەرنەگرتووە.

 

لاى خۆیەوە رێواز فایەق سەرۆکى پەرلەمان رایگەیاند، لەسەر پێشنیازى لیژنەکە لەگەڵ پێنج راوێژکارى یاسایی پەرلەمان قسەیان کردووە و بڕیاریانداوە دۆسیەکە دابخەن.

 

وتیشى "لیژنەکە بەڵگەى پێویستى بۆ سەلماندنى رووداوەکە دەستنەکەوتووە و نەیتوانیوە هەڕەشەکە بسەلمێنێت، بەتایبەت کە ئەو پەرلەمانتار دوو براى خۆى کە پاسەوانین وەک شاهێد پێشنیازکردووە، لەگەڵ دوو کەسى دیکە کە یەکێکیان پەرلەمانتارە و ئەوەى دیکەش فەرمانبەرە و شایەنى رەتکردنەوەن".

 

رێواز فایەق باسى لەوەشکرد، سەرجەم قسەکانى کازم فاروق و وەڵامى پەرلەمانتاران لەبارەى ئەو رووداوەوە لەکۆبوونەوەى (9ى تشرینى دووەمى 2020)ى پەرلەمانى کوردستاندا و لە پرۆتۆکۆڵى پەرلەمان دەسڕدرێنەوە.

 

لەگەڵ ئەوەشدا رێواز فایەق جەختیکردەوە، بژاردەى چوونە بەردەم دادگا، بۆ کازم فاروق و پەرلەمانتارانى سکاڵالێکراویش پارێزراوە.