گه‌ڕان

Shadow Shadow
سیاسه‌تی

’’هەرێم و عێراق لە ڕێککەوتندان’’

كاردانەوەیەك لەناو فراكسیۆنی پارتییەوە لەبارەی گواستنەوەی موچە بۆ سەر بەغدا

2020.11.21 - 21:51
App store icon Play store icon Play store icon
كاردانەوەیەك لەناو فراكسیۆنی پارتییەوە لەبارەی گواستنەوەی موچە بۆ سەر بەغدا

ناس کورد-

پەرلەمانتارێکی پارتی لە پەرلەمانی کوردستان ڕایگەیاند، پڕۆژەی گواستنەوەی موچەی فەرمانبەرانی هەرێم بۆسەر بەغدا تەنها بانگەشەی هەڵبژاردنە و دەشڵێت، حکومەتی هەرێم و بەغدا لە هەوڵێکی جدیدان کە بگەنە ڕێککەوتنێکی سیاسی و ئابووری  تاوەکو کۆتایی بە ململانێی حەوت ساڵەی نێوانیان بهێنن.

کەناڵی ناس کورد لە تێلیگرام جۆین بکە   

 

لیزا فەلەکەدین، ئەندامی فراکسیۆنی پارتی لە پەرلەمانی عێراق (شەممە 21ی تشرینی دووەمی 2020) لە فەیسبوکی فەرمیی خۆی ڕایگەیاند: " پڕۆژەی گواستنەوەی موچەی فەرمانبەرانی هەرێم بۆ سەر بەغدا یەکێکە لە بەرنامە زەقەکانی بانگەشەی هەندێک لایەنی سیاسی کوردستانی و عێراقی کەوا جگە لە چەواشەکاری و هەوڵدان بۆ خۆ بەپاڵەوانکردن بۆ هەڵبژاردنی داهاتوو هیچ واقیعییەتێکی دیکەی تێدا بەدی ناکرێت."

 

ئاماژەی بەوەشكردووە: "  مامۆستایەکی ئازیز یاخود فەرمانبەرێکی ماندوونەناس شایستەی ئەوە نییە بەساویلکە بزانرێت و بە دوو ژاوە ژاوی سیاسی  هەوڵی کۆنترۆڵ کردنی هەست و بیرکردنەوەی بدرێت و بەکاربهێنرێت بۆ کۆکردنەوەی دەنگ و کورسییەکی پەرلەمانی، لە هەمووی سەیروسەمەرەتر کەسانێک کە خۆیان کردووەتە خاوەنی پرۆژەکە لە رابردوو نەیانتوانیوە پابەندی سیاسەتی حزبەکەی خۆیان بن و بەبێ هیچ دوو دڵییەک لەپێناو بەرژەوەندییەکانیان بە چاوتروکاندنێک پشتیان لە حزبەکەی خۆیان کردووە. "

 

پەرلەمانتارەکەی پارتی دەشڵێت: "لەهەمووشی کارەساتبارتر ئەو پرۆژەیە واژووی پەرلەمانتاری وای تیایە کە بە رەچەڵەک کوردە و  پاسپۆرتی ئەمریکی هەیە کەچی بەرژەوەندییەکانی ئەوەنە زاڵبوونەتە سەری فەرمان لە  ئەنارشیزمەکانی بەغدا وەردەگرێت، بە راستی ئەم جۆرانە ئیتر جێگەی بەزەیین."

 

 

 

 لیزا فەلەکدین لە درێژەی نوسینەکەیدا باسی لەوەکردووە: "هەردوو حکومەتی هەرێم و بەغدا لە هەوڵێکی جدیدان کە بگەنە میساقێکی سیاسی و ئابووری  تاوەکو کۆتایی بە ململانێی حەوت ساڵەی نێوانیان بهێنن، بێگومان ئەمەش هەندێک لایەنی بەتەواوی پەست و قەڵس کردووە و بە پیلانرێژی و بەرنامە جۆراجۆر دەیانەوێت بەربەست لەبەردەم ئەو رێککەوتنانە دروست بکەن."

 

پەرلەماننتارەکەی پارتی جەختیکردووەتەوە: "حکومەتی عێراق لە رووی سیاسی و ئابووری و یاسییەوە مامەڵە لەگەڵ حکومەتی هەرێمی کوردستان دەکات، بۆیە دڵنیابن ئەو پرۆژەیە تا بەردەگای هۆڵی کۆبوونەوەی پەرلەمان دەچێت، بەڵام ناچێتە ژوورە. "

 

لە کۆتایی نوسینەکەیدا لیزا فەلەکەدین ئاماژەی بەوەکردووە: "ئەو پەرلەمانتارە کوردانەی خۆیان کردووەتە خاوەنی ئەم پرۆژەیە چاکتر وایە  سەرقاڵی پرسی گرنگتر بن کە واقعی بێت و ئەنجامی هەبێت و لە بەرژەوەندی کوردستانیان بێت، بۆ نمونە پرسی هەمواری دەستوور و هەوڵی شۆڤینییەکان بۆ لابردن و نەهێشتنی ماددەی 140، پێویستە دەستوبردێک بکەن و چۆن توانیان 117 واژووی پەرلەمانتارانی عێراق بۆ پرۆژەیەکی خەیاڵاوی کۆبکەنەوە ئاواش لۆبی بۆ ئەم پرسەش دروست بکەن."