گه‌ڕان

Shadow Shadow
سیاسه‌تی

هانا بۆ هاوسەرۆکانى یەکێتى دەبات

لەلایەن هێزێکى چەکدارەوە هێرشدەکرێتە سەر خاوەنى چێشتخانەى کامەران لەسلێمانى

2020.11.22 - 16:51
لەلایەن هێزێکى چەکدارەوە هێرشدەکرێتە سەر خاوەنى چێشتخانەى کامەران لەسلێمانى

ناس كورد- 

خاوەنى چێشتخانەى کامەران لەعەقارى شارى سلێمانى ڕایگەیاند "ئەمڕۆ هێزێکى چەکدار هاتونەتە سەرم لەناو چێشتخانەکەمدا و دەستیانکردووە بە لێدان و فەلاقەکردنم".

 

لەکۆنگرەیەکى ڕۆژنامەوانیدا، کە پەیامنێرى "ناس کورد" ئامادەى بوو، وەستا کامەران خاوەنى چێشتخانە و کەبابخانەى وەستا کامەران لەگەڕەکى شارى عەقارى سلێمانى ڕایگەیاند :"دوا نیوەڕۆى ئەمڕۆ هێزێکى چەکدار بەدوو وەنەوشەى جام ڕەشەوە هێرشیان کردە سەرمان لەناو چێشتخانەکەدا بە 12 کەس پەلاماریاندام و پەنجەشم بەو هۆیەوە بریندارە و بەلەقە و شەق لێیاندام و گرتەى ڤیدیۆیشمان لەسەر هێرشەکەیان هەیە".

 

وتیشى "پرسیومە بۆچى هێرشم دەکەنە سەر و پەلامارم دەدەن بەڵام ئەوان جنێوێیان پێداوم و وهەڕەشەى ئەوەشیان کردووە کە دێینەوە سەرت و دەتکوژین و نەشمزانیوە بۆچى بەو شێوەیە هێرش دەکەنە سەرم و خەڵک هەروا سەرى سوڕماوە لەو کارە".

 

وەستا کامەران ئاماژەى بۆ ئەوەش کرد"من کرێچی خاوەنى چێشتخانەکەمم و دواى ئەوەى کێشەى یاسایى کەوتە نێوانمانەوە بۆم چۆڵ کرد و دواتر چوومەتە ئەوبەرەوە بەڵام دواى ئەوەى ئاوى بۆرییەکەى لێگرتوومەوە چووم سکاڵام لێکرد دواتریش تەنازولم لەسکاڵاکە کرد بەڵام حەقى عامى لەسەر مابوو ئیتر ئەمڕۆ هاتوونەتە سەرم".

 

وەستا کامەران باسى لەوەش کرد، وا بۆ 22 ساڵە لەعەقاریدا ئەو چێشتخانەیەى هەیە و کێشەى لەگەڵ کەسدا نەبووە، بەڵام ئەمڕۆ لەخۆى و براکەشیانداوە لەلایەن ئەو هێزەوە.

 

خاوەنى چێشتخانەى کامەران دەشڵیت، دواتر بەتەلەفۆن هەڕەشەی کوشتنیان لێکردووە و لەو هەڕەشەیەش بەردەوامن.



خاوەنى چێشتخانەى کامەران داواشى لەهاوسەرۆکانى یەکێتى کرد دەستوەردان لەو کێشەیەدا بکەن و چارەسەرى ئەو کێشەیەى بۆ بکەن و لەپۆلیسش سکاڵایان تۆمار کردووە.