گه‌ڕان

Shadow Shadow
سیاسه‌تی

بیرەوەرییەکانی ئۆباما

ئۆباما ناوەڕۆکی دیالۆگێكی خۆی و مالیكی لەبارەی كورد و سوننە ئاشكرادەکات

2020.11.21 - 22:56
ئۆباما ناوەڕۆکی دیالۆگێكی خۆی و  مالیكی لەبارەی كورد و سوننە ئاشكرادەکات

ناس کورد-

باراك ئۆبامای سەرۆكی پێشوتری ئەمەریكا لە بیرەوەرییەكانیدا دان بەوەدا دەنێت ئەمەریكییەكان و جۆرج بوش عێراقیان هەڵوەشاند و ناوەڕۆكی دیالۆگێكی خۆی و سەرۆك وەزیرانی پێشووتری عێراق نوری مالیكی لەبارەی داواكارییەكانی هەردوو پێكهاتەی سوننەوە ئاشكرا دەكات.

 

نوری مالیکی کە ئەو کات سەرۆکوەزیرانی حکومەتی عێراق بووە، یەکێكە لەو کەسایەتییانەی کە ئۆباما لە کتێبەکەیدا باسی لێوەکردووە و تێیدا دەڵێت: "لە میانەی سەردانێکی کورتدا بۆعێراق لە نیسانی ساڵی 2009  چەند پێشنیارێکم ئاڕاستەی مالکی کرد بۆ ئەنجامدانی چاکسازیی ئیداری پێویست لە جومگەکانی دەوڵەت و زیاتر هەماهەنگی کردن لەگەڵ پێکهاتەکانی کورد و سونە، بەڵام بەڕێزەوە وەڵامیدامەوە دەستیکرد بە بەگریکردن لەخۆی".

 

ئۆباما دەشڵێت: "مالیکی سەرسام نییە بە بیرۆکە فیدراڵییەکانی سەرۆکی دامەزرێنەر 'جایمس مادیسۆن' و بەلای ئەوەوە پرۆژەیەكە بۆ هەڵوەشاندنەوەی کۆمەڵگا، بەبۆچوونی مالکی، شیعە زۆرینەن، هاوپەیمانییەتەکەشی لە هەڵبژاردنەکاندا زۆرینەی بەدەست هێناوە، داواکارییەکانیش بۆ ڕەچاوکردنی مافی کەمینەکان پرسێکی بێزارکەرە و پەیوەندی بە فشارەکانی ئەمەریکاوە هەیە ".

 

ئۆباما باسیلەوەشکردووە: "گفتوگۆکانی لەگەڵ مالکی ئەوەی بە بیرهێناوەتەوە، کە ئەنجامدانی هەڵبژاردن تەنها بەس نییە بۆ پتەوکردنی پڕۆسەی دیموکراسی، عێراق ئەگەر دامەزراوەکانی زیاتر پتەو نەکات و سەرکردەکانی لەگەڵ ئاسایی کردنەوەی دۆخە سەختەکاندا ڕانەیەن، ئەوا کێشە و ئاڵۆزییەکان لەو وڵاتە بەردەوام دەبێت".

 

سەرۆکی پێشووتری ئەمەریکا ئەوەشی خستووەتەڕوو: "مالکی و نەیارەکانی تائێستا هەوڵی ئەوە دەدەن  کێشەکانیان بەبێ دەست بردن بۆ چەک چارەسەر بکەن بەپەنا بردن بۆ ڕێرەوە سیاسیەکان، ئەوەش کاری باشە".

 

ئۆباما کتێبی یادەوەرییە سەرۆکایەتییەکەی بەناوی "A Promised Land" واتە "خاکی بەڵێندراو" بە دوو بەش بڵاوکردەوە و تێیدا بۆچوون و تێڕوانینەکانی سەبارەت بە چەند سەرکردەیەکی جیهان بڵاوکردووەتەوە.

 

کتێبەکەی ئۆباما لە ماوەی کەمتر لە 24 کاژێردا، لە ئەمریکا و کەنەدا نزیکەی 890 هەزار دانەی لێفرۆشراوە، ئەمەش بۆ یانەی پێنگوین راندۆم هاوس کە کتێبەکەی بڵاوکردووەتەوە ژمارەیەکی پێوانەییە و پێشبینیش دەکرێت ببێتە پڕفرۆشترین کتێبی یادەوەریی سەرۆکەکان لە مێژووی ئەمەریکادا.