گه‌ڕان

Shadow Shadow
سیاسه‌تی

باس لە سەپاندنى میر دەکەن 

ئێزدییەکان وەڵامى وتەبێژى پارتى دەدەنەوە 

2020.11.22 - 19:17
ئێزدییەکان وەڵامى وتەبێژى پارتى دەدەنەوە 

ناس کورد- 

ژمارەیەک کەسایەتى و چالاکى ئێزدییەکان وەڵامى وتەبێژى پارتى دیموکراتى کوردستان دەدەنەوە و ڕایدەگەیەنن، هەردواى کۆچى دوایى میر تەحسین بەگ پارتى بۆ دیاریکردنى میرى نوێى ئێزدییەکان دەستوەردانى کردووە و دور لەخواستى ئەوان حازەم تەحسین بەگ کراوەتە میریان و ئەو کەسایەتیەش شکستخواردووە بۆ بەڕێوەبەرى ئێزدییەکان.

 

لە راگەیەندراوێکى ژمارەیەک لە کەسایەتى و چالاکى ئێزدییەکان کە "ناس کورد" بینیویەتى (22ى تشرینى دووەمى 2020) ئاماژە بەوە کراوە، میرى نوێى ئێزدییەکان دور لەخواست و ئیرادەى ئێزدییەکان و لەکۆبونەوەیەکى داخراوى نایاسایدا بێ بەشدارى ئێزدییەکان کراوە و تەنها ژمارەیەک لەئێزدى لایەنگرى پارتى بەشداریان تێدا کردووە و شێوازى هەڵبژاردنى بابە شێخى نوێش ڕوون نەبووە و ئەوەش جێگەى قەبوڵکردن نیە.

 

لەبەشێکى ترى ڕاگەیەنراوەکەیاندا، کەسایەتى و چالاکانى ئێزدى دەڵێن "لای گەلی هەرێمی كوردستان و عیراق و تەواوی ئێزدییەكان ئاشكرایە كە پارتی لەدوای پرۆسەی ئازادی عیراق لەساڵی 2003ەوە  سیاسەتی (هەڕەشە و لا شیرنكردن) بەرامبەر ئێزدییە بێتاوانەكان پەیڕەو دەكات، بەتایبەت دوای تەسلیمكردنی ئێزدییەكان لە شنگال لەساڵى 3/8/2014". 

 

لەکۆتایى ڕاگەیەنراوەکەشدا کەسایەتى و چالاکانى ئێزدى ڕەخنە لەبێدەنگى سەرۆکایەتیەکانى عێراق و هەرێم و حزب و میدیا و کەسایەتیەکانى کوردستان دەگرن کە لەبەرامبەر هەڕەشەى لەناوچۆنى ناسنامەى ئاینى و پەرستگا و مافە گشتیەکانیان بەوتەى ئەوان هەڵوەستەیەکیان نیە.

 

ئەوەش لەکاتێکدایە، چەند ڕۆژێک پێش ئێستا مەحمود محەمەد وتەبێژى پارتى دیموکراتى کوردستان ڕاگەیەندراوێکى بڵاوکردەوە و تیایدا ڕەتیکردەوە حزبەکەى دەستوەردانى لەدیاریکردنى میرى نوێى ئێزدییەکاندا کردبێت.