گه‌ڕان

Shadow Shadow
سیاسه‌تی

چى لێ پرسیوە؟ 

حەکیم سێ پرسیارى تایبەت بە لێسەندنەوەى متمانە لە حەلبوسى لە ئوسامە نوجێفى کردوە

2020.11.22 - 22:20
حەکیم سێ پرسیارى تایبەت بە لێسەندنەوەى متمانە لە حەلبوسى لە ئوسامە نوجێفى کردوە

ناس کورد-

سەرکردەیەکى ڕەوتى حیکمە ڕایگەیاند، عەممار حەکیم سەرۆکى ڕەوتەکە و سەرۆکى ئیئتلافى عێراقیون لە کاتى کۆبونەوەى لەگەڵ ئوسامە نوجێفى سەرۆکى بەرەى ڕزگارى و گەشەپێدان سێ پرسیارى تایبەت بە لێسەندنەوەى متمانە لە محەمەد حەلبوسى سەرۆکى پەرلەمانى لێ کردوە.

 

بەلیغ ئەبو کەلەل (یەکشەممە 22ى تشرینى دووەمى 2020) لە گفتوگۆیەکى تەلەفزیۆنیدا کە "ناس کورد" بینیویەتى باسى لەوە کردوە، کاتێک عەممار حەکیم و ئوسامە نوجێفى کۆبونەتەوە و حەکیم سێ پرسیارى تایبەت بە هەوڵەکان بۆ سەندنەوەى متمانە لە سەرۆکى پەرلەمان لە نوجێفى کردوە، یەکەمیان بەدیهێنانى زۆرینەى سونەیە بۆ ئەو بابەتە.

 

ڕونیشیکردەوە، پرسیارى دووەمیش بریتیی بووە لە بابەتى قبوڵکردن لەلایەن کوتلەکانى ترەوە لە کەشێکى نیشتمانیدا، هەروەها سێیەمیش بریتى بووە لە ئامادەبونى جێگرەوەى حەلبوسى و ئایا لە سەرۆکى ئێستاى پەرلەمان باشترە، سەرۆکى بەرەى ڕزگارى و گەشەپێدانیش بەڵێنى ئەوەى داوە وەڵامى ئەو پرسیارانەى بداتەوە، هەروەها داوا لە بەرەکە کراوە تێبینیەکان لەسەر حەلبوسى پێشکەش بکەن و هەوڵى چاککردنى بدەن.

 

سەبارەت بە بارودۆخى کوتلە سیاسیەکان لە هەڵبژاردنى پێشوەختدا ئەو سەرکردەیەى ڕەوتى حیکمە بەدوریزانى هاوپەیمانێتى لەگەڵ ڕەوتى سەدر بکەن و وتیشى، ئەو شتێکى دوریش نییە، ئەزمونى پێشومان لەگەڵ هاوپەیمانى چاکسازى سەرکەوتوو نەبوو کاتێک لەگەڵ فەتح هاوپەیمانیمان کردو حکومەتمان پێکهێنا.

 

هەرچى سەبارەت بە ئەگەرى بەدەستهێنانى زۆرینەى پەرلەمان لەلایەن سەدریەکانەوە وتى، پێموانییە ڕەوتى سەدر بتوانێت لە 50+1 بەدەستبهێنێت بۆ ئەوەى گەورەترین کوتلەى پەرلەمان پێکبهێنێت و سەرۆک وەزیرانى داهاتوو دیارى بکات، پێویستیان بە هاوپەیمانێتى دەبێت بۆ ئەوەى بتوانن 50+1 تەواو بکەن.