گه‌ڕان

Shadow Shadow
سیاسه‌تی

وردەکاریى زیاتر

پەکەکە ئامادەیى بۆ گفتوگۆ لەگەڵ پارتى دەربڕى

2020.11.22 - 20:32
پەکەکە ئامادەیى بۆ گفتوگۆ لەگەڵ پارتى دەربڕى

ناس کورد- 

بەرپرسێکى باڵاى پەکەکە رایگەیاند، ئامادەن لەگەڵ پارتى دەست بە گفتوگۆ بکەن بۆ چارەسەرى کێشەکانى نێوانیان.

 

باهۆز ئەرداڵ ئەندامی بەڕێوەبەریی بڕیارگەى ناوەندەیی فەرماندەیی گەل (نەپەگە) بە میدیاکانى سەر بە پەکەکەى راگەیاند "سەرباری هەموو هۆشدارییەکان هێزەکانی پێشمەرگە بە چەکی قورس چوونە ناوچەکانی گەریلا و ئەوەش بووە هۆی روودانی شەڕ".

 

وتیشى ئەوان هەرگیز نایانەوێت لە بەرامبەر هێزە کوردییەکاندا شەڕ بکەن و داوای لە فەرماندەکانی پێشمەرگە کرد، "نەکەونە ناو ئەو یاری و گەمانەوە، کە دەیانەوێت ئەوان بهێنن و رووبەڕووی گەریلایان بکەنەوە، کە شانبەشانی ئەوان لە سەنگەرەکاندا لە دژی داعش شەڕیان کردووە".

 

ئەرداڵ رایگەیاند ئەگەر شەڕێکی ڕووبدات، کاریگەریەکی زۆر گەورە و زیانێکی زۆر گەورە لەسەر دەستکەوت و شۆرشی ڕۆژئاواش دروست دەکات.

 

دەشڵێت "ئەوانەی خۆیان وەک پێشمەرگەی رۆژ بەناو دەکەن، هاتوون و لەسەر هێڵی مەتینا و گارە جێگیر بوون و دەیانەوێت لە هەرێمەکانی گەریلا خەندەق دروست بکەن، بۆسە دادەنێن و لولەی چەکەکانیان دەکەنە گەریلا".

 

ئەرداڵ باسی لەوەکرد، "پەکەکە بۆچی لەگەڵ هێزەکانی باشووری کوردستان شەڕ بکات؟ شتێکی بەم شێوەیە نییە، ئێمە هەموو کاتێک بە ئاشکرایی دەیڵێین، ئێمە لەبەرانبەر هیچ هێز و پارتێکی باشووری کوردستان ناوەستینەوە".

 

4ی ئەم مانگە لە ڕوبەڕوبونەوەیەکی تەمومژاوی هێزەکانی نزیک لە پارتی دیموکراتی کوردستان و هێزەکانی پەکەکەدا لە چەمانکێ، پێشمەرگەیەک گیانیلەدەستدا و دوو پێشمەرگەی دیکەش برینداربوون.